އިންޑިއާ އައުޓް ކެމްޕޭނަކީ ގައުމީ ހަރަކާތެއް ނޫން: އެމްއެންޕީ

އިސްމާއިލް ރިޒާ

19 ޑިސެމްބަރ 2021 - 17:03

0 comments

ރާއްޖޭގައި ތިބި އިންޑިއާ ސިފައިން ބާލަން ކުރިއަށް ގެންދާ "އިންޑިއާ އައުޓް" ކެމްޕޭނަކީ ގައުމީ ހަރަކާތެއް ނޫން ކަމަށާއި އެކަމުގައި އެއްވެސް މީހަކު ބައިވެރި ނުވާން މޯލްޑިވްސް ނެޝަނަލް ޕާޓީ (އެމްއެންޕީ) އިން ގޮވާލައިފި އެވެ.

އެ ޕާޓީން ބޭއްވި ނިއުސް ކޮންފަރެންސެއްގައި، އެމްއެންޕީގެ ރައީސް، ދަނގެތި ދާއިރާގެ މެމްބަރު މުހައްމަދު ނާޒިމް ވިދާޅުވީ، ރާއްޖޭގައި ބޭރު ގައުމުތަކުގެ ސިފައިން ތިބުމަށް ދިވެހިން ބޭނުން ނުވާތީ އެމްއެންޕީ ވެސް ތިބޭނީ އެ ގޮތުގައި ކަމަށެވެ.

ނަމަވެސް، ޕީޕީއެމް/ޕީއެންސީ ކޯލިޝަނުން ފަށާފައިވާ "އިންޑިއާ އައުޓް" ކެމްޕެއިނަކީ ގައުމަށް ލިބޭ ވަރަށް ބޮޑު ދެރައެއް ކަމަށާއި އެއީ ގައުމީ ކެމްޕެއިނެއް ނޫން ކަމަށް އޭނާ ވިދާޅުވި އެވެ.

"މިއީ ގައުމީ ކެމްޕެއިނެއް ނޫން. އެމްއެންޕީ ގަބޫލެއް ނުކުރަން އިންޑިއާ އައުޓު ކެމްޕެއިނަކީ ގައުމީ ކެމްޕެއިން ކަމަށް. އެމްއެންޕީން އިލްތިމާސްކުރަން ރައްޔިތުން މީގައި ބައިވެރި ނުވާން،" ޔާމީންގެ ވެރިކަމުގެ ފުރަތަމަ ޑިފެންސް މިނިސްޓަރު ނާޒިމް ވިދާޅުވި އެވެ.

އިންޑިއާ އައުޓް ޖަހާފައިވާ ޓީޝާޓް ލައިގެން ބައެއް ފަތުރުވެރިން އުޅޭތީ އެކަން ފާހަގަކުރައްވަމުން ނާޒިމް ވިދާޅުވީ އެގޮތަށް އަމަލުކުރުމަކީ ރާއްޖެެއަށް ދެވޭ ދެރައެއް ކަމަށެވެ. އަދި އެފަދަ އަމަލުތައް ހިނގަމުންދާތީ އިންޑިއާ އައުޓް ކެމްޕޭން ނާޒިމް ސިފަކުރެއްވީ ޖަރީމާއެއްގެ ގޮތަށެވެ. އިންޑިއާ އައުޓް ކެމްޕޭންގެ ސަބަބުން ގައުމަށް ލިބޭނެ ގެއްލުންތަކެއް ހުންނާނެތީ ރައްޔިތުން އެކަމަށް "ހޭލުމަށް" ވެސް ނާޒިމް އެދިވަޑައިގެންނެވި އެވެ.

"އަޅުގަނޑު ހަމަ ވަރަށް އާދޭހާ އެކު ލޮބުވެތި ރައްޔިތުންނަށް ދަންނަވަން މިފަދަ ކަންކަމުގައި ބައިވެރިވެވަޑައި ނުގަންނަވާށޭ. އިގްތިސާދީ ގޮތުން ދިވެހިރާއްޖެއަށް ބޮޑެތި ގެއްލުންތަކެއް ވެގެން ހިނގައިދާނޭ. އަޅުގަނޑުމެން އުޅެންޖެހޭނީ މީހުންނާ އެކީގައި. އަޅުގަނޑުމެން އުޅެންޖެހޭނީ ބަވަނަ ވެފައި އޮތް ޒަމާނެއްގައި ހުރިހާ މީހުންނާ އެކީގައި. ވަކި އަމިއްލަ ފަރުދެއްގެ އަމިއްލަ ކަންކަން އިސްކޮށްގެން ކަންކަން ކުރުމުގެ ފުރުސަތު އަޅުގަނޑުމެން މިރާއްޖޭގައި ދީގެން ނުވާނެ.،" ނާޒިމް ވިދާޅުވި އެވެ.

ރާއްޖޭގައި އިންޑިއާގެ ސިފައިން ތިބުމާ ދެކޮޅަށް، އިދިކޮޅު ޕީޕީއެމް/ޕީއެންސީން ފަށާފައިވާ "އިންޑިއާ އައުޓް" ކެމްޕެއިން މާލޭގެ އިތުރުން އެހެން ރަށްރަށަށް ފުޅާކުރަން ކުރައްވާ ދަތުރުފުޅުގައި ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން މިފަހުން ވަނީ ކ. އަތޮޅުގެ ދެ ރަށަކަށް ވެސް ވަޑައިގެންފަ އެވެ.

ރާއްޖެ އޮތީ އިންޑިއާގެ އަޅުވެތިކަމުގެ ދަށުގައި ކަމަށް ވިދާޅުވެ, އެކަމުން ސަލާމަތްވުމަށް ރައްޔިތުން މަގުތަކަށް ނިކުމެ އަމަލީ މަސައްކަތް ފަށަން ޖެހިއްޖެ ކަމަށް ޕީޕީއެމްއިން ޤަބޫލުކުރެއެވެ.

އިންޑިއާ ސިފައިން ބޭރުކުރުމަށް ގޮވާލާ އިދިކޮޅުން ހަރަކާތެއް ފަށާފައިވާއިރު، އިދިކޮޅުން ވަނީ އިންޑިއާގެ އަސްކަރީ ފަރާތްތަކާއި ވަސީލަތްތައް ދިވެހި ބިމުން ބޭލުމަށް އިންޑިއާ ސަރުކާރަށް ގޮވާލާ ޕެޓިޝަނެއް ވެސް ތައްޔާރުކުރަން ފަށާފައެވެ.