ކުރީގެ ދެ އިންތިހާބުގައި ހޯރަފުއްޓަށް ވީ ވައުދުތައް އަދި ހުރީ ރޮލާ!

ހަސަން ހަލީމް

02 ޑިސެމްބަރ 2025 - 12:19

1 comments

ކޮންމެ ކަމެއް ވަރިހަމަވާނީ އަދި ވެސް ވަކި ބަޔަކަށެވެ. އެންމެނެތް "ވަރިހަމަ" ވެފައި ތިބޭނެ ކަމަށް ސިޔާސީން ހީކުރުމަކީ މޮޔަކަމެކެވެ. ތިމާއަށް ފައިދާއެއް އޮތް ނަމަ، އެއްވެސް ގޯހެއް ނުފެންނާނީ މަދު ބަޔަކަށެވެ. ސިޔާސީންގެ ދަޅައަށް ހެއްލި މަދު ބައެއްގެ ލޯ މެރިދާނެ އެވެ. ކަންފަތް ބީރުވެދާނެ އެވެ. ނަމަވެސް ކުރިން ބުނިހެން އެއީ ހުރިހާ ރައްޔިތުންގެ ސިފަ އެއް ނޫނެވެ.

މި ސަރުކާރުގެ ސިޔާސީންގެ ދަޅަ ދައްކައިގެން ވޯޓުން މޮޅުވާން ހެދި "ދޮގު" އެންމެ ސާފުކޮށް ފެންނަން އޮތް އެއް ރަށަކަށް ހއ. ހޯރަފުށި ވާނެ އެވެ. ވެރިކަން ހޯދަން ގިނަ ވައުދު ރައީސް މުއިއްޒު ސަރުކާރުން ހޯރަފުއްޓަށް ވިއެވެ. ވެރިކަން ލިބުމުން އިތުރަށް ކުރިއަށް ދެވޭނީ މަޖިލިސް ލިބިގެން ކަމަށް ވެސް މުއިއްޒުގެ ފަޅިން ދިޔައީ ބުނަމުން ނެވެ. ނަމަވެސް މިއަދުގެ ހަގީގަތަކީ ހޯރަފުއްޓަށް ވީ ވައުދުތައް ހުރީ ރޮލަށެވެ. ސަރުކާރަށް 24 މަސް ވީއެވެ. ބާރު ސްޕީޑްގައި ދިޔަ ހޯރަފުށީގެ ތަރައްގީގެ ދުވެލި މަޑުވުން ނޫން ދެވަނަ ކަމެއް ނުވާ ކަމަށް ބުނާ އަޑު ރަށުތެރެއިން އަންނަނީ ގަދަވަމުން ނެވެ.

ހއ. ހޯރަފުށީ ސިއްހީ ފަރުވާ ރަނގަޅުކޮށްދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ސިއްހީ ނިޒާމް އޮތީ ރައްޔިތުން "އިތުބާރު" ނުކުރާ ހިސާބެއްގައި އެވެ. ސުވާލަކީ ރައީސް މުއިއްޒު ވެރިކަމުގައި ހޯރަފުށީ ހޮސްޕިޓަލްގެ މަސައްކަތް ނިންމާ ހިދުމަތް ދެވޭވަރު ވާނެ ބާ އެވެ؟!؟!؟!؟

މީގެ އިތުރުން ހއ. ހޯރަފުށީ ބިން ހިއްކައި ދިނުމަކީ 2023 ގެ ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވެވަޑައިގެންނެވި ދެވަނަ ވައުދެކެވެ. ނަމަވެސް ރައީސް މުއިއްޒުގެ ސަރުކާރަށް ދެ އަހަރުވާން ދާއިރު ވެސް ހޯރަފުށީގެ ބިންހިއްކުމުގެ މަސައްކަތުގެ އަޑު މިހާރު ވަނީ މަޑުވެފަ އެވެ. މި ސަރުކާރަށް މަރުދޭ މީހުނަށް މިކަންކަން ފެށޭނެ ދުވަހެއް ބުނެ ނުދެވި ސަރުކާރު ދިފާއު ކުރަން ވެސް ވަނީ ދަތިވެފަ އެވެ.

