ރާއްޖެއަށް ތެލާއި ކާބޯތަކެތި ގެނައުމުގައި ދައްޗެއް ނެތް: ރައީސް

މައިރާ އަހުމަދު

02 މާޗް 2026 - 11:12

0 comments

މެދުއިރުމަތީގައި ހިނގަމުންދާ ހަނގުރާމައާ ގުޅިގެން ރާއްޖެ އަށް ތެލާއި ކާބޯތަކެތި ލިބުމުގައި އެއްވެސް ދަތިކަމެއް ކުރިމަތިވާނެ ކަމަށް އަދި ނުބެލެވޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ކުރިއަށް އޮތް ތަނުގައި ރާއްޖެއަށް ތެޔޮ ނުލިބޭނެ ހާލަތެއް އައިސްދާނެކަމުގެ ކަންބޮޑުވުމެއް އަދި ކާބޯތަކެތި ނުލިބިދާނެކަމުގެ ކަންބޮޑުވުމެއް ވެސް ނެތް ކަމަށެވެ.

ރައީސް ވިދާޅުވީ މެދުއިރުމަތީގެ ހާލަތާ އެކު ވިސްނަންޖެހޭ ކަންތައްތަކަކީ ތެލާއި ކާބޯތަކެއްޗާއި ފަތުރުވެރިކަން ކަމަށާއި އެ ތިން ދާއިރާގެ ކަންތައް ގާތުން ބަލަމުން އަންނަ ކަމަށެވެ.

"ތެލަށް ބަލާއިރުގައި، ތެލަށް އެއްވެސް ކަހަލަ ކަންބޮޑުވުމެއް އަދި އަޅުގަނޑުމެންނަކަށް ދިމައެއް ނުވޭ. އަޅުގަނޑުމެންނަށް އިރާދަކުރެއްވިޔާ ހަމަ ވަރަށް ރަނގަޅަށް އެކަން އޮތީ ހަމަޖެހިފައި. އެއްވެސް ވަރަކަށް، ތެޔޮ، ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް، އަދި ނެތް އެއްވެސް ކަހަލަ ކަންބޮޑުވާން ޖެހޭ އެއްވެސް ކަމެއް،" ރައީސް ވިދާޅުވި އެވެ.

ރައީސް ވިދާޅުވީ އެއްވެސް ދަތިކަމެއް ނެތި ރާއްޖެ އަށް ކާބޯތަކެތި ވެސް ލިބޭނެ އިންތިޒާމު ހަމަޖެހިފައިވާ ކަމަށެވެ.

ރައީސް ވަނީ މި ހަނގުރާމައާ ގުޅިގެން ރާއްޖެއަށް ކުރާ އަސަރު ކުޑަކުރުމަށް ކެބިނެޓު މިނިސްޓަރުން ހިމެނޭ ހާއްސަ ކޮމިޓީއެއް އުފައްދަވައިފަ އެވެ.