ވީއައިއޭ އަށް ޖެއްސީ އެމެރިކާގެ ސިވިލިއަން އެއާކްރާފްޓެއް

އަހުމަދު ނަޖީބު

02 މާޗް 2026 - 14:25

0 comments

ވެލާނާ އިންޓަނޭޝަނަލް އެއާޕޯޓަށް ޖެއްސި ކަމަށް ބުނާ އެމެރިކާގެ މަތިންދާ ބޯޓު

އެމެރިކާ އާއި އިޒްރޭލު އިސްވެ އޮވެ އިރާނަށް ހަމަލާދެމުންދާ މި ދަނޑިވަޅުގައި، ދާދި ފަހުން ވެލާނާ އެއާޕޯޓުން އެމެރިކާގެ ހަނގުރާމަމަތީ ބޯޓަކަށް ތެޔޮ އަޅައިދިން ކަމަށް ބުނެ ފަތުރަމުންދާ ހަބަރު ރައީސް ޑރ. މުހައްމަދު މުއިއްޒު މިއަދު ދޮގުކުރައްވައިފި އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވެލާނާ އިންޓަނޭޝަނަލް އެއާޕޯޓުގައި އެމެރިކާގެ ހަނގުރާމަ މަތީ ބޯޓެެއް ޖައްސާފައިވާ މަންޒަރު ދައްކުވައިދޭ ފޮޓޯއާ ވީޑިއޯއެއް މީސްމީޑިއާގައި ދައުރުވަމުންދާތީ އެކަމާއި ގުޅިގެން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ރައީސް ވިިދާޅުވީ އެކަމާއި ގުޅޭ މައުލޫމާތު ވަގުތުން ހޯދާފައިވާނެ ކަމަށާއި އެއީ އެމެރިކާގެ ސިވިލިއަން ބޯޓެއް ކަމަށެވެ.

"އެއީކީ ހަނގުރާމަމަތީ މަތިންދާބޯއްޓެއް ނޫން، އަޅުގަނޑުވެސް ތި މައުލޫމާތު ލިބިގެން ހޯދިއިރު އެއީ ސިވިލިއަން އެއާކްރާފްޓެއް، އެމީހުންގެ އެއާކްރާފްޓެއް، އޮތީ ހުއްދަވެސް ނަގާފަ މާކުރިން، ޖެނުއަރީ 17 ވަނަ ދުވަހު ރާއްޖެއަށް އަންނަން. ދެން އެމީހުން އެރޭ ބޯޓު ފުރައިގެން ދިޔައީ ސީޝެލްސް އިން ރާއްޖެއައިސް ޖައްސާފަ ތައިލެންޑަށް، އެއީ ހަނގުރާމައިގެ އެއްޗެއް ނޫން،" ރައީސް ވިދާޅުވި އެވެ.

ސޯޝަލް މީޑިއާގައި ބައެއް ފަރާތްތަކުން އަންނަނީ ވީއައިއޭ އަށް ޖައްސާފައިވާ މަތިންދާ ބޯޓު ކަމަށް ބުނާ ބޯޓުގެ ފޮޓޯވެސް ދައުރު ކުރަމުންނެވެ.