ކޯޓްތަކުގައި ހުރި މައްސަލަތައް އަވަސް ކުރަން ޓާސްކްފޯހެއް

ހުމާ ނަސީމް

09 ފެބުރުއަރީ 2026 - 11:28

0 comments

ލަސްވެފައިވާ އިންސާފު، ނުވަތަ ކޯޓުތަކުގެ ބެކްލޮގު ފިލުވަން ހާއްސަ ޓާސްކް ފޯހެއް އެކުލަވާލަން ނިންމާފައިވާ ކަމަށް އުއްތަމަ ފަނޑިޔާރު އަބްދުއްޣަނީ މުހައްމަދު ރޭ ވިދާޅުވެއްޖެ އެވެ.

ޝަރުއީ ދާއިރާގެ މި އަހަރުގެ "ޤަޟާޢީ އަހަރު" ގެ އިފްތިތާޙީ ރަސްމިއްޔާތުގައި އޭނަ ވިދާޅުވީ އިންސާފު ލަސްވުމަކީ އިންސާފު ނުލިބުން ކަމަށެވެ. އެހެންވެ މި އަހަރު ޝަރުއީ ދާއިރާއިން ހާސިލު ކުރަން ބޭނުންވާ އެންމެ މުހިންމު އެއް ލަނޑުދަނޑިއަކީ ގިނަ ދުވަސްވެފައިވާ މައްސަލަތައް ނިންމާ ބެކްލޮގް ފިލުވާލުން ކަމަށް އެވެ.

ޣަނީ ވިދާޅުވި ގޮތުގައި މި ވަގުތު ވަރަށް ގިނަ ދުވަސްވެފައިވާ މައްސަލަތައް އެބަހުރި ކަމަށާއި އެ އަދަދު 13،032 އަށް އަރާ ކަމަށެވެ.

އުއްތަމަފަނޑިޔާރު ވިދާޅުވީ މައްސަލަތަކުގައި އިންސާފު ގާއި މުކުރުމަކީ ވަރަށް އިސްކަން ދޭން ބޭނުންވާ ކަމެއް ކަމަށާއި މައްސަލަތަކަށް އިންސާފު ގާއިމުކުރާނީ މި އަހަރު އަލަށް ރަޖިސްޓްރީވާނެ ކަމަށް ލަފާކުރެވޭ 21،000 މައްސަލަ ވެސް މަޑުޖެހުމެއް ނެތި ކުރިއަށް ގެންދެވޭނެ ގޮތަށް ރާވައިގެން ކަމަށެވެ.

އެހެންވެ އެކަމަށް މަގުފަހި ކުރުމަށްޓަކައި ވަކި ޓާސްކު ފޯހެއް މާދަމާ އެކުލަވާލެވޭނެ ކަމަށް ވިދާޅުވި އެވެ. އަދި ޓާސްކު ފޯހުގެ ކޮންމެ މަސައްކަތެއް ވެސް ކުރިއަށް ގެންދެވޭނީ ވަރަށް ހަރުދަނާކަމާ އެކު ކަމަށް އުއްތަމަފަނޑިޔާރު ވިދާޅުވި އެވެ.

މި މަސައްކަތުގެ ތެރެއިން، އިޖުތިމާއީ ކަންބޮޑުވުމެއް ކަމަށްވާ ޝަރީއަތް ނިންމެންދެން ބަންދު ކޮށްފައިވާ މީހުންގެ މައްސަލަތައް ވެސް ހަލުވިކަމާ އެކު ނިމިގެންދާނެ ކަމަށް އުއްތަމަ ފަނޑިޔާރު ޣަނީ ވިދާޅުވި އެވެ.

"އަޅުގަނޑުމެންގެ އަމާޒަކީ، 2026 ވަނަ އަހަރު ނިމިގެންދާއިރު، ދިވެހިރާއްޖޭގެ ޝަރުއީ ދާއިރާއަކީ، އިންސާފު ނުލިބި ލަސްވެފައިވާ މައްސަލައިން ނުވަތަ ބެކްލޮގުން ސަލާމަތްވެފައިވާ ހަރުދަނާ ޒިންމާދާރު ދައިރާއަކަށް ހެދުން،" އެމަނިކުފާނު ވިދާޅުވި އެވެ.