ތިން މިނިސްޓްރީގައި އަލިފާން ރޯވި ވީޑިއޯ ފުލުހުން އާއްމުކޮށްފި

އަބްދުﷲ މައުރޫފް

24 ސެޕްޓެމްބަރ 2026 - 15:49

0 comments

ހައުސިން މިނިސްޓްރީގައި އަލިފާން ރޯވުމަށް ފަހު އެ ތަން ސާފުކުރުމުގެ މަސައްކަތްކުރަނީ - ފޮޓޯ: ދައުރު

ތިން މިނިސްޓްރީއެއް ހިންގަމުން ދިޔަ އިމާރާތްތަކުގައި މީގެ ދެ އަހަރެއް ކުރިން އަލިފާން ރޯވި މަންޒަރު ފެންނަ ވީޑިއޯ ފުލުހުން މިއަދު އާއްމުކޮށްފި އެވެ.

ހައުސިން މިނިސްޓްރީއާ އެކު ސަރުކާރުގެ ތިން ވުޒާރާއެއް ހިންގަމުންދިޔަ އޮފީސް އިމާރާތުގައި 12 ޑިސެމްބަރު 2024ގައި ހިނގި އަލިފާނުގެ ހާދިސާގައި މުޅި އިމާރާތް އެއްކޮށް ވަނީ އަނދާފަ އެވެ. އެހެންވެ، މިހާރު އެތަނުގައި ހިންގި މިނިސްޓްރީތައް ވަގުތީ ގޮތުން ހިންގަމުންގެންދަނީ ދަރުބާރުގޭގަ އެވެ.

އެ އިމާރާތުގައި ބަޔަކު ރޯކޮށްލީ ކަމުގެ ތުހުމަތުތަަކެއް ވަނީ ކުރެވިފަ އެވެ. އެކަމަކު ފުލުހުން މީގެ ކުރިން ބުނެފައިވަނީ އެ ހާދިސާގައި އެފަދަ އެއްވެސް ކަމެއް ފާހަގަކުރެވިފައިނުވާ ކަމަށެވެ.

އެ ހާދިސާގެ އެއްވެސް މައުލޫމާތެއް އޭރު ހާމަނުކުރާތީ ބޮޑެތި ތުހުމަތުތަކެއް ކުރެވުނެވެ. އެގޮތުން މީގެ ކުރިން ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވަނީ، އަލިފާނުގެ ހާދިސާއާ ގުޅިގެން ބައިވަރު ސުވާލުތަކެއް އެބަހުރި ކަމަށް ވިދާޅުވެފައެވެ. އެ ހާދިސާގައި ގެއްލުނީ ކޮންކޮން ލިޔެކިޔުންތަކެއްކަން އަދިވެސް ރަނގަޅަށް ސާފުނުވާކަމަށް ވިދާޅުވެ، އެއްވެސް ބަޔަކު، ގެއްލިގެން އުޅެނީ ކޮން އެއްޗެއްކަން ބުނެދޭކަށް ވެސް ބޭނުންނުވާ ކަމަށް އެ މަނިކުފާނު އޭރު ތުހުމަތުކުރެއްވިއެވެ.

މީގެ އިތުރުން، މި މަހުގެ ފަސް ވަނަ ދުވަހު ވެސް ޔާމީން ވަނީ އެ އިމާރާތްތަކުގައި އަލިފާން ރޯކޮށްލާފައިވާ ކަމަށާއި އެކަން ކުރި މީހާވެސް ފުލުހުންނަށް އެނގޭކަމަށް ވިދާޅުވެފައެވެ. އެ މަނިކުފާނު އެފަދައިން ވިދާޅުވި މައްސަލަ ބެލުމަށް ހޯމް މިނިސްޓަރު އަލީ އިހުސާން ފުލުހުންނަށް އެންގެވިއެވެ. ނަމަވެސް އެކަމާ ގުޅޭ ގޮތުން ފުލުހުން ޔާމީނާ ސުވާލުކުރަން މަސައްކަތް ކުރުމުން އެ މަނިކުފާނު ވަނީ ކަމާ ގުޅޭ މައުލޫމާތު އެނގިވަޑައިނުގަންނަވާ ކަމަށް ލިޔުމުން އަންގަވައިފަ އެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުުމުގައި ވަނީ އެ ހާދިސާ ހިނގި ދުވަހުގެ ސީސީޓީވީ ފުޓޭޖުތައް ދައްކާފަ އެވެ. އަދި ތަހުގީގަށް ފާހަގަކުރެވިފައިވާ ކަންކަމުގެ ތަފްސީލު ހިއްސާކުރި އެވެ.

މި ހާދިސާގައި ސަރުކާރުގެ ތިން އިމާރާތެއް ބޭނުންނުކުރެވޭ ވަރަށް އަނދައިގެންދިޔައިރު އިންޝިއުރެންސްކޮށްފައިވަނީ އެންވަޔަރަމަންޓް މިނިސްޓްރީ އެކަނި ކަމަށް ފުލުހުން ބުންޏެވެ.

