ދައުލަތަށް ފައިސާ ހޯދަން ހަރުމުދަލެއް ވިއްކާލަން ނަޝީދު އެދިވަޑައިގެންފި

ހުނައިދާ ޔާސިރު

22 ސެޕްޓެމްބަރ 2026 - 09:35

0 comments

މި ވަގުތު ރާއްޖެއަށް އެންމެ ފައިދާ ހުރި ގޮތަކީ ވަގުތުން ފައިސާ ލިބޭ ގޮތަށް ދައުލަތުގެ ހަރުމުދަލެއް ވިއްކާލުން ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ރައީސް ނަޝީދު މިހެން ވިދާޅުވެފައި މިވަނީ ރަސްމާލޭގައި ވޯޓާފްރަންޓާއި މެރީނާއެއް ތަރައްގީކުރަން 20 ބިލިއަން ޑޮލަރުގެ މަޝްރޫއެއް ފެށުމަށް ޔޫއޭއީގެ ކުންފުންޏެއް ކަމަށްވާ އީގަލް ހިލްސްއާއެކު މިއަދު ސޮއިކޮށްފައި ވަނިކޮށެވެ.

އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ ދައުލަތުގެ ދަރަނި އަދާކުރުމަށް ޕްރައިވެޓައިޒް ކުރުން ނުވަތަ ހަރުމުދާ ވިއްކުމަކީ ރަނގަޅު ކަމެއް ކަމަށެވެ. އެގޮތުން ރަސްމާލޭގައި ވޯޓާފްރޮންޓެއް ތަރައްގީކުރުމަކީ ރަނގަޅު ޚިޔާލެއް ކަމަށް އެއްބަސްވެވަޑައިގަތެވެ.

އެކަމަކު ރާއްޖެއަށް ކުރިމަތިވެފައިވާ މާލީ ދަތިކަމުން އަރައިގަތުމަށްޓަކައި ރަސްމާލެ މަޝްރޫއަކީ މިވަގުތަށް ހައްލެއް ނޫން ކަމަށް ނަޝީދު ގަބޫލުކުރައްވަ އެވެ. ރަސްމާލެ މަޝްރޫއުގެ ހުރިހާ ކަމެއް އެންމެ ރަނގަޅަށް ދިޔަ ނަމަވެސް އެ މަޝްރޫއުގެ ތެރެއިން ދައުލަތަށް "އެއްޗެއް" ލިބެން އަދި ދެ އަހަރު ނަގާނެ ކަމަށް ވިދާޅުވި އެވެ.

"މިވަގުތު މުހިއްމީ ވަގުތުން ފައިސާ ލިބޭ ގޮތަށް ދައުލަތުގެ ހަރު މުދަލެއް ވިއްކުން،" ނަޝީދު ވިދާޅުވި އެވެ.

ނަޝީދު ކުރެއްވި އިތުރު ޕޯސްޓެއްގައި ވަނީ ރަސްމާލޭގައި ވޯޓާފްރަންޓާއި މެރީނާއެއް ތަރައްގީކުރާތީ އެ މަޝްރޫއަށް ބޮޑު ޝައުގުވެރިކަމެއް އުފެދި ބައެއް ކަންކަން އޮޅުންފިލުއްވުމުގެ ގޮތުން މުހިއްމު ސުވާލެއްވެސް ކުރައްވާފަ އެވެ. އެގޮތުން ރައީސް ނަޝީދު ވަނީ ރަސްމާލެ ތަރައްގީކުރަނީ މިސަރުކާރުގެ ހަލާލު ޓޫރިޒަމުގެ މިންގަނޑުގައިތޯ އައްސަވާފަ އެވެ.

"އަޅުގަނޑުގެ ސުވާލަކީ ރަސްމާލެ ތަރައްގީކުރަނީ މިސަރުކާރުގެ ހަލާލު ޓޫރިޒަމުގެ މިންގަނޑުގައިތޯ ނުވަތަ މިހާރުވެސް ރާއްޖޭގެ ރިސޯޓްތަކުން ވިއްކާ ރަލާއި އޫރުމަސް ރަސްމާލޭގައި ވިއްކޭ ގޮތައްތޯ،" ނަޝީދުގެ ސުވާލުގައި އައްސަވާފައިވެ އެވެ.

ނަޝީދުގެ މި ސިޔާސަތު އޮތް ނަމަވެސް، ރައީސް ޑރ. މުހައްމަދު މުއިއްޒު ވަނީ އެކަމާ ދެކޮޅަށް އެކި ފަހަރު މަތިން ވާހަކަ ދައްކަވައިފަ އެވެ. ރާއްޖޭގެ ހަރުމުދާ ވިއްކުމާ ދެކޮޅުކަން ހާމަކުރައްވަމުން ރައީސް މުއިއްޒު ވަނީ ދިރާގާއި އެމްޑަބްލިއުއެސްސީގެ ހިއްސާ އަލުން ސަރުކާރަށް ގަތުމަށް ވެސް ނިންމަވައިފަ އެވެ.

ޕީއެންސީގެ ކޮންގްރެސް ނިންމާލަން ބޭއްވި ރަސްމިއްޔާތުގައި ރައީސް ވިދާޅުވީ އިދިކޮޅު ފިކުރުން ރާއްޖެ ދަރުވާލައި، ހަރުމުދާތައް ވެސް ހުރީ ވިއްކާލާފައި ކަމަށާއި މި ސަރުކާރުން މަސައްކަތް ކުރަނީ އެ ދަރަނިތަކުން ރާއްޖެ ސަލާމަތްކޮށް ހަރުމުދާތައް ގެންނަން ކަމަށެވެ.

"އެންމެ ޒައްރެއްގެ މިންވަރު ވެސް ބޭރު ބަޔަކަށް ނުދޭނަން،" ރައީސް ވިދާޅުވި އެވެ.