މޮރިޝަސް އިން ގުޅުން ކަނޑާލުމަކީ މޮޔަ ނިންމުމެއް: ރައީސް

މައިރާ އަހުމަދު

02 މާޗް 2026 - 11:48

0 comments

ޗާގޯސް މައްސަލައިގައި ރާއްޖެ އިން ވަކާލާތު ކުރަމުން އަންނަނިކޮށް، މޮރިޝަސް އިން ރާއްޖެއާ ސިޔާސީ ގުޅުން ކަނޑާލުމަކީ ވަރަށް މޮޔަކަމެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރައީސް މުއިއްޒު ވަނީ މޮރިޝަސްގެ ރައީސް ދަރަމްބީރު ގޮކޫލްއަށް ކުޑައިމީސްކޮށް ވަރަށް ބޮޑަށް ފާޑުވިދާޅުވެފަ އެވެ.

"މޮރިޝަސް އިން ރާއްޖެއާ ސިޔާސީ ގުޅުން ކަނޑާލުމަކީ ވަރަށް ތާކުންތާކު ނުޖެހޭ ވަރަށް އިމެޗުއާ، ނައީވް ކަމެއް. އެ ނިންމުން އެހެން ނިންމުމަކުންނެއް ހަގީގަތް ބަދަލެއް ނުވޭ. ރާއްޖެއާ ސިޔާސީ ގުޅުން ކަނޑާލިޔަސް މޮރިޝަސްއަށް ހައްގު ނޫން ތަނެއް މޮރިޝަސްއަށް ހައްގެއް ނުވާނެ،" ރައީސް މުއިއްޒު ވިދާޅުވި އެވެ.

އޭގެ އިތުރުން ރައީސް މުއިއްޒު ވިދާޅުވީ، މޮރިޝަސް އިން ރާއްޖެއާ ގުޅުން ކަނޑާލީ "މަޝްވަރާ ކުރުމެއް ނެތި" ކަމަށެވެ. އަދި ތަކުރާރުތައް މުއިއްޒު ވިދާޅުވީ ޗާގޯސްއަށް ދައުވާ ކުރުމާމެދު ރާއްޖޭގެ ސްޓޭންޑު ދުވަހަކު ވެސް ބަދަލެއް ނުވާނެ ކަމަށެވެ.

ރައީސް ވިދާޅުވީ މިކަމުން ރާއްޖެ އަށް ކުރާނެ ވަކި އަސަރެއް ނެތް ކަމަށާއި ގައުމު ދާނީ މޯލްޑިވްސް ފަސްޓް ޕޮލިސީގެ ދަށުން ކުރިއަށް ކަމަށެވެ.

ޗާގޯސް ޖަޒީރާގެ ރަށްތައް އިނގިރޭސިވިލާތުން މޮރިޝަސްއަށް ހަވާލުކުރަން ނިންމާފައިވާ ނިންމުމާ ރާއްޖެއިން ދެކޮޅު ހަދާކަން ހާމަކޮށް އެކަމާ ދެކޮޅަށް މަސައްކަތް ކުރާތީ އާއި އެ ރަށްތަކުގެ މިލްކުވެރިކަމާ މެދު ދިވެހި ސަރުކާރުން ދައުވާކުރަމުންދާތީ ރާއްޖެއާ ސިޔާސީ ގުޅުން ކަނޑާލަން މިދިޔަ ހުކުރު ދުވަހު މޮރިޝަސްއިން ވަނީ ނިންމާފަ އެވެ.

ރާއްޖެއާ ސިޔާސީ ގުޅުން ކަނޑާލަން މޮރިޝަސްގެ ކެބިނެޓުން ނިންމީ މިދިޔަ މަހުގެ 27 ގަ އެވެ. އެ ގައުމުން ރާއްޖެއާ ސިޔާސީ ގުޅުން ގާއިމުކުރީ ޖެނުއަރީ 15، 1981 ގަ އެވެ.