ޑިސްޓްރިބިއުޝަން ފޮށިތަކުގައި ޕޯސްޓަރު ހަރުނުކުރަން އެދިއްޖެ

ހުނައިދާ ޔާސިރު

04 މާޗް 2026 - 11:20

0 comments

ސްޓެލްކޯގެ ސަބްސްޓޭޝަން އިމާރާތްތަކުގެ ފާރުތަކާއި، ޑިސްޓްރިބިއުޝަން ފޮށިތަކުގައި ޕޯސްޓަރާއި ސްޓިކާ ހަރުނުކުރުމަށް އެކުންފުނިން އެދިއްޖެ އެވެ.

ސްޓެލްކޯއިން ބުނީ، އެކުންފުނިން ހިދުމަތްދޭ އިމާރާތްތަކާއި، ސަބްސްޓޭޝަން އިމާރާތްތަކުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި އެކި ފަރާތްތަކުން ޕޯސްޓަރާއި، ސްޓިކާ ފަދަ ތަކެތި ތަތްކުރަމުންދާކަން ފާހަގަކުރެވިފައިވާކަމަށެވެ.

ސަބްސްޓޭޝަން އިމާރާތްތަކުގެ ބޭރުގައި ހަރުކޮށްފައިވާ އިންޒާރު ނުވަތަ ނުރައްކާ ބޯޑުތަކުގެ މަތީގައި ސްޓިކާ އަދި ޕޯސްޓަރު ތަތްކުރުމުގެ ސަބަބުން ރައްކާތެރިކަމާއެކު ދެމެހެއްޓެނެވި ގޮތެއްގައި ކަރަންޓުގެ ހިދުމަތް ދިނުމަށް ސްޓެލްކޯއިން ކުރަމުންދާ މަސައްކަތްތަކަށް ހުރަސް އެޅެމުންދާކަންވެސް އެކުންފުނިން ވަނީ ފާހަގަކޮށްފަ އެވެ.

އެހެންކަމުން ހިދުމަތްދޭ އިމާރާތްތަކާއި، ސަބްސްޓޭޝަންތަކުގެ އިމާރާތުގެ ފާރުތަކުގެ ބޭރުގައި އަދި ޑިސްޓްރިބިއުޝަން ފޮށިތަކުގެ ބޭރުގައި ޕޯސްޓަރު، ސްޓިކާ އަދި މިނޫނަސް އެއްވެސް އެއްޗެއް ތަތްނުކުރުމަށް ސްޓެލްކޯއިން ވަނީ އެދިފަ އެވެ.

އަންނަ އޭޕްރީލް މަހު އޮންނަ ލޯކަލް ކައުންސިލް އިންތިހާބުގައި ވާދަ ކުރާ ކެންޑިޓޭޑުންގެ ޕޯސްޓަރު ހަރުކުރުން މިފަހުން ވަނީ އިތުރުވެފަ އެވެ.