އިންޑިއާ ސިފައިން ރާއްޖޭގައި އެއްވެސް ހަތިޔާރެއް ނުގެންގުޅޭ: ގައްސާން

މަރިޔަމް އަނާ

06 މެއި 2025 - 14:15

0 comments

ރާއްޖޭގައި ތިބި އިންޑިއާ ސިފައިން ހަތިޔާރު ގެންގުޅެފައިނުވާ ކަމަށް ޑިފެންސް މިނިސްޓަރު މުހައްމަދު ގައްސާން މައުމޫނު ވިދާޅުވެއްޖެ އެވެ.

ގައްސާން މިހެން ވިދާޅުވީ މިއަދު މަޖިލީހަށް ހާޒިރުކޮށް ވަައިކަރަދޫ ދާއިރާގެ އެމްޑީޕީ މެމްބަރު ހުސެއިން ޒިޔާދު ކުރެއްވި ސުވާލަކަށް ޖަވާބުދެއްވަމުންނެވެ.

"އޭރު ހަރަކާތްތެރިވި އިންޑިއާ ސިފައިން އެއްވެސް ހަތިޔާރެއް ގެންގުޅެފައެއް ނުވޭ،" ޣައްސާން ވިދާޅުވި އެވެ.

ގައްސާން ވިދާޅުވީ ރާއްޖޭގައި ގާއިމުވެ ތިބި އިންޑިއާގެ ހުރިހާ ސިފައިން އަނބުރާ ފޮނުވާލާފައިވާ ކަމަށާއި ސިފައިން ފޮނުވާލީ ދެގައުމުގެ ދެމެދުގައި އޮތް ގާތް ގުޅުމުގެ ތެރެއިން ކަމަށެވެ.

މިނިސްޓަރު ވަނީ އިންޑިއާ ސިފައިން ފޮނުވާލި ތާރީހުތައްވެސް ހާމަކުރައްވާފަ އެވެ.

އިންޑިއާ ސިފައިން އަނބުރާ ފޮނުވާލި ތާރީހުތައް

ހަނިމާދޫ - އޭޕްރިލް 7، 2024ގައި 12 ސިފައިން
ހަނިމާދޫ - އޭޕްރިލް 9، 2024ގައި 13 ސިފައިން
ލ. ކައްދޫ - މެއި 7، 2024ގައި 13 ސިފައިން
ލ. ކައްދޫ - މެއި 9، 2024ގައި 12 ސިފައިން
ސ. ގަން - މާޗް 7، 2024ގައި 12 ސިފައިން
ސ. ގަން - މާރިޗު 9، 2024ގައި 12 ސިފައިން

ރާއްޖޭގައި ބޭރު ގައުމެއްގެ ސިފައިން ގާއިމުވެ ތިބި ނަމަ އެ ބަޔަކު ބޭލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

މި ސަރުކާރުގެ އިސް ސަފުގައި މިހާރު ތިއްބެވި ވެރިން، މިދިޔަ އެމްޑީޕީ ސަރުކާރުގައި މަގުތަކަށް އެއްވެ އެންމެ ގަދައަށް އަޑުއުފުލި ކަންކަމުގެ ތެރޭގައި އިންޑިއާ ސިފައިން ރާއްޖޭގައި ތިބުމުގެ މައްސަލަ ހިމެނެ އެވެ. 'އިންޑިއާ އައުޓް'ގެ ނަމުގައި އެއްވުންތައް އޭރު ބޭއްވިއިރު، އިދިކޮޅުގައި ތިއްބަވައިގެން ވިދާޅުވަމުން ގެންދެވީ:

ރާއްޖޭގައި ތިބި އިންޑިއާގެ ސިފައިންގެ އަދަދު ހާހުން ގުނޭނެ
ހަތިޔާރު އެޅި ސިފައިންނާއި ކުލަ ހެދުމުގައި ވެސް އިންޑިއާ ސިފައިން ރާއްޖޭގައި ހަރަކާތްތެރިވަމުންދޭ

ވެރިކަމާ ހަވާލުވުމަށް ފަހު މި ސަރުކާރުން ފުރަތަމަ ބުނަމުންދިޔައީ ރާއްޖޭގައި ތިބީ އިންޑިއާގެ 89 ވަރަކަށް ސިފައިން ކަމަށެވެ. ނަމަވެސް އިންޑިއާއާ އެކު ކުރި މަޝްވަރާތަކަށް ފަހު އެ ސިފައިން ރާއްޖެއިން ފޮނުވާލުމަށް މަސައްކަތް ފަށައި ޑިފެންސް މިނިސްޓްރީން ހާމަކުރި ގޮތުން ރާއްޖޭގައި ތިބީ ގާތްގަނޑަކަށް 76 ވަރަކަށް އިންޑިއާ ސިފައިންނެވެ.