ޒުވާނުންގެ އަޑު ސަރުކާރުން އަހަން ޖެހޭ: އަޒާން

މަރިޔަމް އަނާ

24 އޭޕްރީލް 2025 - 10:42

0 comments

ހުކުރު ދުވަހު މާލޭގެ ގެއެއްގެ ނުވަ ވަނަ ފަންގިފިލާއިން ޒުވާން އަންހެން ކުއްޖަކު ވެއްޓުނު މައްސަލައިގައި އޭނާއާއެކު އެރޭ އުޅުނު މީހާ ހައްޔަރު ނުކުރާތީ އާއި އެކަމާ ގުޅޭ ތަހުގީގު ފުލުހުން ކުރިއަށް ގެންދާ ގޮތާމެދު ހިތްހަމަ ނުޖެހިގެން ރޭ ނުކުތް ޒުވާނުންގެ އަޑު ސަރުކާރުން އަހަން ޖެހޭ ކަމަށް، މި ސަރުކާރު ހިންގާ ޕީއެންސީ އަށް ނިސްބަތްވާ ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން ވިދާޅުވެއްޖެ އެވެ.

އުމުރުން 21 އަހަރުގެ ޒުވާން އަންހެން ކުއްޖަކު ފުރާޅެއްގެ މައްޗަށް ވެއްޓިފައި އޮއްވާ ފެނުނީ މިދިޔަ ހުކުރު ދުވަހުގެ ހެނދުނު އެވެ. އެ ޒުވާނާ ވެންޓިލޭޓަރުގައި ބޭއްވުމަށްފަހު މިހާރު ވަނީ ވެންޓިލޭޓަރުން ނަގާފަ އެވެ. އެހެންނަމަވެސް އެ ޒުވާނާގެ ހާލު އަދިވެސް ސީރިއަސް އެވެ.

މި މައްސަލާގައި ފުލުހުން މިދިޔަ އަންގާރަ ދުވަހުގެ ރޭ ބޭއްވި ކުއްލި ނޫސްވެރިންގެ ބައްދަލުވުމުމުގައި މި ހާދިސާ ހިނގި ގޮތާއި ސީސީޓީވީ ފުޓޭޖުތަކެއް ދައްކާފައިވެ އެވެ. އެ ނޫސްވެރިންގެ ބައްދަލުވުމުގައި އެ އަންހެން ކުއްޖާގެ ވަނަވަރު ހާމަކުރި ނަމަވެސް މިކަމުގައި ދެން ހިމެނޭ އެއްވެސް މީހެއްގެ ނަމެއް ހާމަކޮށްފައެއް ނުވެ އެވެ. އަދި މި ހާދިސާ ހިނގި ރޭ އެ އަންހެން ކުއްޖާއާއެކު ހުރި 21 އަހަރުގެ ޒުވާނަކު މަސްތުވާތަކެއްޗަށް ޕޮޒިޓިވްވި ނަމަވެސް އޭނާ މިހާތަނަށް ހައްޔަރުކޮށްފައެއް ވެސް ނުވެ އެވެ.

މި މައްސަލައިގައި ފުލުހުން ތަހުގީގު ކުރިއަށްގެންދާ ގޮތާއި މެދު އާންމުންގެ ބޮޑެތި ފާޑުކިޔުންތައް ވަނީ އަމާޒުވެފަ އެވެ. އެގޮތުން ރޭ މާލޭގައި ގިނަ އަދަދެއްގެ ޒުވާނުން ވަނީ އިހުތިޖާޖެއް ވެސް ބާއްވާފަ އެވެ.

އެކްސްގައި ކުރެއްވި ޕޯސްޓެއްގައި އަޒާން ވިދާޅުވީ އެ ޒުވާނުންގެ އަޑު ސަރުކާރުން އަހަން ޖެހޭ ކަމަށާއި ފުލުހުން މިހާތަނަށް އާންމުކުރި މައުލޫމާތުތަކުގައި ސުވާލު އުފެދޭ އެތައް ކަމެއް އެބަހުރި ކަމަށެވެ. އަދި މިބާވަތުގެ އެހެން މައްސަލަތަކުގައި އަމަލުކުރަމުން އަންނަ ގޮތްތަކާއި ތަފާތު ގޮތްތަކަށް އަމަލުކުރާނަމަ އެ ތަފާތު ގެންނަ ސަބަބު ސާފުވާންޖެހޭނެ ކަމަށްވެސް އަޒާން ވިދާޅުވި އެވެ.

ޔުމްނު އާއި އޭނާއާއެކު އުޅުނު މީހާ، އެހެން ޒުވާނުންތަކާކާއެކު ބުރާސްފަތި ދުވަހުގެ ރޭ ފުރަތަމަ ދިޔައީ "މާލޭގެ މެދުތެރޭގައި" ހުރި ގެއަކަށެވެ. އެގެއިން ނުކުމެގެން އެރޭ ހެންވޭރުގައި ހުންނަ ގެއަކަށް ދިޔުމަށް ފަހު، ޔުމްނު އާއި އޭނާއާއެކު އުޅުނު މީހާ ދިޔައީ ހ. ފެންޓެނޯއީ އަށް ކަމަށް ފުލުހުން ބުނެ އެވެ.

އެ ގޭގެ ސިޑިމަތީގައި އެ މީހުން އުޅުނު ގޮތުގެ ބައެއް ވީޑިއޯތައް ފުލުހުން ނޫސްވެރިންނަށް ދެއްކި އެވެ. އޭގެ އެއްވެސް ވީޑިއޯއެއްގައި ފުންމާލާ މަންޒަރެއް ނެތެވެ.

ޔުމްނު ވެއްޓުނީ ގަސްދުގައި މީހަކު ކުރި ކަމަކުން ކަމަށް ބެލެވެން ނެތް ކަމަށް ފުލުހުން ބުނެފައިވެ އެވެ.