އެޗްޑީސީން ލ. ގަމުގައި ނާސަރީއެއް ތަރައްގީކުރަނީ

އަހުމަދު ނިހާން

24 ފެބުރުއަރީ 2025 - 15:24

0 comments

އެޗުޑީސީގެ މެނޭޖިން ޑިރެކްޓަރު މައުރޫފް އިއްޔެ ލ. ގަން ކައުންސިލާ އެކު ބޭއްވި މަޝްވަރާގެ ތެރެއިން

ގަސް އާލާކުރުމަށް ޚާއްސަކޮށްގެން ލ. ގަމުގައި ނާސަރީއެއް ތަރައްޤީކުރުމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗްޑީސީން ނިންމައިފިއެވެ. އެގޮތުން އެޗްޑީސީއަށް އެކަމަށް ބޭނުންވާ ބިން އެރަށުން ވަނީ ހަމަޖައްސައިފިއެވެ.

އެޗުޑީސީއިން ބުނި ގޮތުގައި މިއީ ރައީސް މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ފަސް މިލިއަން ގަސް އިންދުމުގެ ޕްރޮގްރާމުގައި ބައިވެރިވުމުގެ ގޮތުން އެ ކުންފުނިން އެއް މިލިއަން ގަސް އިންދަން ނިންމައި، އެކަމަށް ބޭނުންވާ ގަސް ހެއްދުމަށް ބޭނުންކުރާ ނާސަރީއެކެވެ.

އެގޮތުން ހުޅުމާލޭގެ އިތުރުން އެޗުޑީސީގެ ބެލުމުގެ ދަށުގައިވާ ރަސްމާލެ، ކުޑަގިރި، ތިލަފުށި އަދި ގުޅިފަޅުގައި އިންދަން ބޭނުންވާ ގަސް ހެއްދުމަށް އެ ނާސަރީ ބޭނުންކުރާނެ އެވެ.

އެޗްޑީސީގެ ބެލުމުގެ ދަށުގައިވާ ރަށްތައް ފެހިކުރުމާއެކު، ސަރުކާރުގެ ފަސް މިލިޔަން ގަސް އިންދުމުގެ ޕްރޮގުރާމުގައި ބައިވެރިވެ، އެ މަސައްކަތަށް އެއްބާރުލުން ދިނުމުގެގޮތުން އެއް މިލިޔަން ގަސް އިންދުމަށް ނިންމައި އެކަމުގެ ޕްލެޖްގައި އެޗްޑީސީން ސޮއިކުރީ، ކުޑަގިރި ޕިކްނިކް އައިލެންޑަށް ދެ އަހަރު ފުރުން ފާހަގަކުރުމަށް މިދިޔަ ހޮނިހިރު ދުވަހު ބޭއްވި ހަރަކާތްތަކުގެ ތެރެއިންނެވެ.

މި ޕްރޮގްރާމާއެކު ހުޅުމާލެ ހިމެނޭހެން އެޗްޑީސީގެ ބެލުމުގެ ދަށުގައި އޮތް ރަށްތައް ފެހިކުރުމަށް އެ ކޯޕަރޭޝަނުން ހިފާފައިވާ އަމާޒަށް ވާސިލުމަށްވެސް މަގުފަހިވާނެކަމަށް އެޗްޑީސީއިން ވިދާޅުވެއެވެ.

އެޗުޑީސީގެ އަމާޒަކީ އެ ކުންފުނީގެ ބެލުމުގެ ދަށުގައިވާ ހުރިހާ ރަށްތަކަކީ ވެސް ހިތްފަސޭހަ އަދި ފެހި ތަންތަނަށް ހެދުން ކަމަށް އެ ކުންފުނިން ބުނެ އެވެ.