ސަރުކާރަށް ދެ އަަހަރު؛ ތަރައްގީގައި ހޯރަފުށި އަދު އޮތީ ހަރީފުގެ ހިޔަނީ ގައި!

އަލީ ރާޒީ

17 ނޮވެމްބަރ 2025 - 09:34

0 comments

ހޯރަފުށީ ކައުންސިލްގެ ރައީސް ވަހީދު

ތަރައްގީގައި ހޯރަފުށި އަދުއޮތީ ހަރީފުގެ ހިޔަނީ ގައި ކަމަށް އެ ރަށު ކައުންސިލްގެ ރައީސް މުހައްމަދު ވަހީދު ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒުގެ ސަރުކާރަށް ދެ އަހަރު ވުމާއި ގުޅިގެން ކުރެއްވި ޕޯސްޓެއްގައި ވަހީދު ވިދާޅުވީ ސަރުކާރަށް ދެ އަހަރުވީއިރު ތަރައްގީގައި ހޯރަފުށި އަދު އޮތީ ހަރީފުގެ ހިޔަނީ ގައި ކަމަށާއި ރަށަށް ވެރިވެފައިވަނީ މާޔޫސީ މޫސުމެއް ކަމަށެވެ.

ވަހީދު އިތުރަށް ވިދާޅުވީ ތަރައްގީގެ ބާރު ދުވެލީގައި ކުރިއަރަމުންއައި ހޯރަފުށި މިވަނީ މަޑުޖެހި ބުރެކި ޖެހިފަ ކަމަށެވެ.

"ރައްޔިތުންގެ އުއްމީދީ ހޮސްޕިޓަލްގެ މަސައްކަތް އޮތް ހިސާބު ދެކިލައްވާށެވެ. ހުޅުވުމަށް ތައްޔާރު ވަމުންއައި ބޮޱްލިން ޕްލާންޱަށް ވީގޮތް ވިސްނަވާށެވެ .ގެސްޓް ހައުސް ޒޯންއަށް ދާއިމީ ކަރަންޓް ނަރުދާމާގެ ޚިދުމަތް ނުދެވި 2 އަހަރުވީ އެވެ." ވަހީދު ލިޔުއްވާފައި ވެއެވެ.

ރައީސް މުއިއްޒުގެ ސަރުކާރަށް 24 މަސްވެ ފަސް އަހަރުގެ ދައުރު ނިމެން ދާއިރު ހޯރަފުށީ ދާއިރާގެ އުމްރާނީ ތަރައްގީގެ ކުރިމަގާއިމެދު ޖަވާބު ބޭނުން ގިނަ ސުވާލުތަކެއް މިހާރު ވަނީ އުފެދިފަ އެވެ. ވައުދު ވުމަކީ ސަމާސާއަކަށް މި ސަރުކާރުގެ ބައެއް ވެރިން މިއަދު ހަދައިފި އެވެ. އަދި އިންތިހާބުވި މީހުން ގޮނޑިތަކުގައި ހަމަޖެހިލުމަށްފަހު ވައުދު ލިސްޓް ނަނގާލީ ޑަސްބިނަށެވެ. އަދި ބައެއް ވައުދަކީ މީހަކު ބުނެގެން މީހަކަށް ވީ ވައުދުކަމަށް ބުނެ ވެސް އެކަމުން އަންނަނީ ބޯދަމައިގަންނަމުން ނެވެ.