މީޑިއާތައް ސަރުކާރުގެ ބާރުގެ ދަށަށް ގެންގޮސްފި: ސީޕީޖޭ

މަރިޔަމް އަނާ

18 ސެޕްޓެމްބަރ 2025 - 23:38

0 comments

ރައީސް ޑރ. މުޙައްމަދު މުއިއްޒު މީޑިއާ ބިލް ތަސްދީގު ކުރެއްވުމަކީ، މީޑިއާތައް ސަރުކާރުގެ ބާރުގެ ދަށަށް ގެނައުން ކަމަށް، ނޫސްވެރިކަމުގެ މިނިވަން ކަމަށް މަސައްކަތް ކުރާ އެމެރިކާގެ ޖަމިއްޔާ ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ)އިން ބުނެފި އެވެ.

ސީޕީޖޭ އިން އޭޝިއާ-ޕެސިފިކަށް ކަނޑައަޅާފައިވާ ރީޖަނަލް ޑިރެކްޓަރު، ބެހް ލީޔީ ވިދާޅުވީ މިއީ ނޫސްވެރިކަމުގެ މިނިވަންކަމާއި ޑިމޮކްރެސީއަށް ދިން ހަމަލާއެއް ކަމަށެވެ. އަދި މި ބިލު ރައީސް މުއިއްޒު ތަސްދީގު ކުރެއްވުމުން ނޫސްވެރިކަން ސަރުކާރުގެ ކޮންޓްރޯލްގެ ދަށަށް ގެނެސް، މީޑިއާގެ މިނިވަންކަން ރައްކާތެރިކޮށްދޭން ވެވަޑައިގެންނެވި ވައުދާއި ވެސް އެމަނިކުފާނު ހިލާފުވެފައިވާ ކަމަށް ވިދާޅުވި އެވެ.

އެ ގާނޫނަށް އުވާލައި ނޫސްވެރިކަމުގެ މިނިވަންކަން ރާއްޖޭގައި ހިމާޔަތްކޮށްދިނުމަށް ރީޖަނަލް ޑިރެކްޓަރު ވަނީ ރައީސް މުއިއްޒަށް ގޮވާލާފައިވެ އެވެ.

މީޑިއާ ބިލް މިއަދު ތަސްދީގު ކުރެއްވީ، އިސްލާހުތަކާ އެކު އެ ބިލް ފާސްކުރި ނަމަވެސް ކަންބޮޑުވުންތަކަށް ހައްލެއް ނުލިބޭތީ ތަސްދީގު ނުކުރައްވަން މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ވެސް އެދިފައި ވަނިކޮށެވެ.

އެމްއެމްސީ އާއި އެމްޖޭއޭ އިން ބުނެފައި ވަނީ ބިލް އުވައިލަން އެދި ކޯޓަށް ދާނެ ކަމަށެވެ. އެ ގާނޫނަށް އަމަަލުކުރަން ފެށުމުން މޯލްޑިވްސް ބްރޯޑްކާސްޓިން ކޮމިޝަންގެ އިދާރީ މުވައްޒަފުންނާއި ވަސީލަތްތައް އެ ގާނޫނުގެ ދަށުން އުފައްދާ ކޮމިޝަނަށް ވާރުތަވި ނަމަވެސް، އެ ކޮމިޝަނުގެ މެންބަރުންގެ ވެސް މަގާމު މިހާރު ވަނީ ގެއްލިފަ އެވެ.

މީޑިއާ ރެގިއުލޭޝަން ގާނޫނު، ބިލެއްގެ ގޮތުގައި އޮތް އިރު ނޫސްވެރިކަމުގެ އެ ބިލު ފާސްކުރުމާ ދެކޮޅަށް ނޫސްވެރިން ގެންދިޔައީ ސިލްސިލާކޮށް އިހުތިޖާޖް ކުރަމުންނެވެ. އެ ކަންބޮޑުވުންތަކާ އެކު އެޓާނީ ޖެނެރަލް އެ ބިލަށް ގިނަ އިސްލާހުތަކެއް ހުށަހެޅުއްވި އެވެ.