ތެލުގެ އަގު މުރާޖައާކޮށްދޭން ޓެކްސީ ޑްރައިވަރުން ގޮވާލައިފި

ހުނައިދާ ޔާސިރު

07 މާޗް 2026 - 22:22

0 comments

ތެޔޮ އަގުބޮޑު ކުރުމުން ދޭހަކޮށްދެނީ ސަރުކާރުން ސިލްސިލާކޮށް ޓެކްސީ ޑްރައިވަރުންނަށް ދަތިކުރަމުންދާ ދަތިކުރުމަށް އިތުރުކުރި "ބޮޅެއް" ގެ ގޮތުގައި ކަމަށް މޯލްޑިވްސް ޑްރައިވަރސް އެސޯސިއޭޝަނުގެ ރައީސް ވިދާޅުވެއްޖެ އެވެ.

މެދުއިރުމަތީގައި ކުރިއަށްދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިފައި ވާތީ މި މަހުގެ 5 ވަނަ ދުވަހުން ފެށިގެން އެސްޓީއޯ އިން ވަނީ 13.50ރ. ވިއްކަމުން އައި ޕެޓްރޯލް ލީޓަރެއް 16.01ރ. އަށް ބޮޑުކޮށްފަ އެވެ. އެއީ 2.51ރ. ގެ އިތުރުވުމުކެވެ.އަދި ޑީސަލް ލީޓަރެއްގެ އަގު ވަނީ 13.92ރ. އިން 17.54ރ. އަށް ބޮޑުކޮށްފަ އެވެ. އެއީ 3.62ރ. ގެ އިތުރުވުމެކެވެ.

މިކަމާއި ގުޅިގެން ކުރި ޕޯސްޓުގައި ޑްރައިވަރުންގެ އެސޯސިއޭޝަނުގެ ރައީސް އިބްރާހިމް ނިޔާޒު ވިދާޅުވީ ހަނގުރާމައާއި ގުޅިގެން ދުނިޔޭގެ ކަންކޮޅުތަކުގެ މުއްސަނދިން ރާއްޖެ އައިސް ޕްރައިވެޓް ޖެޓްތަކުން އެއާޕޯރޓް ފުރާލާފައިވާ ކަމަށާއި އަދި ސަރުކާރުން ތެލުގެ އަގު ބޮޑުކުރީ އެއްމަސް ދުވަހުގެ ތެޔޮ ސްޓޯކޮށްފައި ހުރިކަމަށް ރައީސް ޑރ. މުހައްމަދު މުޢިއްޒު ވިދާޅުވިތާ ދެ ދުވަސްފަހުން ކަމަށެވެ.

ތެޔޮ އަގުބޮޑު ކުރުމުން ދޭހަކޮށްދެނީ ހާލަތުގެ ނާޖާއިޒު ފައިދާ ނެގުން ކަމުގައި އޭނާ ވަނީ ސިފަކުރައްވާފަ އެވެ.

"ތެޔޮ އަގުބޮޑު ކުރުމުން ދޭހަކޮށްދެނީ ސަރުކާރުން ސިލްސިލާކޮށް ޓެކްސީ ޑްރައިވަރުންނަށް ދަތިކުރަމުންދާ ދަތިކުރުމަށް އިތުރުކުރި "ބޮޅެއް" ގެ ގޮތުގައި." ނިޔާޒް ވިދާޅުވި އެވެ.

މީގެ އިތުރުން ނިޔާޒް ވަނީ ތެލުގެ އަގު މިހާ ބޮޑުތަނުން އުފުލާފައިވާ އުފުލުން މުރާޖައާ ކުރަން ސަރުކާރަށް ގޮވާލާފަ އެވެ.