ހޯރަފުށީ ކައުންސިލް ކަޕް: ހޯރަ 22 ދެއްކީ ހިތްވަރު، ތަފާތު ދެއްކީ ދަންމަރުގެ އިމްރާން!

އަބްދުﷲ މައުރޫފް

15 ސެޕްޓެމްބަރ 2026 - 11:05

0 comments

ހއ.ހޯރަފުށީ ކައުންސިލް އިދާރާއިން އިންތިޒާމްކޮށްގެން ބާއްވާ "ހޯރަފުށީ ކައުންސިލް ކަޕް 2026" ގައި ރޭ ކުޅުނު މެޗުގައި ހޯރަ 22 މައްޗަށް 4-0 ގެ ނަތީޖާއަކުން ކާމިޔާބު ހޯދައި، ދަންމަރު ޔުނައިޓެޑް ހަމަޖެހިލައިފި އެވެ.

ދަންމަރުން ރޭ މުޅި މެޗް ކޮންޓްރޯލް ކުރަމުން ދިޔައިރު އެޓީމުން ތަފާތު ދެއްކީ މެޗްގެ މޮޅު ކުޅުން ތެރިއަކަށް ހޮވުނު އަލީ އިމްރާން އެވެ. އިމްރާން ވަނީ ރޭ ހޯރަ 22 ކޮޅަށް 3 ގޯލް ޖަހައިފަ އެވެ.

މިރޭ ކުޅޭ މުބާރާތުގެ 3 ވަނަ މެޗުގައި 22 ސްޕޯޓްސް ކްލަބް ނިކުންނާނީ އެފްސީ ފްރިގޭޓަރ ޔަންގް އާއި އެވެ.

މި މުބާރާތުގެ ޗެންޕިއަން ޓީމަށް 60000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފަވާއިރު ދެ ވަނަ އަށް އަންނަ ޓީމަށް ދެނީ 25000 ރުފިޔާ އެވެ.

މި މަހުގެ 13 އިން 26 އަށް ބާއްވާ މި މުބާރާތުގައި ވާދަކުރާ ޓީމް ތަކަކީ:

ދަންމަރު ޔުނައިޓެޑް
22 ސްޕޯޓްސް ކްލަބް
އެފްސީ ފްރިގޭޓަރ
ހޯރަ 22
އެފްސީ ފްރިގޭޓަރ ޔަންގް

މި މުބާރާތް ބޭއްވުމުގެ މަގުސަދަކީ ފުޓްބޯޅަ ކުޅޭ ޒުވާނުންގެ ހުނަރު ދައްކާލައި، ހުނަރު އިތުރަށް ތަރައްގީކޮށް ފުޓްބޯޅައިން ރަނގަޅު މުސްތަގުބަލެއް ހޯދައިދިނުމާއި، ކުޅުންތެރިން އަދި ފުޓްބޯޅަ ޓީމްތައް އުފެއްދުމުގެ މަސައްކަތް ކުރާ އަމިއްލަ ފަރާތްތަކުގެ މެދުގައި ކުޅިވަރުގެ ތެރެއިން އެކުވެރިކަން ބަދަހިކުރުމާއި، އެންމެންނަކީ ވެސް ސިއްހީ ގޮތުން ދުޅަހެޔޮ ބަޔަކަށް ހެދުމެވެ.

ޓީމްތަކުން ބޮޑެތި ތައްޔާރީތަކެއް ވެފައިވާ މި މުބާރާތުގެ ފައިނަލް ކުޅޭނީ މި މަހު 26 ވަނަ ދުވަހު ގެ ރޭ 20:30 ގައި އެވެ.