މިތިބީ ވޯޓު ފޮށި ނުފެނިގެން؛ ހޯރަފުށީ ބޮޓްލިން ޕްލާންޓުން ވަކިކުރި މުވައްޒަފުން

އަލީ ރާޒީ

16 ޖުލައި 2025 - 15:07

1 comments

"މިތިބީ ވޯޓު ފޮށި ނުފެނިގެން" ކަމަށް ހއ. ހޯރަފުށީގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ ބޮޓްލިން ޕްލާންޓުގެ މަސައްކަތް ހުއްޓާލާ އެތަނުގެ މަސައްކަތް ކުރަމުން އަންނަ މުވައްޒަފުންގެ ތެރެއިން ވަޒީފާއިން ވަކިކުރި މީހުން ބުނެފި އެވެ.

ބޮޓްލިންގ ޕްލާންޓުން ފުރަތަމަ 7 މުވައްޒަފުން ވަކި މި އަހަރުގެ ޖޫން މަހުގެ 11 ވަަނަ ދުވަހު އެވެ. އަދި ދެވަނަ ބުރު ވަކިކުރި މީހުން ވަކިކުރީ ޖޫން މަހުގެ ފަހުކޮޅު އެވެ. އެއާއެކު އެތަނުން ވަޒީފާއިން ވަކިކުރި މީހުންގެ އަދަދު ވަނީ 15 އަށް އަރާފަ އެވެ.

ޕްލާޓުން ވަޒީފާ އިން ވަކިކުރި މީހުންގެ ފަރާތުން "ހޯރަ" އޮންލައިން އަށް މައުލޫމާތު ދިން މީހާ ބުނީ އެމީހުން ތިބީ އެކަތިކަޓެއްގައި ކަމަށާއި ވަކިކުރި މީހުންނާއި އެމީހުންގެ އާއިލާތަކަށް ދާއިރާގެ މެންބަރު އަލީ މޫސާ އާއި މުއިއްޒު ސަރުކާރު ގުޅިގެން ދިން "އަނިޔާ" ހަދާން ނުނެތޭނެ ކަމަށާއި އެކަމުގެ ބަދަލު ސަރުކާރަށް ދޭން ބޭނުންވަނީ "ވޯޓު ފޮށިން" ކަމަށެވެ.

"އަންނަ ކައުންސިލް އިންތިހާބަށް ސަރުކާރުން ދައްކާ މީހުނަށް ވޯޓު ނުދިނުމަށް މިހާރު ވާނީ ނިންމާފަ، ވޯޓުފޮށި ނުފެނިގެން މި ތިބީ ސަރުކާރަށް ނޫނެކޭ ބުނަން" އޭނާ ބުންޏެވެ.

ހޯރަފުށިން ވަޒީފާއިން ވަކިކުރި 15 މީހުން މިފަދައިން ބުނާއިރު ސަރުކާރުން އަންނަނީ އަންނަ އަހަރުގެ އޭޕްރީލްގެ ތެރޭގައި ބާއްވާ ލޯކަލް ކައުންސިލް އިންތިހާބަށް ތައްޔާރު ވަމުންނެވެ.

ހޯރަފުށީގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ އެ ބޮޓްލިން ޕްލާންޓުގެ މަސައްކަތް ހުއްޓާލައި އެ ތަނުން މުވައްޒަފުން ވަކިކުރުމުން އިދިކޮޅު އެމްޑީޕީން ވެސް ވަނީ ކަންބޮޑުވުން ފާޅުކޮށްފަ އެވެ.

ހޯރަފުށީގައި ގާއިމުކުރާ ބޮޓްލިން ޕްލާންޓަކީ އިންޑިއާ ސަރުކާރުގެ ހައި އިމްޕެކްޓު ކޮމިއުނިޓީ ޑިވެލޮޕްމެންޓު ޕްރޮޖެކްޓުގެ ދަށުން ހޯރަފުށި ކައުންސިލުން ހުށަހެޅި ޕްރޮޕޯޒަލާ އެއްގޮތަށް އެރަށުގައި ގާއިމުކުރާ ފެން ބަންދުކުރާ ޕްލާންޓެކެވެ.

އެ ޕްލާންޓު ހިންގުމަށް އެއްބަސްވެފައި އޮތީ ފެނަކަ އާއި ހޯރަފުށި ކައުންސިލް ގުޅިގެންނެވެ. ބޮޓްލިން ޕްލާންޓުގައި ހޯރަފުށި ކައުންސިލްގެ 40 ޕަސެންޓު ހިއްސާ އޮވެ އެވެ. ބާކީ ހިއްސާ އޮންނަނީ ފެނަކަ ކޯޕަރޭޝަންގެ އެވެ.

ބްޓޮލިން ޕްލާންޓުގެ މަސައްކަތް ނިމުމަކާ ގާތްވެފައި ވަނިކޮށް އެތަނުގެ މަސައްކަތް އެއްކޮށް ހުއްޓާލައި އެ ތަނުގައި މަސައްކަތް ކުރަމުންދިޔަ މުވައްޒަފުން ވަޒީފާއިން ވަކިކުރަން ފެނަކަ ކޯޕަރޭޝަނުން ނިންމި މައްސަލައިގައި ޝަރީއަތަށް ދާން ނިންމާފައިވާ ކަމަށް ހޯރަފުށި ކައުންސިލުން ވަނީ ބުނެފަ އެވެ.