ނިވާކަން ކުޑަ ހެދުން އަޅާ ބިދޭސީންނާ މެދު ފިޔަވަޅު އަޅާނީ!

އަބްދުﷲ މައުރޫފް

02 އޮކްޓޫބަރ 2026 - 18:57

0 comments

އާންމު އިޖުތިމާއީ މިންގަނޑާ ހިލާފަށް، ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި އުޅޭ ބިދޭސީންނަށް ފިޔަވަޅު އަޅާނެ ކަމުގެ އިންޒާރު ފުލުހުން ދީފި އެވެ.

ފުލުހުން އެގޮތަށް އިންޒާރެއް ދިނީ، ރާއްޖޭގައި އުޅޭ ބިދޭސީންނާއި ރާއްޖެއަށް ޒިޔާރާތް ކުރާ ފަތުވެރިންނަށް އަމާޒުކޮށް މިއަދު އެ ހިދުމަތުން ނެރުނު ބަޔާނެއްގަ އެވެ.

އެ ބަޔާނުގައި ބުނީ، މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަ ހެދުން އަަޅައިގެން މަގުމަތީގައި އަދި އެ ނޫން ވެސް ތަންތަނުގައި އުޅޭކަން ފާހަގަވާ ކަމަށެވެ. އަދި ބައެއް ބިދޭސީންގެ މިފަދަ އަމަލުތަކަކީ، މުޖުތަމައުގެ އާންމު ސުލޫކީ އަދި އަހުލާގީ މިންގަނޑުތަކާ ހިލާފު އަމަލުތަކެއްގެ ގޮތުގައި ބަޔާނުގައި ފާހަގަކޮށްފައިވެ އެވެ.

"އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެ ހާލަތްތަކެއް ކުރިމަތިވުމުގެ ކުރިން، އެފަދަ ކަންކަން ހުއްޓުވުމަށް މި ހިދުމަތަށް މަތިކޮށްފައިވާ ގާނޫނީ ޒިންމާ އަދާކޮށް އެ ފަރާތްތަކާ ދެކޮޅަށް [އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ] ގާނޫނުގެ ދަށުން އެޅެން ހުރި ފިޔަވަޅު އަޅާނެކަމުގައި ދަންނަވަމެވެ،" ފުލުހުންގެ ބަޔާނުގައި ބުންޏެވެ.

ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަކޮށް ކަނޑައެޅިފައިވާ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި ފަތުރުވެރިން އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކުރުމަށް ފުލުހުން އެދިފައިވެއެވެ. އަދި މުޖުތަމައުގެ އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް، ފަތުރުވެރިންނަށް ޚިދުމަތް ދޭ ފަރާތްތަކުން ޚާއްސަ ސަމާލުކަމެއް ދިނުމަށް ފުލުހުން ވަނީ ހަނދާންކޮށްދީފައެވެ.

މިކަންކަމާ ހިލާފަށް އަމަލުކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމަށްވެސް އެ ބަޔާނުގައި ފުލުހުން ވަނީ އިންޒާރުދީފައެވެ.