ރޯދަ މަހު ކެފޭ ރެސްޓޯރެންޓު ހުޅުވޭނީ މެންދަމު 3 ޖަހަންދެން

މަރިޔަމް އަނާ

09 ފެބުރުއަރީ 2026 - 23:28

0 comments

ރޯދަ މަހު ރޭގަނޑު ކެއިން ބުއިމުގެ ހިދުމަތްދޭ ތަންތަނާއި، މުދާ ވިއްކާ ތަންތަން ހުޅުވާފައި ބެހެއްޓޭނެ ގަޑިތައް އިކޮނޮމިކް މިނިސްޓްރީން ހާމަކޮށްފި އެވެ.

އެ މިނިސްޓްރީން ބުނި ގޮތުގައި، ރޯދަމަހު ކެއިން ބުއިމުގެ ހިދުމަތްދޭ ރެސްޓޯރަންޓުތަކާއި ކެފޭ ފަދަ ތަންތަން ހުޅުވާފައި ބެހެއްޓޭނީ 17:30އިން ދަންވަރު 03:00އަށެވެ. ޝައްވާލު މަހުގެ ފުރަތަމަ ހަތް ދުވަހު ފަތިހު 04:30އިން ދަންވަރުއާ ދެމެދެވެ.

އޭގެއިތުރަށް، މާދަމާއިން ފެށިގެން މުދާ ވިއްކާ ތަންތަން ހުޅުވާފައި ބެހެއްޓޭނީ، ފަތިހު 05:30 އިން ދަންވަރު 01:00އާ ހަމައަށް ކަމަށް އެ މިނިސްޓްރީން ވަނީ ބުނެފަ އެވެ. ރޯދަމަހާއި ޝައްވާލުމަހުގެ ފުރަތަމަ ހަތް ދުވަހު ވެސް އެ ތަންތަން ހުޅުވާފައި ބެހެއްޓޭނީ އެ ގަޑިތަކުގައި ކަމަށް މިނިސްޓްރީން ވަނީ ބުނެފަ އެވެ.

މީހުން ދިރިއުޅޭ ރަށްތަކުގައި ހިންގާ މުދާ ވިއްކާ ތަންތަން ވެސް ހުޅުވާފައި ބެހެއްޓޭނީ އެ ގަޑިތަކުގައި ކަމަށް ބުނެ، އިކޮނޮމިކް މިނިސްޓްރީން ވަނީ އެ ގޮތްތަކަށް އަމަލުކުރަން ފަށަން އަންގާފަ އެވެ.

ރޯދަ މަހަކީ، އެހެން މަސްމަހާ ހިލާފަށް ހުރިހާ ދާއިރާއަކުންވެސް ހިދުމަތް ދޭ ގަޑިތަކަށް ބަދަލު އަންނަ މަހެކެވެ. ކަލަންޑަރުގައިވާ ގޮތުން މިއަހަރުގެ ރޯދަ މަސް ދިމާވަނީ މިމަހުގެ 18 ވަނަ ދުވަހަށެވެ.