ފަރަށް އެރި ބޯޓުން ގެއްލުނު މީހާ މަރުވެފައި އޮއްވާ ފެނިއްޖެ

އިސްމާއިލް ރިޒާ

12 ނޮވެމްބަރ 2025 - 00:17

0 comments

ކާށިދޫ ފަރަށް އެރި ބޯޓުން ގެއްލުނު މީހާ މަރުވެފައި އޮއްވާ ފެނިއްޖެ ކަމަށް ފުލުހުން ބުނެފި އެވެ.

މޯލްޑިވްސް ޕޮލިސް ސާވިސްއިން ބުނީ ފަރަށް އެރި، ފައިސަލާ ބޯޓުން ގެއްލިގެން ހޯދަމުން ދަޔައީ، ބަނގުލަދޭޝްގެ ރައްޔިތެއް ކަމުގައިވާ އެމްޑީ އަލަމްގީރު، 30، އެވެ.

އޭނާ މަރުވެފައި އޮއްވައި ފެނުނީ އެ ބޯޓު އަޑިޔަށް ދިޔަ ސަރަހައްދުގެ މޫދުންނެވެ.

"އެ މީހާ ކ. ކާށިދޫ ހެލްތު ސެންޓަރަށް ގެންދިޔަ އިރުވެސް ނިޔާވެފައިވާ ކަމަށް ހެލްތު ސެންޓަރުން ވަނީ މައުލޫމާތު ދީފައި،" ފުލުހުން ބުންޏެވެ.

ފުލުހުން ބުނި ގޮތުގައި، އެ ބޯޓު ފަރަށް އެރިކަމުގެ ރިޕޯޓު ލިބުނީ މިރޭގެ 7:52 ހާކަންހާއިރު އެވެ. އޭރު އެ ބޯޓުގައި ތިބީ 11 ފިރިހެނުން ކަމަށާއި އެއީ ފަސް ދިވެއްސަކާއި ހަ ބިދޭސީން ކަމަށް ފުލުހުން ބުންޏެވެ.

"ފައިސަލް" ބޯޓު ފަރަށް އެރުމާ ގުޅިގެން އޭގައި ހުރި ގިނަ މުދާތަކެއް ކަނޑަށް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރު ސަމާލުވުމަށް ފުލުހުން ވަނީ އިލްތިމާސްކޮށްފަ އެވެ.