މިނިވަންކަން ގެއްލޭނީ ގަމާރުން ވެރިކަމުގައި ތިބުމުން: ނަޝީދު

އިސްމާއިލް ރިޒާ

02 އޮކްޓޫބަރ 2026 - 00:16

0 comments

ރާއްޖޭގެ މިނިވަންކަން ގެއްލޭނީ ގަމާރުން ވެރިކަމުގައި ބެހެއްޓުމުން ކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމްޑީޕީގެ ފަސް ވަނަ ކޮންގްރެސް ފެށުމުގެ ރަސްމިއްޔާތުގައި ނަޝީދު ވިދާޅުވީ މި ސަރުކާރަށް ދުނިޔެ ހިނގާ ގޮތާއި، ހިނގާ މަގު އޮޅުންނުފިލާ ކަމަށާއި މި ބޭފުޅުންގެ އަތްމަތީގައި ރާއްޖެ ބާއްވަން ހެޔޮނުވާނެ ކަމަށެވެ. ރާއްޖޭގެ މިނިވަންކަމާއި އިސްތިގުލާލު ގެއްލޭނީ ރާއްޖޭގައި ބޭރުގެ ވިޔަފާރިވެރިންނަށް ވިޔަފާރިކުރުމުގެ ހުއްދަ ދީގެން ނޫން ކަމަށާއި ނުވަތަ ބޭރު މީހުންނަށް ރާއްޖޭގައި ދިރިއުޅެން ހުއްދަ ދިނުމުން ވެސް ނޫން ކަމަށް ނަޝީދު ވިދާޅުވި އެވެ.

"އަޅުގަނޑުމެންގެ އިސްތިގުލާލު، އަޅުގަނޑުމެންގެ މިނިވަންކަން ގެއްލި ބުރޫއަރާ ދާނީ އަޅުގަނޑުމެންގެ ވެރިންނަށް ތަނެއް ދޮރެއް ނޭނގުނީމާ. މިތިބަ ގަމާރުން އަޅުގަނޑުމެންގެ ތެރޭގައި ވެރިކަމުގައި ބަހައްޓަން ޖެހުނީމާ،" ނަޝީދު ވިދާޅުވި އެވެ.

ގުދުރަތީ ގޮތުން ރާއްޖެ އޮތްގޮތް އެނގޭ ކަމަށާއި އަވަށްޓެރިންނަކީ ފުރަތަމަ ގުޅުން ބާއްވަންވީ މީހުންކަމާއި ތަރުތީބުގައި އިންޑިއާ އިސްކުރުމަކީ ވެސް އެއްވެސް ހާލެއްގައި ދިވެހިންނާ ދޭތެރޭގައި ނިކަމެތި ވާހަކައެއް ދެއްކުމެއް ނޫން ކަމަށް އެ މަނިކުފާނު ވިދާޅުވި އެވެ

އެ ވާހަކަތަކަކީ އެކުވެރި ގައުމުތަކަށް ބަދު ބަހެއް ބުނުމެއް ނޫންކަން، ބޭރުގެ ސަފީރުން ވެސް ބައިވެރިވެވަޑައިގެންނެވި ރަސްމިއްޔާތުގައި ނަޝީދު ވިދާޅުވި އެވެ.

"މި ދިވެހިރާއްޖެ، މި އިންޑިއާ ކަނޑުގެ އެތެރެވަރީގައި އުފެދިފައި އޮތް އަޅުގަނޑުމެންގެ ޖޯގުރަފީ، އެއީ އަޅުގަނޑުމެންގެ ހާރިޖީ ސިޔާސަތު،" ނަޝީދު ވިދާޅުވި އެވެ.

އަންނަ ހޮނިހިރު ދުވަހުގެ ނިޔަލަށް ބާއްވާ ކޮންގްރެސްގައި އިދިކޮޅު ޕާޓީގެ އަސާސީ ގަވައިދަށް އިސްލާހުތަކެއް ހުށަހަޅަން ވަނީ ނިންމައިފަ އެވެ. އޭގެ އިތުރުން ކައުންސިލްތަކަށް ހާއްސަ އިންވެސްޓްމަންޓު ފޯރަމެއް ވެސް ބާއްވާނެ އެވެ.