ކައުންސިލް އިންތިހާބު: ވޯޓުލުމަށް 588 ފޮށި ބަހައްޓާނެ

އިބްރާހިމް އިމާދު

04 މާޗް 2026 - 15:36

0 comments

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓުލުމަށް 588 ވޯޓު ފޮށި ބަހައްޓާނެކަމަށް އިލެކްޝަންސް ކޮމިޝަނުން ބުނެފި އެވެ.

އިލެކްޝަންސް ކޮމިޝަނުން އާންމުކޮށްފައިވާ ތަފާސްހިސާބުތަކަށް ބަލާއިރު، އަތޮޅުތެރޭގައި 322 ވޯޓު ފޮށި ބެހެއްޓުމަށް ވަނީ ނިންމާފަ އެވެ. މާލެ ސަރަޙައްދަށް ބަލާއިރު، މާލެ އާއި ހުޅުމާލެ އަދި ވިލިމާލެ ހިމެނޭހެން ޖުމުލަ 240 ވޯޓު ފޮށި ބަހައްޓާނެ އެވެ. މީގެ ތެރޭގައި ހިމެނެނީ މާލޭގައި ބަހައްޓާ 180 ފޮށްޓާއި، ހުޅުމާލޭގައި ބަހައްޓާ 51 ފޮށީގެ އިތުރުން ވިލިމާލޭގައި ބަހައްޓާ 9 ފޮށްޓެވެ. މާލެ ސަރަޙައްދުގައި ބަހައްޓާ ފޮށިތަކުގެ ތެރެއިން 98 ފޮށްޓަކީ މާލޭގެ ރައްޔިތުން ވޯޓުލުމަށް ހާއްސަ ފޮށިތަކެވެ. އަދި އަތޮޅުތަކާއި ސިޓީތަކަށް ނިސްބަތްވާ، މާލޭގައި ދިރިއުޅޭ ރައްޔިތުން ވޯޓުލުމަށް 142 ފޮށި ބެހެއްޓުމަށް ވަނީ ހަމަޖެހިފަ އެވެ.

އަތޮޅުތަކުގެ ތެރެއިން އެންމެ ގިނަ ވޯޓު ފޮށި ބެހެއްޓުމަށް ހަމަޖެހިފައިވަނީ އައްޑޫ ސިޓީ އާއި ރ އަތޮޅު އަދި ހއ އަތޮޅުގަ އެވެ. އެގޮތުން އައްޑޫ ސިޓީގައި 29 ފޮށި، ރ އަތޮޅުގައި 25 ފޮށި އަދި ހއ އަތޮޅުގައި 23 ފޮށި ބެހެއްޓުމަށް ވަނީ ނިންމާފަ އެވެ. މީގެ އިތުރުން ރިސޯޓުތަކުގައި 21 ވޯޓު ފޮށި ބަހައްޓާއިރު، ޖަލުތަކުގައި ޖުމުލަ 5 ފޮށި ބަހައްޓާނެ އެވެ. ޖަލުތަކުގެ ތެރެއިން މާފުށި ޖަލުގައި 2 ފޮށި ބަހައްޓާއިރު، އައްސޭރި ޖަލާއި ހުޅުމާލެ ޖަލު އަދި ދޫނިދޫ ޖަލުން ކުރެ ކޮންމެ ތަނެއްގައި އެއް ފޮށި ބަހައްޓާނެ އެވެ.

އިލެކްޝަންސް ކޮމިޝަނުން ބުނި ގޮތުގައި، ވޯޓު ފޮށި ބެހެއްޓުމަށް ބޭނުންވާ އަދަދަށް މީހުން ރަޖިސްޓްރީވެފައި ނުވާތީ، މިފަހަރުގެ އިންތިޚާބުގައި ރާއްޖެއިން ބޭރުގެ އެއްވެސް ޤައުމެއްގައި އަދި ސިނާއީ މަސައްކަތްކުރާ އެއްވެސް ރަށެއްގައި ވޯޓު ފޮށި ނުބެހެއްޓުމަށް ވަނީ ނިންމާފަ އެވެ.

މި އިންތިހާބުގައި 2960 ކެންޑިޑޭޓުން ވާދަކުރެއެވެ. އަދި 294,937 މީހުންނަށް ވޯޓުލުމުގެ ޙައްގު ލިބިގެންވެއެވެ. އިންތިހާބު އޮންނަނީ އޭޕްރިލް މަހުގެ 4 ވަނަ ދުވަހު އެވެ.

މި އިންތިހާބުގައި ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިހާބު އަދި ރައްޔިތުންގެ ހިޔާލު ހޯދުމުގެ އާންމު ވޯޓު އޮންނާނެ އެވެ.