އެފްޑީސީ ފްލެޓުތަކުގެ ތަޅުދަނޑި ހަވާލުކުރަން ފަށައިފި

އަލީ ރާޒީ

29 ސެޕްޓެމްބަރ 2025 - 16:16

0 comments

ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި އިމާރަތްކުރި 4،000 ފްލެޓުގެ ތަޅުދަނޑި ހަވާލުކުރަން އިއްޔެ ފަށައިފި އެވެ.

އިއްޔެ އަމާން އުދަރެސް ޓަވަރު14 ގައި ބޭއްވި ރަސްމިއްޔާތެއްގައި ޓަވަރުގައި ފުރަތަމަ ދިރިއުޅެން ފަށާ ފަރާތްތަކަށް ތަޅުދަނޑި ހަވާލުކޮށްދެއްވީ އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް އެވެ.

އެފްޑީސީން ވަނީ ބޮޑެތި ތަކެއްޗާއި ފަރުނީޗަރު އެރުވުމަށް ހާއްސަ އިންތިޒާމްތަކެއް ހަމަޖައްސައިފަ އެވެ. އެ ހިދުމަތް ހޯދުމަށް މިއަދުން ފެށިގެން ޕޯޓަލް މެދުވެރިކޮށް ދުރާލާ ބުކިން ހެދުމުގެ ފުރުސަތު ލިބިގެންދާނެ އެވެ. އޭގެ ތެރެއިން އިމާރާތުގައި ތަކެތި ބެހެއްޓުމަށް ހާއްސަކޮށްފައިވާ ޖާގަ ބުކްކުރުމާއި އެ ސަރަހައްދުގައި ތަކެތި ބެހެއްޓުމުގެ ފުރުސަތު ލިބިގެންދާނެ އެވެ.

"ޓަވަރުތަކުގައި މީހުން އާބާދުކުރުމުގެ މަރުހަލާ މިގޮތަށް ކުރިއަށް ގެންދިއުމުގެ މައިގަނޑު މަގުސަދަކީ އާއިލާތައް ޓަވަރަށް ބަދަލުވަމުންދާއިރު ޓަވަރުގެ އާއްމު ސަރަހައްދުތަކުގައި ތޮއްޖެހުން ކުޑަކޮށް، ފަސޭހަ އަދި އެކަށީގެންވާ ރޭވުންތެރި ގޮތެއްގައި މި މަރުހަލާ ފުރިހަމަކުރުމެވެ،" ބަޔާނުގައިވެ އެވެ.

އެ ކުންފުނިން ވަނީ ޓަވަރުތަކުގައި ދިރިއުޅޭ މީހުންނަށް މުހިއްމު މައުލޫމާތުތަކެއް ލިބޭނެ "އަމާން އަތްމަތީ ފޮތް" ނަމުގައި ވަކި ފޮތެއް ވެސް ނެރެފަ އެވެ.

ފްލެޓުތައް ލިބޭ މީހުންނާއެކު އެއްބަސްވުމުގައި ސޮއިކޮށްފައިވާއިރު ޑައުން ޕޭމެންޓު ދެއްކުމުގެ އިންތިޒާމު ވެސް ޕޯޓަލް މެދުވެރިކޮށް ވަނީ ހަމަޖައްސައިފަ އެވެ.

އެފްޑީސީ ފްލެޓުތަކަށް ކަނޑައަޅާފައިވާ ކުލި:

ދެ ކޮޓަރީގެ އެޕާޓުމެންޓަކަށް މަހު ކުއްޔަށް 7،000ރ. އަދި މެއިންޓެނެންސްއަށް 1،000ރ.އާ އެކު މަހަކު ޖުމްލަ 8،000ރ.؛ ޑައުންޕޭމެންޓަށް 15،000ރ.
ތިން ކޮޓަރީގެ އެޕާޓުމެންޓަށް މަހު ކުއްޔަށް 9،000ރ. އަދި މެއިންޓެނެންސްއަށް 1،500ރ.އާ އެކު މަހަކު ޖުމްލަ 10،500ރ.؛ ޑައުންޕޭމެންޓަށް 25،000ރ.

ގެދޮރުވެރިޔާ ސްކީމުގެ ދަށުން އިންޑިއާގެ ދެ ކުންފުންޏަކާ ހަވާލުކޮށްގެން އެފްޑީސީ އިން އަންނަނީ 32 ޓަވަރެއް ތަރައްގީ ކުރަމުންނެވެ.