އިމާރާތުން ވެއްޓުނު ޒުވާނާގެ މައްސަލާގައި ދެ ވަޒީރަކާ މަޖިލީހުން ސުވާލުކުރަނީ

މަރިޔަމް އަނާ

24 އޭޕްރީލް 2025 - 10:54

0 comments

މާލޭގެ އިމާރާތެއްގެ މަތިން ޒުވާން އަންހެނަކު ވެއްޓުނު ކަމަށް ބުނާ ވެއްޓުނު ހާދިސާއާ ގުޅިގެން ސުވާލުކުރުމަށް ހޯމް މިނިސްޓަރު އަލީ އިހުސާން އާއި އިޖުތިމާޢީ އަދި ޢާއިލީ ތަރައްޤީއާއި ބެހޭ ވަޒީރު ޑރ. އައިޝަތު ޝިހާމް ރައްޔިތުންގެ މަޖިލީހަށް ހާޒިރުކޮށްދިނުމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް އެދިވަޑައިގެންފި އެވެ.

މީކާއިލް އެކްސްގައި ކުރެއްވި ޕޯސްޓެއްގައި ވިދާޅުވީ އެއް ބާއްވަތެއްގެ މައްސަލަތަކުގައި ތަފާތުކުރުން ގެންގުޅުމާއި ޔުމްނުގެ ހާދިސާއާ ގުޅިގެން އޭނާގެ ހަށިގަނޑާއި އަންނައުނުން ސާމްޕަލް ނެގުމުގައި ލަސްކުރުމާ ގުޅޭ ގޮތުން ސުވާލު ކޮށްފައިވާ ކަމަށެވެ.

"އެއްބާވަތެއްގެ މައްސަލަތަކުގައި ގޭގެ ނަމާއި ތުހުމަތުކުރެވޭ މީހުންގެ ވަނަވަރު ހާމަކުރުމުގައި ފުލުހުން ތަފާތުކުރުން ގެންގުޅެނީ ކީއްވެތޯ އަދި 18 އޭޕްރިލް 2025 ވަނަ ދުވަހު ޝިކާރައަކަށްވީ އަންހެން ކުއްޖާގެ ހަށިގަނޑާއި އަންނައުނުން ސާމްޕަލް ނެގުމުގައި ލަސްކުރީ ކީއްވެތޯ ސުވާލުކޮށްފިން،" އޭނާ ވިދާޅުވި އެވެ.

މީކާއިލް އިހުސާންއާ ކުރައްވަން ހުށަހެޅުއްވި ސުވާލަކީ ޔުމްނުގެ ހާދިސާއާ ގުޅިގެން ކުށުގެ ވެއްޓާއި ގުޅުންހުރި ގޭގެ ނަން ހާމަނުކޮށް ސިއްރު ކުރުމާއި ތުހުމަތު ކުރެވޭ މީހުންގެ ވަނަވަރު ހާމަ ކުރުމުގައި ތަފާތުކުރުން ގެންގުޅުމާ ގުޅޭ ގޮތުންނެވެ.

"18 އޭޕްރިލް 2025 ވީ ހުކުރު ދުވަހު، އުސް އިމާރާތަކުން ހެންވޭރު ގެއެއްގެ ފުރާޅުމައްޗަށް އަންހެން ކުއްޖަކު ވެއްޓުނު މައްސަލައާ ގުޅިގެން ފުލުހުން ބޭއްވި ސިއްރު ނޫސްވެރިންގެ ބައްދަލުވުމުގައި، ކުށުގެ ވެއްޓާއި ގުޅުންހުރި ގޭގެ ނަން ހާމަނުކޮށް ސިއްރު ކުރީ ކީއްވެތޯ؟ އަދި މިފަދަ މައްސަލަތަކުގައި ތުހުމަތު ކުރެވޭ މީހުންގެ ވަނަވަރު ހާމަކުރުމުގައި ފުލުހުން ތަފާތުކުރުން ގެންގުޅެނީ ކީއްވެތޯ،" މީކާއިލް ކުރެއްވި ސުވާލުގައި ވިދާޅުވި އެވެ.

