އަންނަ ދިރާސީ އާ އަހަރުގެ ކިޔެވުން ފެށޭނީ ޖަނަވަރީ 17 ގައި

އިސްމާއިލް ރިޒާ

02 އޮކްޓޫބަރ 2026 - 11:54

0 comments

ޖެނުއަރީ 17 ގައި ދިރާސީ އާ އަހަރު ފަށާ ގޮތަށް ނިންމައިފި އެވެ.

އެކެޑަމިކް ކަލަންޑަރުން ދައްކާގޮތުން 2027 ވަނަ އަހަރުގެ ދިރާސީ އައު އަހަރުގައި ޓީޗަރުން ސްކޫލްތަކަށް ރިޕޯޓުކުރަންޖެހެނީ ޖަނަވަރީ މަހުގެ 13 ވަނަ ދުވަހެވެ. އެއަށްފަހު ސްކޫލުތަކުގެ ކިޔެވުން ފެށޭނެކަމަށް ކަލަންޑަރުގައި ޖަހާފައިވަނީ ޖަނަވަރީ މަހުގެ 17 ވަނަ ދުވަހަށެވެ.

އެއަށްފަހު ފެބުރުވަނީ މަހުގެ އަށްވަނަ ދުވަހަކީ ރޯދަމަހުގެ އެއްވަނަ ދުވަސްކަމުން އެ ދުވަސް ވަނީ ސަރުކާރު ބަންދު ދުވަހެއްގެ ގޮތުގައި ކަނޑައަޅާފައެވެ. އަދި އެ މަހުގެ 21 އިން ފެށިގެން 25 ވަނަ ދުވަހަށް ކަނޑައަޅާފައިވަނީ ޓީޗަރުންގެ ޕްރޮފެޝަނަލް ޑިވެލޮޕްމެންޓް ދުވަސްތަކުގެ ގޮތުގައެވެ.

އެއަށްފަހު ފެބުރުވަރީ މަހުގެ 26 ވަނަ ދުވަހުން ފެށިގެން މާޗު މަހުގެ ހަތް ވަނަ ދުވަހަކީ ރޯދަމަހުގެ ފަހު 10 އަކަށް ވުމުން އެ ދުވަސްތައް ވަނީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައެވެ. މީގެ ކުރިންވެސް ރޯދަމަހުގެ ފަހު 10 ސަރުކާރުން ބަންދުކުރެއެވެ.

ކަލަންޑަރުން ދައްކާގޮތުން މާޗު މަހުގެ ނުވަ ވަނަ ދުވަހުން ފެށިގެން 11 ވަނަ ދުވަހަށް ވަނީ ފިތުރު އީދުގެ މުނާސަބަތުގައި ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައެވެ. އެއަށްފަހު މެއި މަހުގެ 16 ވަނަ ދުވަހުން 20 ވަނަ ދުވަހުގެ ނިޔަލަށް ވަނީ ޙައްޖާއި އަލްޙާ އީދަށް ސަރުކާރު ބަންދުކޮށްފައެވެ.

ދަރިވަރުންގެ ފުރަތަމަ ޓާމުގެ ޓެސްޓު ފެށޭނެ ކަމަށް ކަލަންޑަރުގައި ޖަހާފައިވަނީ ޖޫން މަހުގެ 29 ވަނަ ދުވަހުން ފެށިގެން ޖުލައި މަހުގެ އަށްވަނަ ދުވަހަށެވެ. އެހެންކަމުން ފުރަތަމަ ޓާމުގައި ވެސް ދަރިވަރުންނަށް ޗުއްޓީގެ ގޮތުގައި ގިނަ ދުވަސްތަކެއް ލިބެއެވެ.

އެކެޑަމިކް ކަލަންޑަރުން ދައްކާގޮތުން ފުރަތަމަ ޓާމުގެ ޗުއްޓީ ނިންމުމަށްފަހު ދެވަނަ ޓާމުގެ ކިޔެވުމަށް ދަރިވަރުން ނިކުންނާނީ އޮގަސްޓު މަހުގެ އެއްވަނަ ދުވަހެވެ. އެއަށްފަހު ދެވަނަ ޓާމުގެ ޓެސްޓު ނޮވެމްބަރު މަހުގެ 23 އިން ފެށިގެން ޑިސެމްބަރު މަހުގެ ދެވަނަ ދުވަހުގެ ނިޔަލަށް ކުރިއަށްދާނެއެވެ. އަދި ޑިސެމްބަރު މަހުގެ ފަސްވަނަ ދުވަހު ރިޕޯޓު ފޮތް ދިނުމަށްފަހު އެ މަހުގެ 10 ވަނަ ދުވަހު ދިރާސީ އަހަރުގެ ކިޔެވުން ނިންމައި ދަރިވަރުން ޗުއްޓިއަށްދާނެއެވެ.

މިހާރު ހިނގަމުންދާ ދިރާސާ އަހަރުގައި ދެވަނަ ޓާމުގެ ކިޔެވުން ކުރިއަށްދާއިރު، ދަރިވަރުންނަށް ޗުއްޓީ ވާނީ ޑިސެންބަރު 18އިން ފެށިގެންނެވެ.

ބޮޑު ޗުއްޓީ ޑިސެމްބަރުގައި ލިބޭ ގޮތަށް އެކެޑެމިކް ކަލަންޑަރު ބަދަލުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.