ދެން އޮތީ މަޖިލިސް އިންތިހާބަށް ސަރުކާރުގެ ވެރިން އައިސް ދެއްކި ދަޅަ އެވެ. އެންމެ ފާހަގަ ކުރެވެނީ ނިމުނު ރައްޔިތުންގެ މަޖިލިސް އިންތިހާބުގައި ހއ. ހޯރަފުއްޓަށް ވަޑައިގެން މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) ބުނި ކަމަށް ވިދާޅުވެ، ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ހަލީލް ވީ ވައުދުތަކެވެ.

ޝޯޝަލް މީޑިއާގައި ވައިރަލް ވެފައިވާ ވީޑިއޯގައި ހަލީލް ވަނީ ޗަމްޕާ މުހައްމަދު މޫސާ ވިދާޅުވި ކަމަށް ބުނެ ހޯރަފުއްޓަށް ގިނަ ވައުދުތަކެއް ވެފައި އެވެ. އެގޮތުން:

އަލީ މޫސާ ހޮވުމުން ހޯރަފުށީގައި ހުރި އައިސްޕްލާންޓް މަސައްކަތް ހުއްޓިފައި ހުރުމުން ހޯރަފުށީގައި އާ އައިސް ޕްލާޓެއް ގާއިމުކޮށްދިނުން
އަލީ މޫސާ ހޮވުމުން ހޭންޑް ބޯޅަ އަދި ބަށި ބޯޅަ ކުޅެވޭ ގޮތައް އެންމެ ޒަމާނީ ބަށި ކޯޓެއް ގާއިމުކޮށްދިނުން
އަލީ މޫސާ ހޮވުމުން މުޅި އަތޮޅަށް ހުޅުވާލައިގެން މުޅި ރާއްޖޭގައި ބޭއްވޭ އެންމެ ބޮޑު ބަށި މުބާރާތް އަގު ބޮޑު އިނާމަކާއިއެކު ބާއްވަދިނުން
އަލީ މޫސާ ހޮވުމުން ހޯރަފުށީގައި ޒަމާނީ ފިޒިއޯތެރެޕީ ސެންޓަރެއް ގާއިމްކޮށްދިނުން
އަލީ މޫސާ ހޮވުމުން ވޯޓާ ސްޕޯޓްސް ސެންޓަރެއް ހޯރަފުށީ ޒުވާނުންނަށް ގާއިމްކޮށްދިނުން

ނަމަވެސް މިއަދު ހޯރަފުށީ ދާއިރާގެ ރައްޔިތުން ހާއްސަކޮށް ޒުވާނުންގެ ޝަކުވާއަކީ މި ސަރުކާރުގެ އިސްބޭފުޅަކު ހޯރަފުއްޓަށް ވަޑައިގެން އެދެއްކެވި ވާހަކައިގެ "ކުލަ" ނުޖެހުމެވެ. ވައުދު ވުމަކީ ސަމާސާއަކަށް މި ސަރުކާރުގެ ބައެއް ވެރިން މިއަދު ހަދައިފި އެވެ. އަދި އިންތިހާބުވި މީހުން ގޮނޑިތަކުގައި ހަމަޖެހިލުމަށްފަހު ވައުދު ލިސްޓް ނަނގާލީ ޑަސްބިނަށެވެ. އަދި ބައެއް ވައުދަކީ މީހަކު ބުނެގެން މީހަކަށް ވީ ވައުދުކަމަށް ބުނެ ވެސް އެކަމުން އަންނަނީ ބޯދަމައިގަންނަމުން ނެވެ.

މިހާލަތުގައި އަންނަ ކައުންސިލް އިންތިހާބުގައި ރައްޔިތުން އަތަށް އަރާ ވޯޓު ކަރުދާސް ކޮޅުން ސަރުކާރަށް ފިސާރި ވަރުގަދައަށް ރައްދު ދޭނެ ކަމަށް ބެލެވެ އެވެ. ގާނޫނުއަސާސީގެ 4 ވަނަ މާއްދާ އަކީ ރައްޔިތުންގެ ބާރު ބަޔާން ކުރާ މާއްދާ އެވެ. އެ މާއްދާގައި ބުނަނީ ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ފަރާތުން ކަމަށާއި އެ ބާރުތައް ދެމި އޮންނާނީވެސް ރައްޔިތުންގެ ކިބައިގައި ކަމަށެވެ.