ޑްރަގް މައްސަލައެއްގައި ޒުވާނަކު 75 އަހަރަށް ޖަލަށް

އަލީ ރާޒީ

25 ފެބުރުއަރީ 2026 - 12:02

0 comments

ފުވައްމުލަކުގައި މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރަމުން ދިޔަ ނެޓްވޯކެއްގައި ހަރަކާތްތެރިވެ، އެ ވިޔަފާރިން ހޯދި 3 މިލިއަނަށް ވުރެ ގިނަ ރުފިޔާ ގެންގުޅުނު މީހަކު 75 އަހަރަށް ޖަލަށް ލުމަށް އިއްޔެ ހުކުމްކޮށްފި އެވެ.

އިއްޔެ އެ ހުކުމް އިއްވާފައި ވަނީ ފުވައްމުލައް، ދޫޑިގަން ގަސްދޮށުގޭ، އަބްދުލްބާސިތު، 28، ގެ މައްޗަށެވެ. އޭނަ އިއްވި ޖަލު ހުކުމާ އެކު 300،000ރ. އިން ޖޫރިމަނާ ވެސް ކޮށްފައިވެ އެެވެ.

ފުލުހުންގެ ވެބްސައިޓްގައި ބުނެފައިވާ ގޮތުގައި، 75 އަހަރަށް ޖަލަށް ލުމަށާއި 3 ލައްކަ ރުފިޔާއިން ޖޫރިމަނާކުރުމަށް އިއްޔެ ހުކުމްކޮށްފައިވަނީ އަބްދުލްބާސިތު، 28، ދޫޑިގަން ގަސްދޮށުގެ/ފުވައްމުލަކުގެ މައްޗަށެވެ.

ހުކުމުގެ އިތުރު ތަފްސީލެއް ފުލުހުން ނުދެ އެވެ.

ފުލުހުން ބުނި ގޮތުގައި، އަބްދުލްބާސިތުގެ ނަމުގައިވާ ބޭންކް އެކައުންޓުތަކަށް އެކި ފަރާތްތަކުން 3 މިލިއަނަށް ވުރެ ގިނަ ރުފިޔާ އާއި 19،000އަށް ވުރެ ގިނަ އެމެރިކާ ޑޮލަރުގެ (ގާތްގަނޑަކަށް 3 ލައްކަ ރުފިޔާ)ގެ މުއާމަލާތްކޮށްފައިވާ ކަމަށެވެ. އެ މުއާމަލާތްތަކަކީ މަސްތުވާތަކެތީގެ ވިޔަފާރިކޮށްގެން ހޯދާފައިވާ ފައިސާ ކަމަށް ފުލުހުން ބުންޏެވެ.