ދޮންކަލޯއަށް ޓިކްޓޮކް ލައިވްއާއެކު މިލިއަނަކަށްވުރެ ގިނަ ރުފިޔާ

ހުނައިދާ ޔާސިރު

02 އޮކްޓޫބަރ 2026 - 12:02

0 comments

އޯޓިޒަމާއި އޭޑީއެޗްޑީ ހުންނަ މުހައްމަދު ފައްޔާހް ހަސަން (ދޮންކަލޯ) އާއި އޭނާގެ ބައްޕަ ހަސަން ފަޔާޒު ދިރިއުޅޭނެ ގެއެއް އަޅައިދިނުމަށް ޓިކްޓޮކް ކޮމިއުނިޓީން ކުރިއަށް ގެންދިޔަ ލައިވްގައި މިލިއަނަކަށްވުރެ ގިނަ ރުފިޔާގެ އެހީ ލިބިއްޖެ އެވެ.

ދޮންކަލޯއަކީ، އުމުރުން 19 އަހަރުގެ ފައްޔާހަށް އޭނާގެ ބައްޕަ ލޯބިން ކިޔާ ނަމެވެ. ދޮންކަލޯ ދިރިއުޅެމުންދަނީ އޭނާގެ ބައްޕައާއި މާމައާއެކުގައި ބ. ހިތާދޫގައި ވަރަށް ދުވަސްވީ ގެއެއްގައެވެ.

ދޮންކަލޯގެ ދިރިއުޅުމާ ގުޅޭ ހާލަތު ފަޔާޒު ޓިކްޓޮކް މެދުވެރިކޮށް ހިއްސާކުރަމުން އަންނައިރު، އެ ވީޑިއޯތަކަށް ގިނަ ބަޔެއްގެ ސަމާލުކަން ވަނީ ލިބިފައެވެ.

ދޮންކަލޯއަކީ "މަންމަ"އާއި "ބައްޕަ" ފަދަ ބައެއް ބަސްތައް ކިޔާ ކުއްޖެއް ނަމަވެސް، ރަނގަޅަށް ވާހަކައެއް ނުދެކެއެވެ. އަދި ދަރިފުޅު ބެލުމަށް ޓަކައި ދޮންކަލޯ ވަނީ ވަޒީފާ ދޫކޮށްލައި، އެކަމަށް ހުސްވެފައެވެ.

ދިވެހި ޓިކްޓޮކް ކޮމިއުނިޓީގެ މަޝްހޫރު އެމްޓީޕީ އާއި މަރިޔަމް ސަމާ އިސްނަގައިގެން ކުރިއަށްގެންދިޔަ އެ ހަރަކާތުގައި، ރާއްޖޭގެ ޓިކްޓޮކްގައި މަޝްހޫރު އެތައް ހޯސްޓުންނެއް ބައިވެރިވެ، ފައިސާ ހޯދުމުގެ މަސައްކަތުގައި ހަރަކާތްތެރިވި އެވެ.

ރޭ ދަންވަރު 1:00 އާ ހަމައަށް ކުރިއަށް ގެންދިޔަ ލައިވްގައި 1.2 މިލިއަނަށް ވުރެ ގިނަ ރުފިޔާ ފަޔާޒްގެ ބީއެމްއެލް އަދި އެމްއައިބީ އެކައުންޓުތަކަށް ޖަމާވެފައިވާ ކަމަށް އޭނާ ވަނީ ބުނެފަ އެވެ.

އެ ލައިވްގައި ބައެއް މީހުން ވަނީ ފަޔާޒުގެ ގޭގައި ބޭނުންކުރާނެ ފަރުނީޗަރާއި ގޭގައި ބޭނުންކުރާނެ ބައެއް ތަކެތި ހަދިޔާކުރާނެ ކަމަށް ވެސް ބުނެފަ އެވެ.

އުމުރުން 19 އަހަރުގެ ދޮންކަލޯ އާއި އޭނާގެ ބައްޕަ ފަޔާޒު ދިރިއުޅެމުން އަންނަނީ ބ. ހިތާދޫގަ އެވެ.