ބަޔަކަށް ނާޖާއިޒު މަންފާ ލިބޭގޮތަށް ރަސްމާލެ ކުއްޔަށް ދެވިގެން ނުވާނެ: ޝަމްހީދު

ހުނައިދާ ޔާސިރު

23 ސެޕްޓެމްބަރ 2026 - 10:10

0 comments

ރަސްމާލޭގައި ވޯޓާފްރަންޓް އަދި މެރީނާއެއް ތަރައްގީކުރަން ޔޫއޭއީގެ ޑިވެލޮޕަރެއް ކަމުގައިވާ އީގަލް ހިލްސްއަށް އެ ރަށް ކުއްޔަށް ދެވިގެން ނުވާނެ ކަމަށާއި އެކަމާ ދެކޮޅު ހަދަން ޖެހޭ ކަމަށް ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހްމަދު ޝަމްހީދު ވިދާޅުވެއްޖެ އެވެ.

ޝަމްހީދު މިހެން ވިދާޅުވެފައި މިވަނީ ރަސްމާލޭގައި ވޯޓާފްރަންޓާއި މެރީނާއެއް ތަރައްގީކުރަން 20 ބިލިއަން ޑޮލަރުގެ މަޝްރޫއެއް ފެށުމަށް ޔޫއޭއީގެ ކުންފުންޏެއް ކަމަށްވާ އީގަލް ހިލްސްއާއެކު ސޮއިކޮށްފައި ވަނިކޮށެވެ. ސަރުކާރުން މިފަހުން އީގަލް ހިލްސްއާ އެކު ސޮއިކުރީ 20 ބިލިއަން ޑޮލަރު (309 ބިލިއަން ރުފިޔާ)ގެ މަޝްރޫއެއްގަ އެވެ.

ޝަމްހީދު އެކްސް ގައި ވިދާޅުވީ ގައުމުގެ އިގްތިސާދީ ކުރިއެރުމަށް މިފަދަ ބޮޑެތި އިންވެސްޓްމަންޓްތައް ބޭނުންތެރިވިޔަސް، ވަކި ފަރާތްތަކަށް ނާޖާއިޒު މަންފާ ލިބޭގޮތަށް އަދި ދައުލަތަށް ގެއްލުންވާ ގޮތަށް އެކުލާވާލާ މިފަދަ އެއްބަސްވުންތަކަށް ނޫނެކޭ ބުނަން ޖެހޭ ކަމަށެވެ.

"ރާއްޖޭގެ ގާނޫނުއަސާސީގައި، ސަރުކާރު ޖަވާބުދާރީ ކުރުވުމުގެ އެންމެ މަތީ ޒިންމާ ރައްޔިތުންގެ މަޖިލީހާ މަތިކޮށްފައިވާއިރު، މަޖިލީހަށް ވެސް ސިއްރުން ދައުލަތުގެ މިފަދަ އަގުހުރި މުދާ ވިއްކައި ނުވަތަ ކުއްޔަށް ދޫކުރެވިގެން ނުވާނެ،" އޭނާ ވިދާޅުވި އެވެ.

ޝަމްހީދު މިހެން ވިދާޅުވި އިރު ދައުލަތުގެ މީޑިއާ، ޕީއެސްއެމްގެ "ރާއްޖެމިއަދު" ޕްރޮގްރާމުގައި ރޭ ވާހަކަދައްކަވަމުން ފިނޭންސް މިނިސްޓަރު ހަސަން ޒަރީރު ވިދާޅުވީ މިއީ ރިސޯޓު ހެދުމަށް ރަށްތައް ދޫކުރާ އުސޫލުން، ލީސް އެގްރީމެންޓެއްގެ ދަށުން ކުރިއަށްގެންދާ މަޝްރޫއެއް ކަމަށާއި ބައިނަލްއަގްވާމީ ފެންވަރުގެ ކުންފުންޏަކާއެކު ހެދި މި އެއްބަސްވުމުގެ ސަބަބުން، ރާއްޖެއާމެދު ބޭރުގެ އިންވެސްޓަރުންގެ އިތުބާރު އިތުރުވެގެންދާނެ ކަމަށެވެ.

"ރާއްޖޭގައި ވަރަށް ގިނަ އިންވެސްްޓާސް ވަރަށް ގިނަ ޕްރޮޕަޓީސްތައް މިހާރު ވެސް އެބަ ހިންގާ. ރިސޯޓުތައް ވެސް އެބަ ހިންގާ، ބޮޑެތި، 200-300 ޑޮލަރުގެ ރިސޯޓް ޕްރޮޕަޓީތައް އެބަ ޑިވެލޮޕްކުރޭ. އެ ޕްރޮޕަޓީތައް ވެސް މި ޑިވެލޮޕް ކުރެވެނީ ގާތްގަނޑަކަށް 99 އަހަރާ ހަމައަށް، ރާއްޖޭގެ މިހާރުގެ ލީގަލް ފްރޭމްވޯކް ތެރެއިން 99 އަހަރާ ހަމައަށް ލީސްކޮށްގެން މި ޑިވެލޮޕްެމެންޓަކީ ވެސް ހަމައެ އުސޫލުން [ހެދި އެއްބަސްވުމެއް] އެއްވެސް ގޮތަކަށް މިއީ ރާއްޖޭގެ އެއްވެސް ބިމެއް، އެންމެ ބިންކޮޅެއް ވެސް ވިއްކާލެވޭނެ ގޮތަށް ހިންގޭ ޕްރޮޖެކްޓެއް ނޫން،" ޒަރީރު ވިދާޅުވި އެވެ.

