ތެލަށް ނުޖެހޭނެކަމުގެ ޔަގީންކަން އެބައޮތް: ސައީދު

މައިރާ އަހުމަދު

03 މާޗް 2026 - 11:52

0 comments

މެދުއިރުމަތީގައި މިހާރު ކުރިއަށްދާ ހަމަނުޖެހުންތަލާ ގުޅިގެން ތެލަށް ނުޖެހޭނެކަމުގެ ޔަގީންކަން އެބައޮތް ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ސައީދު ވިދާޅުވީ ބައިނަލްއަގުވާމީ މާކެޓުތަކުގައި އިއްޔެ ތެލުގެ އަގު %25-%30އަށް އުފުލުނު ކަމަށެވެ.

މިނިސްޓަރު ވިދާޅުވީ މެދުއިރުމަތީގައި ހަމަނުޖެހުމެއް އުފެދިއްޖެ ނަމަ އަބަދު ވެސް އެންމެ އަވަހަށް އަސަރު ކުރަނީ ތެލުގެ އަގަށް ކަމަށެވެ.

މިހާރުގެ ހާލަތު އޮތް ގޮތުން ތަކެތީގެ އަގަށް ބަދަލު އަންނަމުންދާ ކަމަށާއި ރާއްޖެއިން ފިޔަވަޅުތައް އަޅަނީ އެކަންތަކަށް ވިސްނައިގެން ކަމަށް ވެސް މިނިސްޓަރު ވިދާޅުވި އެވެ.

"ފްލޯޓިން އާބާދީއަކާއި ރާއްޖޭގެ އާބާދީ އާއި އަންނަ ފަތުރުވެރިންގެ އަދަދު އެއްކޮށްލީމާ ކުރީގެ ހާލަތްތަކަށް ބަލާއިރު ކޮންސިއުމް ކުރާ މީހުންގެ އަދަދު ވަނީ އިތުރުވެފައި،" ސައީދު ވިދާޅުވި އެވެ. "އެހެންވެ މި ހަގީގަތްތަކަށް ވެސް ބަލައިގެން މުސްތަގުބަލަށް ކަންތައްތަކެއް އެބަ ރޭވޭ. މީގެ ކުރިން މުދާ ރައްކާ ކުރާ މިންވަރަށް ވުރެ އިތުރަށް މުދާ ރައްކާ ކުރެވޭނެ ގޮތްތަކެއް."

އޭނަ ވިދާޅުވީ ރާއްޖެއަށް މުދާ ގެންނަން އިތުރު ރޫޓުތައް ވެސް ބަލަމުން އަންނަ ކަމަށެވެ.

"ރައްޔިތުންގެ ފުޑް ސެކިއުރިޓީ އާއި ކޮމޮޑިޓީ ސެކިއުރިޓީއަށްޓަކާ އިކޮނޮމިކް ރިއަލިޓީ އާއި ސްޓޯރޭޖާއި ލޮޖިސްޓިކްސްއާ، މި ކަންތައް ރާއްޖޭގައި ދެމެހެއްޓެނިވި ގޮތެއްގައި ކަށަވަރު ކުރުމަށް ސަރުކާރުން އެބަ ކަންތައްތަކެއް ކުރިއަށް ގެންދޭ،." މިނިސްޓަރު ވިދާޅުވި އެވެ.