އެމްޓީސީސީގެ ބޯޑަށް އާ ބޭފުޅަކު އައްޔަންކޮށްފި

އަހުމަދު ނިހާން

09 އޭޕްރީލް 2025 - 10:34

0 comments

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ބޯޑަށް އާ ބޭފުޅަކު އައްޔަންކޮށްފި އެވެ.

ޕްރައިވަޓައިޒޭޝަން އެންޑް ކޯޕަރައިޓައިޒޭޝަން ބޯޑް (ޕީސީބީ) އިން ބުނީ ބޯޑަށް އައްޔަންކުރީ ހުޅުމާލެ، ހިޔާ, 8-01-04 ޔާސީން ހުސައިން ކަމަށެވެ.

ޔާސީން މިހާރުވެސް ހުންނެވީ ފިނޭންސް މިނިސްޓްރީގެ ޗީފް ޕަބްލިކް އެކައުންޓެންޓްގެ މަގާމުގަ އެވެ.

އޭނާ ވަނީ ފިނޭންސް މިނިސްޓްރީގެ ފައިނޭންޝިއަލް އެކައުންޓިން އެންޑް ކޮންޓްރޯލިންގް ކޮންސަލްޓަންޓްގެ މަގާމުވެސް އަދާކުރައްވާފަ އެވެ.

ޔާސީން ވަނީ ޔުނިވާސިޓީ އޮފް ދަ ވެސްޓް އޮފް އިންގްލެންޑް އިން ބިޒްނަސް އެޑްމިނިސްޓްރޭޝަން އެންޑް މެނޭޖްމަންޓް އިން މާސްޓާސް ޑިގްރީ ހާސިލުކުރައްވާފަ އެވެ.

އެމްޓީސީސީގެ ބޯޑަށް މެންބަރަކު އައްޔަންކޮށްފައި މި ވަނީ ކުރިން ބޯޑުގައި ކުރިން ހުންނެވި، ސިނާން އަލީ، އެ ކުންފުނީގެ ޗީފް އޮޕަރޭޝަންސް އޮފިސަރު (ސީއޯއޯ) ގެ މަގާމަށް މިދިޔަ މަހުގެ ތެރޭގައި ބަދަލު ކުރެއްވުމާ ގުޅިގެންނެވެ.

އެމްޓީސީސީގެ ބޯޑުގައި މިހާރު ތިއްބަނީ ޗެއާމަން މުހައްމަދު އަފީފް ހުސައިނާއި މެނޭޖިން ޑިރެކްޓަރު/އެގްޒެކެޓިވް ޑިރެކްޓަރު ޑީސީޕީ (ރިޓަޔާޑް) އަހުމަދު ސައުދީ އާއި ޑެޕިއުޓީ މެނޭޖިން ޑިރެކްޓަރު/ނޮން އެކްޒެކެޓިވް ޑިރެކްޓަރު މުހައްމަދު ޖަމްޝީދާއި ނޮން އެގްޒެކެޓިވް ޑިރެކްޓަރު އަލީ ނާއިލާއި އާންމު ހިއްސާދާރުންގެ ފަރާތުން ބޯޑަށް އައްޔަންކޮށްފައިވާ ނޮން އެކްޒެކެޓިވް ޑިރެކްޓަރު ނަސްރަތު މުހައްމަދުގެ އިތުރުން ނޮން އެކްޒެކެޓިވް ޑިރެކްޓަރު މުހައްމަދު އިމްރާން އަދުނާނެވެ.