މިހާރު ވެސް ރާއްޖޭގައި ގިނަ އިންވެސްޓަރުން އެކި މަޝްރޫއުތައް ހިންގާކަން ޒަރީރު ފާހަގަކުރެއްވިއެވެ. އެގޮތުން 300 މިލިއަން ޑޮލަރަށް އަރާ ބޮޑެތި ރިސޯޓުތައް ތަރައްގީކުރާކަން ފާހަގަކުރައްވައި މިނިސްޓަރު ވިދާޅުވީ އެ ތަންތަން ތަރައްގީކުރަނީ ރާއްޖޭގެ ގާނޫނުތަކާއި ގަވައިދުތަކުގެ ދަށުން 99 އަހަރުގެ މުއްދަތަކަށް ލީސްކޮށްގެން ކަމަށެވެ.

ހައުސިން މިނިސްޓްރީ އާއި ޔޫއޭއީގެ އީގަލްސް ހިލްސްއިން ނެރުނު ގުޅިފައިވާ ބަޔާނެއްގައި ބުނީ، ޔޫއޭއީގެ އަބޫދާބީގައި މަރުކަޒު ކޮށްފައިވާ އީގަލް ހިލްސް ކުންފުނިން ދިވެހި ސަރުކާރާ އެކު އެ އެއްބަސްވުމުގައި ސޮއިކުރީ މިއަދު ކަމަށެވެ. އެ ކުންފުނީގެ ފަރާތުން އެއްބަސްވުމުގައި ސޮއިކުރެއްވީ ޗެއާމަން މުަހައްމަދު އަލައްބާރު އެވެ. އެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ހައުސިން މިނިސްޓަރު ޑރ. އަބްދުﷲ މުއްތަލިބެވެ.

މަޝްރޫއުގެ މުހިންމު ތަފްސީލުތައް:

ތަރައްގީކުރާ ތަން: ވެރިރަށް މާލެއިން ފުރައިގެން ލޯންޗުގައި ގާތްގަނޑަކަށް 17 މިނެޓުން ދެވޭ ފުށިދިއްގަރު ފަޅުގައި ހިއްކަމުންދާ "ރަސްމާލެ" ސިޓީގައެވެ.
ހިމެނޭ ބައިތައް: ބައިނަލްއަގުވާމީ ފެންވަރުގެ ހޮޓާތަކާއި ރިސޯޓުތައް، ޕްރީމިއަމް އަދި ބްރޭންޑެޑް ރެޒިޑެންސްތައް، ދުނިޔޭގެ ފެންވަރުގެ މެރީނާއެއް، ވޯޓާފްރަންޓް ޕްރޮމެނާޑްތައް، ރެސްޓޯރެންޓްތަކާއި ފިހާރަތައް، އަދި މުނިފޫހިފިލުވުމާއި ދުޅަހެޔޮކަމުގެ މަރުކަޒުތައް (ވެލްނެސް ސެންޓަރުތައް).
އިންވެސްޓްމަންޓް: އެކި ފިޔަވަހިތަކަށް ބަހާލައިގެން ކުރިއަށްގެންދާ މި މަޝްރޫއުގެ ޖުމްލަ އިންވެސްޓްމަންޓް 20 ބިލިއަން ޑޮލަރަށް އަރާނެ ކަމަށް އަންދާޒާކުރެވެއެވެ.
އިގްތިސާދީ ފައިދާ: މި މަޝްރޫއުގެ ދަށުން ރާއްޖެއަށް 30 ބިލިއަން ޑޮލަރަށް ވުރެ ގިނަ ބޭރުގެ އިންވެސްޓްމަންޓް ލިބޭނެ ކަމަށް ބެލެވޭއިރު، އޭގެ ތެރޭގައި 18 ބިލިއަން ޑޮލަރުގެ ނެޓް އިންވެސްޓްމަންޓް ހިމެނެއެވެ. އަދި ސީދާ އަދި ނުސީދާ ގޮތުން 54،000 އަށް ވުރެ ގިނަ ވަޒީފާ އުފެދިގެންދާނެއެވެ.އެނގިފައިވާ ގޮތުގައި، މި މަޝްރޫއު ހިންގަނީ ރަސްމާލޭން މިހާރު ހިއްކާފައިވާ 500 ހެކްޓަރުގެ ސަރަހައްދުގަ އެވެ. ނަމަވެސް، މިކަމުގެ ސަބަބުން ކުރިން އިއުލާން ކޮށްފައިވާ ގޮތަށް ދިވެހި ރައްޔިތުންނަށް ގޯއްޗާއި ފްލެޓު ދިނުމަށް ކަނޑައަޅާފައިވާ އަދަދުތަކަށް އެއްވެސް ބަދަލެއް ނާންނާނެ ކަމަށް ހައުސިން މިނިސްޓްރީން ބުންޏެވެ.

މި މަޝްރޫއުގެ އަމަލީ މަސައްކަތް ފެށޭނެ ވަކި ތާރީހެއް އަދި ހާމައެއް ނުވެ އެވެ.