ބީއެމްއެލްގެ އެހީގައި މޮޅަދޫގައި އިކޯ ޕާކެއް

އިސްމާއިލް ރިޒާ

10 މާޗް 2022 - 14:33

0 comments

ބީއެމްއެލް ކޮމިއުނިޓީ ފަންޑުގެ ދަށުން ހއ. މޮޅަދޫ ކުޅީގައި އީކޯ ޕާކެއް ގާއިމްކޮށްފިއެވެ.

މިއީ ރަށުގެ ހިތްގައިމު ކުޅީގެ ގުދުރަތީ ރީތިކަން އާންމުންނަށާއި ރަށަށް ޒިޔާރަތްކުރާ މީހުންނަށް ފަސޭހައިން ބަލާލައި ހިތްހަމަޖައްސައިލެވޭނެ މާހައުލެއް ގާއިމުކޮށްދިނުމަށް ހެދި ތަނެކެވެ. ގައުމީ ބޭންކުން ބުނި މީގެ ސަބަބުން ކުޅީގެ ގުދުރަތީ ރީތިކަން އަންނަން އޮތް ޖީލުތަކާ ހަމަޔަށް ދަމަހައްޓައި އެތަނުގެ މައުލޫމާތު ޒިޔާރަތްކުރާ މީހުންނާއި ހާއްސާކޮށް ރަށުގައި ޓޫރިޒަމް ފުޅާކުރުމަށް ވެސް އެހީއަކަށް ވާނެ ކަމަށެވެ.

މި ޕްރޮޖެކްޓްގެ ދަށުން ކުޅީގައި ވިއުވިން ޕްލެޓްފޯމަކާއި ކުޅި ހިމެނޭ ސަރަޙައްދުގައި ބެންޗާއި ޖޯލިފަތި، އުނދޯލި އަދި ޑަސްބިން ފަދަ ތަކެތި ބަހައްޓައި ސޯލާ ބައްތި ހަރުކޮށްފައިވެ އެވެ.

މި ޕްރޮޖެކްޓާ ގުޅޭގޮތުން ޕްރޮޖެކްޓް ކާމިޔާބު ކުރި ޗިލް ބްރޯސް ޖަމިއްޔާގެ ފަރާތުން ވިދާޅުވީ މިއީ އެ ރަށުގައި ލޯކަލް ޓްއަރިޒަމް ފުޅާކުރުމާއި އެ ރަށުގެ ރީތިކަން ރަށަށް ޒިޔާރަތްކުރާ ފަރާތަތްތަކަށް ފެންނާނެހެން ކުރިޔަށް ގެންދެވުނު ވަރަށް ހާއްސަ ޕްރޮޖެކްޓެއްކަމަށެވެ.

ކޮމިއުނިޓީ ފަންޑަކީ އާންމު ފަރުދުންނާއި ޖަމިއްޔާތަކުން މުޖުތަމައަށް ފައިދާކުރާނެ ޕްރޮޖެކްޓް ހިންގުމަށް އެހީތެރިވުމުގެ ގޮތުން ތައާރަފްކުރެވުނު ފަންޑެކެވެ. މި ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކަށާއި، ތަޢުލީމާއި، ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ. މިހާރު ބޭންކުން ދަނީ މިއަހަރުގެ ފުރަތަމަ ކުއާޓަރ އަށް ހުށަހެޅުނު ޕްރޮޕޯސަލްތައް އިވެލުއޭޓް ކުރުމުގެ މަސައްކަތްކުރަމުންނެވެ.

ބީއެމްއެލްގެ ކޮމިއުނިޓީ ފަންޑްގެ ދަށުން މިހާތަނަށް ރަށްރަށުގައި މިފަދަ 60 އަށް ވުރެ ގިނަ ޕްރޮޖެކްޓް ހިންގާފައިވެ އެވެ.