އުއްޗު ބުނި ކަމަށް ހަލީލް ވިދާޅުވި އެހެނަސް ނުވިކަންކަން!

ހަސަން ހަލީމް

12 އޯގަސްޓް 2025 - 12:02

1 comments

ނިމުނު ރައްޔިތުންގެ މަޖިލިސް އިންތިހާބުގައި ހއ. ހޯރަފުއްޓަށް ވަޑައިގެން މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) ބުނި ކަމަށް ވިދާޅުވެ، ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ހަލީލް ވީ ވައުދުތައް ނުފުއްދި ގިނަ އަހަރުތަކެއް ފާއިތު ވެއްޖެ އެވެ.

ހަލީލް ކޮށްދެއްވާނެ ކަމަށް ވިދާޅުވެ ނުފުއްދި ގިނަ ދުވަސްތަކެއް ވެފައިވާ އެ ވައުދުތަކާއި ގުޅޭގޮތުން "ހޯރަ" އިން ސުވާލުކުރުމުން އޭނާ ވިދާޅުވީ މިހިނގާ ދައުރުގައި، ހޯރަފުށީ ދާއިރާގެ މަޖިލީސް މެމްބަރަކަށް، ރައްޔިތުން ވޯޓް ދެއްވައިގެން އިންތިހާބުވެވަޑައިގަތީ އަލީ މޫސަ ކަމަށާއި ކެމްޕެއިންތަކުގައި ދެކެވޭ ވާހަކަތަކުގެ ރެކޯޑްތަކާއި، ވައުދުތަކުގެ ރެކޯޑްތައް ބަލަހަށްޓަވާ، ވައުދު ފުއްދުމުގެ ޕްލޭން ރާއްވަވާ، ތަންފީޒު ކުރައްވާނީ، އިންތިހާބު ކާމިޔާބު ކުރެއްވި ކެންޑިޑޭޓް ނުވަތަ މެމްބަރު ކަމަށެވެ.

ޝޯޝަލް މީޑިއާގައި ވައިރަލް ވެފައިވާ ވީޑިއޯގައި ހަލީލް ވަނީ ޗަމްޕާ މުހައްމަދު މޫސާ ވިދާޅުވި ކަމަށް ބުނެ ހޯރަފުއްޓަށް ގިނަ ވައުދުތަކެއް ވެފައި އެވެ. އެގޮތުން:

އަލީ މޫސާ ހޮވުމުން ހޯރަފުށީގައި ހުރި އައިސްޕްލާންޓް މަސައްކަތް ހުއްޓިފައި ހުރުމުން ހޯރަފުށީގައި އާ އައިސް ޕްލާޓެއް ގާއިމުކޮށްދިނުން
އަލީ މޫސާ ހޮވުމުން ހޭންޑް ބޯޅަ އަދި ބަށި ބޯޅަ ކުޅެވޭ ގޮތައް އެންމެ ޒަމާނީ ބަށި ކޯޓެއް ގާއިމުކޮށްދިނުން
އަލީ މޫސާ ހޮވުމުން މުޅި އަތޮޅަށް ހުޅުވާލައިގެން މުޅި ރާއްޖޭގައި ބޭއްވޭ އެންމެ ބޮޑު ބަށި މުބާރާތް އަގު ބޮޑު އިނާމަކާއިއެކު ބާއްވަދިނުން
އަލީ މޫސާ ހޮވުމުން ހޯރަފުށީގައި ޒަމާނީ ފިޒިއޯތެރެޕީ ސެންޓަރެއް ގާއިމްކޮށްދިނުން
އަލީ މޫސާ ހޮވުމުން ވޯޓާ ސްޕޯޓްސް ސެންޓަރެއް ހޯރަފުށީ ޒުވާނުންނަށް ގާއިމްކޮށްދިނުން

ނަމަވެސް މިއަދު ހޯރަފުށީ ދާއިރާގެ ރައްޔިތުން ހާއްސަކޮށް ޒުވާނުންގެ ޝަކުވާއަކީ މި ސަރުކާރުގެ އިސްބޭފުޅަކު ހޯރަފުއްޓަށް ވަޑައިގެން އެދެއްކެވި ވާހަކައިގެ "ކުލަ" ނުޖެހުމެވެ. މީގެ އިތުރުން އަންނަ ލޯކަލް ކައުންސިލް އިންތިހާބަށް ސަރުކާރުގެ އިސް ވެރިން ރަށްރަށަށް ފުރަފުރައިގެން ދާއިރު ކުރިން ވީ ވައުދު ނުފުއްދި ހުރި ކަމުގެ ކަންބޮޑުވުން ދާއިރާ ތަކުގެ ރައްޔިތުން އަންނަނީ ފާޅުކުރަމުން ނެވެ.