މި ނޫސްވެރިންގެ ބައްދަލުވުމުގައި މޭޖާ ކްރައިމް އިންވެސްޓިގޭޝަންގެ ވެރިޔާ އަބްދުﷲ ރަޝީދު ވިދާޅުވީ، ފުލުހުންގެ ތަހުގީގަށް ޖުމްލަ 14 ސީސީޓީވީ ފުޓޭޖާއި އާއްމު ފަރާތްތަކުން ހިއްސާކުރި ފޮޓޯތަކާއި ވީޑިއޯތައް ބަލާފައިވާ ކަމަށެވެ. އަދި ތަހުގީގުގައި 42 މީހެއްގެ ބަޔާން ނަގާފައިވާ ކަމަށް އޭނާ ވިދާޅުވި އެވެ.

އަބްދުﷲ ރަޝީދު ވިދާޅުވީ އަލިފާން ހިފާ ފަދަ ކެމިކަލެއް ހުރިކަން ތަހުލީލުތަކުން ދައްކާފައި ނުވާ ކަމަށާއި އެ ހާދިސާ ހިނގާފައިވަނީ ކަރަންޓް ޝޯޓެއްގެ ސަބަބުން ކަމަށެވެ.

އަލިފާން އެންމެ ފުރަތަމަ ރޯވެފައި ހުއްޓާ ފެނުނު ހައުސިން މިނިސްޓްރީގެ ޖިއޯ މެޓްރިކްސް ޑިޕާޓުމަންޓަކީ ކުރިން ވެސް ކަރަންޓުގެ މައްސަލަ އުޅޭ ތަނެއްކަން ތަހުގީގަށް ފާހަގަކުރެވިފައިވާ ކަމަށް އޭނާ ވިދާޅުވި އެވެ.

"ކަރަންޓު ނަރުތަކުގެ ފޮރެންސިކް ތަހުލީލުތައް ވަނީ ކުރެވިފައި. މި ތަހުލީލުތަކުން ކަރަންޓު ނަރުތަކުގައި ހޫނުވެގެން އުފެދޭ އާތު ފެންނަން ހުރުމާއި އޯވާހީޓް ވުމުން އެއް ނަރު އަނެއް ނަރާ އެއްވެފައި ހުރުމުން ބައެއް ނަރުތައް ވިރި، ފުފިފައިވާ ތަންތަނުގައި ބަލްބު އުފެދިފައިވާކަން ވެސް ފާހަގަކުރެވޭ. އަދި ތަހުލީލު ކުރެވުނު ނަރުތަކުގެ ތެރެއިން ދެ ކަރަންޓު ނަރަކުން ޝޯޓު ވެފައިވާކަމުގެ ނިޝާންތައް ވެސް ވަނީ ފެނިފައި،" އަބްދުﷲ ރަޝީދު ވިދާޅުވި އެވެ.

އަބްދުﷲ ރަޝީދު އިތުރަށް ވިދާޅުވީ އެ މައްސަލަަ ތަހުގީގުކުރި އިންޑިއާ ޓީމުގެ ރިޕޯޓުތަކުން ވެސް، އަލިފާން ރޯވެފައިވާ ސަބަބަކަށް ދައްކަނީ ކަރަންޓް ޝޯޓު ސާކެޓެއްގެ ސަބަބުން ކަމަށެވެ. އެހެންވެ އިތުރަށް އެ މައްސަލާގައި ތަހުގީގުކުރާނެ އެއްޗެއް ނެތް ކަމަށް އަބްދުﷲ ރަޝީދު ވިދާޅުވި އެވެ.

"ރޯވެފައިވާ ކަރަންޓު ނަރުތަކަކީ އިމާރާތުގެ ސީލިންގުގެ ދަތިދޭތެރެތަކުގައި ހުރި ނަރުތައް ކަމުން އެ އަލިފާންތައް ހޯދައި ނިއްވާލަން ދަތިތަކެއް ހުރުމުގެ ސަބަބުން ކޮންޓްރޯލުނުވެގެން، ހުޅުގަނޑު ހިފައިގެންގޮސް ފެތުރިގެން ކަމަށް ފާހަގަކޮށްފައިވޭ،" އިންޑިއާ ޓީމުގެ ރިޕޯޓާ ހަވާލާދެއްވައި އަބްދުﷲ ރަޝީދު ވިދާޅުވި އެވެ.

އެ ހާދިސާގައި، ހެނދުނު ރޯވި އަލިފާންގަނޑު ކޮންޓްރޯލްވީ މެންދުރު 12:40 ހާއިރެވެ. ނަމަވެސް އަލިފާން އެއްކޮށް ނިއްވާލެވުނީ 3:30 ގަ އެވެ.

އެ ހާދިސާގައި ޓިނު ބިލްޑިންގައި ރޯވެ، ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރްމަންޓް މިނިސްޓްރީ ބޭނުން ނުކުރެވޭ ވަރަށް ވަނީ އަނދައިފަ އެވެ. އެހެންވެ، އެ ތިން މިނިސްޓްރީ ވަގުތީ ގޮތުން މިހާރު ހިންގަނީ ދަރުބޭރުގޭގަ އެވެ.