މަޝްރޫއުތައް ހުއްޓާލި ރަށްތަކުގެ ތަފްސީލު ދޭން އެމްޑީޕީން އެދެފި

އަހުމަދު ނަޖީބު

05 މާޗް 2026 - 10:51

0 comments

ކައުންސިލްތަކުގެ ހުރަސްއެޅުމާއެކު ރާއްޖޭގެ 57 ރަށެއްގައި މަޝްރޫތަކުގެ މަސައްކަތް ހުއްޓާލުމުން، އެ ރަށްތަކުގެ މައުލޫމާތު ހޯދުމަށް އާރްޓީއައި ހުށަހެޅުމުން އަދިވެސް އެ މައުލޫމާތު ނުލިބޭ ކަމަށާއި އެ މައުލޫމާތު ހާމަކުރަން ރައީސް ޑރ. މުހައްމަދު މުއިއްޒަށް ކެރިވަޑައިނުގަންނަވާނެ ކަމަށް އެމްޑީޕީއިން މިއަދު ބުނެފި އެވެ.

ރަށުގެ ތަރައްގީއަށްޓަކައި ގިނަ ރޭވުންތަކެއް ހުރި ނަމަވެސް، ސަރުކާރުގެ ވައުދުތައް ފުއްދުމަށް 57 ރަށެއްގެ ކައުންސިލުން އެއްބާރުލުން ނުދޭ ކަމަށް، ރައީސް ޑރ. މުހައްމަދު މުއިއްޒު މިފަހުން ވަނީ ވިދާޅުވެފަ އެވެ. އަދި އޭގެ ސަބަބުން މަޝްރޫއުތައް ނުފެށި މަޑުޖައްސާލާފައިވާ ކަމަށް އެ މަނިކުފާނު ވިދާޅުވި އެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީން ކައުންސިލް އިންތިހާބަށް ކަނޑައަޅާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ 57 ރަށެއްގެ ކައުންސިލަކުން މަޝްރޫއުތައް ކުރިއަށް ގެންދަން ހުރަސްއަޅާފައިވާ ކަމަށް މުއިއްޒު ފާހަގަކުރައްވާފައިވާތީ އެ ކައުންސިލުތަކުގެ މައުލޫމާތު ހޯދުމަށް އާރްޓީއައި ހުށަހަޅާފައިވާ ކަމަށެވެ.

ނަމަވެސް އޭނާ ވިދާޅުވީ މިއަދާ ހަމައަށް ވެސް ސަރުކާރުން މުއިއްޒު ފާހަގަކުރައްވާ ކައުންސިލްތަކުގެ މައުލޫމާތު ފޯރުކޮށްދީފައި ނުވާ ކަމަށާއި އެކަން ނުވެސް ކުރެވޭނެ ކަމަށް ޗެލެންޖު ކުރައްވާ ކަމަށެވެ.

"އަޅުގަނޑުމެންނަށް ފާހަގަވެގެންދިޔަ އެންމެ ފަހުން ރައީސުލްޖުމްހޫރިއްޔާ ފާހަގަކުރެއްވި ރާއްޖޭގެ 57 ރަށެއްގެ މަޝްރޫއު ކައުންސިލްގެ ހުރަސްއެޅުމާއެކު ހުއްޓާލާފައިވާ ކަމަށް. މި ދެންނެވި ރަށްތަކުގެ މައުލޫމާތު ހޯދުމަށްޓަކައި އަޅުގަނޑުމެންވާނީ އާރްޓީއައި އިން ތަފްސީލް ހޯދުމަށްޓަކައި ހުށަހަޅާފައި. މިއަދާ ހަމައަށް އައިއިރުގައި އަޅުގަނޑުމެންނަށް އެ މައުލޫމާތެއް ނުލިބޭ،" ވަހީދު ވިދާޅުވި އެވެ.

ވަހީދު ވިދާޅުވީ ސަރުކާރުގެ އެކި މުއައްސަސާތަކުގެ މުވައްޒަފުންނާއި ވަސީލަތްތައް ބޭނުންކޮށްގެން، މީގެ ކުރީގެ އިންތިހާބެއްގައި ނުފޫޒު ނުފޯރުވާ ވަރަކަށް ސަރުކާރުން މި އިންތިހާބަށް ނުފޫޒު ފޯރުވަމުން ދާ ކަމަށެވެ.