ފުރަތަމަ 15ގައި ފިތުރު ޒަކާތަށް 5.48 މިލިއަން ލިބިއްޖެ

ހުސެން ރަޝީދު

08 މާޗް 2026 - 15:01

0 comments

ޒަކާތް ބަލައިގަންނަނީ: ފުރަތަމަ 15ގައި ފިތުރު ޒަކާތަށް 5.48 މިލިއަން ލިބިއްޖެ

މި ރޯދަ މަހުގެ ފުރަތަމަ 15 ގައި ފިޠުރު ޒަކާތުގެ ގޮތުގައި 5.4 މިލިޔަން ރުފިޔާ ލިބިއްޖެ އެވެ.

މޯލްޑިވްސް ޒަކާތު ހައުސް އިން މިއަދު ބުނީ މި ރޯދަމަހުގެ ފުރަތަމަ 15 ގައި ފިތުރު ޒަކާތުގެ ގޮތުގައި ލިބުނު ޖުމްލަ އަކީ 5،482،171ރ. ކަމަށެވެ.

މިއީ މިދިޔަ އަހަރު އެ މުއްދަތުގައި ލިބުނު އަދަދާ އަޅާ ބަލާއިރު، 23 ޕަސެންޓް އިތުރު އަދަދެކެވެ. މިދިޔަ އަހަރު އެ މުއްދަތުގައި ލިިބިފައި ވަނީ 4,460,199ރ. އެވެ.

ޒަކާތު ހައުސް އިން ވަނީ އޮންލައިންކޮށް، ހަތް ޕްލެޓްފޯމެއް މެދުވެރިިކޮށް ޒަކާތް ބަލައިގަތުމުގެ އިންތިޒާމު ހަމަޖައްސައިފަ އެވެ. އެއީ:

ދިރާގު މޯބައިލް އެޕްއާއި ދިރާގު ޕޭ ވެބްސައިޓް
އުރީދޫ އެމް ފައިސާ މޯބައިލް އެޕް
މޯލްޑިވްސް އިސްލާމިކް ބޭންކުގެ މޯބައިލް އެޕް
ބޭންކް އޮފް މޯލްޑިވްސްގެ މޯބައިލް އެޕް
ފަހިޕޭ މޯބައިލް އެޕް
އަވަސް މޯބައިލް އެޕް
ބަނޑޭރި ޕޭ ވެބްސައިޓް

ފާހަގަކުރެވޭ ގޮތުގައި، އޮންލައިންކޮށް ޒަކާތް ދައްކަން އަހުލުވެރި ނޫން މީހުންނަށް ޚާއްސަކޮށް، މި އަހަރު ވަނީ ކޭޝް ކާޑުން ވެސް ޒަކާތް ބަލައިގަންނަން ފަށާފައެވެ.

ޒަކާތު ހައުސްއިން ބުނި ގޮތުގައި، އަތޮޅުތެރޭގެ ރަށްރަށުގައި، އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކުން ފިތުރު ޒަކާތް ދައްކާނީ އެ ރަށެއްގެ ލޯކަލް ކައުންސިލު އިދާރާއަށެވެ.

ނަގުދު ފައިސާއިންނާއި ގޮވާމުން ޒަކާތް ބަލައިގަތުމަށް ކައުންސިލުތަކުން ބޭނުންކުރާނީ އެކަމަށް ޓަކައި ޚާއްސަކޮށްގެން ތައްޔާރުކޮށްފައިވާ ފިޠުރު ޕޯޓަލް ކަމަށް ޒަކާތު ހައުސްއިން ވަނީ ބުނެފަ އެވެ.