ޖެންޑާ މިނިސްޓަރު އާއިޝަތު ޝިހާމްއާ މީކާއިލް ކުރައްވަން ހުށަހެޅި ސުވާލަކީ މިދިޔަ ހުކުރު ދުވަހު ޔުމްނު ވެއްޓުނު ހާދިސާގައި އޭނާގެ ސާމްޕަލް ނެގުމުގައި ކަނޑައެޅިފައިވާ މުއްދަތު ފަހަނައަޅައި ދިޔުމާ ގުޅިގެންނެވެ.

"ޖިންސީ ކުށުގެ ގާނޫނުގައި ބަޔާންކޮށްފައިވާފަދަ ކުށެއް ހިންގި ކަމަށް ތުހުމަތު ކުރެވޭ މައްސަލައިގައި ކުށުގެ ޝިކާރައަކަށްވީ ފަރާތުގެ ހަށިގަނޑާއި އަންނައުނުން ސާމްޕަލް ނަގައި، އެ ސާމްޕަލްގެ ފޮރެންސިކް ތަހުލީލް ކުރުމަކީ ލާޒިމުކަމަކަށްވީ ހިނދު، 18 އޭޕްރިލް 2025 ވީ ހުކުރު ދުވަހު އުސް އިމާރާތަކުން ހެންވޭރު ގެއެއްގެ ފުރާޅުމައްޗަށް އަންހެން ކުއްޖާ ވެއްޓުނު މައްސަލައިގައި އެ އަންހެން ކުއްޖާގެ ސާމްޕަލް ނެގުމުގައި ކަނޑައެޅިފައިވާ މުއްދަތު ފަހަނައަޅައިދިޔައީ ކީއްވެތޯ،" އޭނާގެ ސުވާލުގައި ވިދާޅުވި އެވެ.

ފުލުހުން ބުނި ގޮތުގައި ތަހުގީގަށް މިހާތަނަށް އެނގެނީ އެ ކުއްޖާ އަމިއްލައަށް ވެއްޓުނީ ކަމަށެވެ.

ފުލުހުން ކިޔައިދިން ގޮތުގައި ހާދިސާ ހިނގުމުގެ ކުރިން، އެ ރޭ އެ އަންހެން ކުއްޖާއާ އެކު އިތުރު ހަތް މީހަކު އުޅުނެވެ. އެއީ، ޖުމުލަ ތިން އަންހެނުންނާއި ފަސް ފިރިހެނުންނެވެ.

އެ މީހުން އެރޭ 12:30 އެހާކަންހާއިރު ގޮސް ވަނީ މާލޭގެ މެދުތެރޭގައި ހުރި ގެއަކަށެެވެ. އެ ގެއިން އެ މީހުން ނުކުތީ 3:40 އެހާކަންހާއިރެވެ. އެއަށް ފަހު، އޭގެ ތެރެއިން ހަތަރު މީހަކު 4:00 އެހާކަންހާއިރު ގޮސް އަމީނީ މަގުގައި ހުރި ގެއަކަށް ކަމަށް ފުލުހުން ބުންޏެވެ.

އޭގެ 10 ވަރަކަށް މިނެޓު ފަހުން އެ ގެއިން ދެން ނުކުތީ އަންހެން ކުއްޖާއާއި، އޭނާއާ އެކު އުޅުނު ފިރިހެން ކުއްޖެކެވެ. އެ ދެ މީހުން މަގުމަތީގައި އެ ވަގުތު އުޅުނީ ވެސް ހުސްފަޔާއެވެ.

އަންހެން ކުއްޖާ ބުރުޒު މަގުގައި ހުންނަ ހ. ފެންޓެނޯއީއަށް ވަތް ފަހުން، އޭނާގެ ފަހަތުން ފިރިހެން ކުއްޖާ ވެސް ދުވެފައި ގޮސް އެގެއަށް ވަންނަ މަންޒަރު ސީސީޓީވީ ފުޓޭޖުން ފެނެއެވެ.