ބަހަލްގަމަށް ދިން ޓެރަރިސްޓު ހަމަލާއާ ގުޅިގެން މަރުވި މީހުންގެ އާއިލާތަކަށް ރައީސްގެ ތައުޒިޔާ

އަހުމަދު ނިހާން

23 އޭޕްރީލް 2025 - 15:05

0 comments

ކަޝްމީރުގެ ރަށެއްކަމަށްވާ ބަހަލްގަމްގެ ރިސޯޓެއްގައި ފަތުރުވެރިންނަށް އަމާޒުކޮށް އިއްޔެ ދިން ޓެރަރިސްޓު ހަމަލާގައި ފުރާނަ ގެއްލުނު މީހުންނާއި އަނިޔާ ލިބުނު އާއިލާތަކުގެ ހިތާމައިގައި ރާއްޖެއިން ބައިވެރިވާކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ރައީސް ޑރ. މުހައްމަދު މުއިއްޒު ވިދާޅުވީ، ޕަހަލްގަމް އަވަށަށް ދިން ނިރުބަވެރި ހަމަލާގައި އެތައް ބަޔަކު މަރުވެ، ޒަހަމްވި ހަބަރު އަޑުއެއްސެވީ ފުން ހިތާމައާއި ކުއްލި ހައިރާންކަމާއެކުގައިކަމަށެވެ. އަދި ދިވެހި ސަރުކާރުން އަބަދުވެސް ދެމިއޮންނާނީ ނިރުބަވެރިކަމާއި އެކަމާ ގުޅުންހުރި އެންމެހާ އަމަލުތަކާ ދެކޮޅަށްކަމަށް ރައީސް ވިދާޅުވިއެވެ.

ރައީސް ވަނީ ޕަހަލްގަމުގައި ދިން ހަމަލާގައި މަރުވި މީހުންގެ ޢާއިލާތަކަށް ތައުޒިޔާ ދަންނަވާފަ އެވެ.

ކަޝްމީރުގެ އިންޑިއާ ފުލުހުންނާ ހަވާލާދީ ރޮއިޓާސްއިން ބުނި ގޮތުގައި މިއީ ފަތުރުވެރިންނަށް އަމާޒުކޮށް ދިން ޓެރަރިސްޓް ހަމަލާއެކެވެ.

މި ހަމަލާދިނީ އިންޑިއާގެ ކިބައިން ކަޝްމީރު މިނިވަންކުރުމަށް ހަނގުރާމަ ކުރާ ހަތިޔާއެޅި ޖަމާއަތްތަކުގެ ތެރެއިން ޖަމާއަތެއްގެ ބައެކެވެ. މި ހަމަލާތައް ދިންކަމަށް ވަނީ ބަޑިންނެވެ.

ހަމަލާދިނީ ޖަންމޫ ކަޝްމީރުގެ ބަހަލްގަމް ސަރަހައްދުގެ ތަނެއްކަމަށްވާ މީޑޯ ނަމަކަށް ކިޔާ ރިސޯޓަކަށެވެ. މި ރިސޯޓް އޮންނަނީ ބަހަލްގަމްގެ މީހުން ދިރިއުޅޭ ސަރަހައްދާ ފަސް ވަރަކަށް ކިލޯމީޓަރު ދުރުގައެވެ.