ނުރައްކާތެރިކޮށް ދުއްވާ މީހުންގެ ވަނަވަރު އާންމުކުރަނީ

ޔޫނުސް އިބްރާހިމް

03 އޮކްޓޫބަރ 2026 - 18:36

0 comments

އާންމު ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި ނުރައްކާތެރިކޮށް އުޅަނދު ދުއްވާ ފަރާތްތައް ހުއްޓުވައި، އެ ފަރާތްތަކާމެދު ހަރުކަށި ފިޔަވަޅު އެޅުމަށް ދިވެހި ފުލުހުންގެ ހިދުމަތުން ހާއްސަ މަސައްކަތްތަކެއް ފަށައިފި އެވެ.

އާންމު ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް މަގުމަތީގައި، ނުރައްކާތެރިކޮށް އުޅަނދު ދުއްވުން ތަކުރާރުކުރާ ފަރާތްތައް ހުއްޓުވައި، އެ ފަރާތްތަކާމެދު ހަރުކަށި ފިޔަވަޅު އެޅުމަށް ހާއްސަ މަސައްކަތްތަކެއް ފަށާފައިވާކަން ހާމަކޮށް ފުލުހުން މިއަދު ނެރުނު ނޫސްބަޔާނެއްގައި ބުނީ މި މަސައްކަތުގެ ދަށުން ނުރައްކާތެރިކޮށް އުޅަނދު ދުއްވާ ފަރާތްތައް ދެނެގަނެ، އެ ފަރާތްތަކުގެ މައުލޫމާތު ޕްރޮފައިލް ކުރުމުގެ މަސައްކަތް މިހާރު ކުރަމުންދާ ކަމަށެވެ.

ފުލުހުން ބުނީ މިފަދަ ފަރާތްތަކަށް ނަސޭހަތްތެރިވުމަށްފަހު، އަމަލުތައް ތަކުރާރުކުރާ ފަރާތްތަކާމެދު ޓްރެފިކް ގާނޫނާއި ގަވާއިދުތަކުގެ ދަށުން ކުރިން ކުރަމުން އައި ޖޫރިމަނާގެ އިތުރުން، އިތުރު އިންޒާރަކާ ނުލައި ޖިނާއީ ތަހުގީގު ހިންގާނެ ކަމަށެވެ.

ހާއްސަ ސަމާލުކަމެއް ދީގެން ފިޔަވަޅު އަޅާނެ ކަންކަން

ބިރުވެރިކަން އުފެދޭ ގޮތަށް ޒިގްޒެގްކޮށް ދުއްވުން.
އުޅަނދަށް ބަދަލު ގެނެސް ސައިލެންސަރު އަޑުގަދަކޮށް ދުއްވުން.
ހަރު ބިންމަތީގައި ގާނަމުން ދުއްވުން.
ދުވެލިމަތަކަށް މަޑުނުކޮށް ބާރު ސްޕީޑުގައި ދުއްވުން.
ކަމާގުޅޭ އިދާރާތަކުގެ ހުއްދަ ނުނަގައި ރޭސްޖެހުމާއި، ހުނަރު ދެއްކުމާއި ނުރައްކާތެރިކޮށް އޯވަޓޭކުރުން.
މަސްތުގެ ހާލަތުގައި ދުއްވުން.
ފުލުހުން މަޑުކުރަން އެންގުމުން މަޑުނުކޮށް ފިލުމާއި ފިލަން މަސައްކަތްކުރުން.

ފުލުހުން ބުނީ މި މަސައްކަތުގެ ދަށުން، ނުރައްކާތެރިކޮށް ދުއްވާ އުޅަނދުތައް ހޯދައި، އުޅަނދު ދުއްވި ފަރާތުގެ އިތުރުން، އުޅަނދުގެ ވެރިފަރާތާމެދުވެސް ފިޔަވަޅު އެޅޭނެ ކަމަށެވެ. އަދި އުޅަނދުތައް 30 ދުވަހުގެ މުއްދަތަށް ފުލުހުންގެ ބެލުމުގެ ދަށަށް ގެނެސް ކަނޑައެޅިފައިވާ މުއްދަތުގެ ތެރޭގައި ވެރިފަރާތުން ހަވާލުނުވާ އުޅަނދުތައް، އޮންނަ އުސޫލުގެ ދަށުން ނައްތާލެވޭނެ ކަމަށްވެސް ފުލުހުން ބުނެފައިވެ އެވެ.

މީގެ އިތުރުން މިފަދަ އަމަލުތަކުގައި، ސަރުކާރުގެ މުއައްސަސާތަކާއި، ކުންފުނިތަކުގެ މުވައްޒަފުން ޝާމިލުވާކަން ފާހަގަކުރެވިފައި ވާތީ އެ ފަރާތްތަކާމެދު އެޅެންހުރި އިދާރީ ފިޔަވަޅުތައް އެޅުމަށް އެ މުއައްސަސާތަކަށް މި މައުލޫމާތު ހިއްސާކުރަމުންދާ ކަމަށް ފުލުހުން ބުނެފައިވެ އެވެ.

ފުލުހުން ބުނީ ނުރައްކާތެރިކޮށް އުޅަނދު ދުއްވާ ފަރާތްތަކުގެ ތެރެއިން އެ އަމަލު ތަކުރާރުކުރާ ފަރާތްތަކުގެ ވަނަވަރު އާންމުކުރަމުން ކުރާނެ ކަމަށާއި މިފަދަ ކަންކަމާ ގުޅިގެން އާންމުން ހިއްސާކުރާ ފޮޓޯ އާއި ވީޑިއޯ ފަދަ މައުލޫމާތުގެ ސައްހަކަން ކަށަވަރުކުރުމަށްފަހު ގާނޫނީ ގޮތުން އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށެވެ.

ފުލުހުން މި ހާއްސަ އޮޕަރޭޝަން ފަށާފައި މިވަނީ ނުރައްކާތެރިކޮށް ވެހިކަލްތައް ދުއްވުން އިތުރުވެފައިވާ ދަނޑިވަޅެއްގަ އެވެ. އެގޮތުން އެފަދަ ވީޑިއޯތައް ސޯޝަލް މީޑިއާގައި ދައުރުވުމުން އެ މައްސަލަތައް ފުލުހުން ބަލާފައިވެ އެވެ.