ފިލްމީތަރި ފައުޒިއްޔާ ނިޔާވެއްޖެ

އަލީ ރާޒީ

30 އޯގަސްޓް 2022 - 14:50

0 comments

ފިލްމް ހައްދުގެ މަންޒަރެއްގައި ފައުޒިއްޔާ --

ގިނަ ފިލްމްތަކެއްގެ މުހިންމު ރޯލްތަކެއް އަދާކޮށްފައިވާ ފައުޒިއްޔާ ހަސަން މިއަދު ނިޔާވެއްޖެ އެވެ. އަވަށްޓެރި ސްރީލަންކާގައި ދިރިއުޅެމުންދިޔަ ފައުޒިއްޔާ ނިޔާވީ މިއަދު ހެނދުނުގެ ވަގުތެއްގަ އެ ގައުމުގަ އެވެ.

އެނގިފައިވާ ގޮތުގައި އޭނާ ނިޔާވީ މެޔަށް ކުއްލިއަކަށް ތަދެއް އަރައިގެން ފަރުވާދެމުންދަނިކޮށެވެ.

ފައުޒިއްޔާއަކީ ރާއްޖޭގެ ފިލްމް އިންޑަސްޓްރީއަށް ގިނަ ދުވަސްތަކެއް ވަންދެން ޚިދުމަތްކޮށްދެއްވި ފަރާތެކެވެ. ގިނަ ބައެއްގެ މަގްބޫލްކަން ހޯދާފައިވާ ފައުޒިއްޔާ ފިލްމީ ދާއިރާގައި އުޅޭތާ 35 އަހަރަށް ވުރެން ގިނަ ދުވަސްވެއްޖެއެވެ. އޭނާ ވަނީ ދިވެހި އެތައް ފިލްމެއްގައި އާއި އެތައް ޑްރާމާއެއްގައި މަސައްކަތް ކޮށްފައެވެ.

ފައުޒިއްޔާ ފިލްމީ ދާއިރާ އަށް ނިކުތީ 1985 އަހަރު "ސިދާ" ކިޔާ ފިލްމަކުންނެވެ. އެންމެ ކުރިން ފެށިގެން ވެސް އޭނާ ފިލްމުތަކުގައި ކުޅެމުން އައީ މަންމަގެ ރޯލެވެ. އެހެންވެ، ފިލްމީ ދާއިރާގައި މަސައްކަތް ކުރާ ގިނަ ބަޔަކު އޭނާ އަށް މުހާތަބު ކުރަމުން އައިސްފައި ވަނީ ވެސް "ފައުޒިއްޔާ މަންމަ"ގެ ނަމުންނެވެ.

އޭނާގެ ދިގު ފިލްމީ ކެރިއަރުގައި 50 އަށް ވުރެ ގިނަ ފިލްމާއި ޑްރާމާ ސިލްސިލާތަކުގައި މަސައްކަތްކޮށްފައިވެ އެވެ.

އުމުރުން 80 އަހަރުގައި ފައުޒިއްޔާ ނިޔާވިއިރު މަޝްހޫރު ޑައިރެކްޓަރު މުހައްމަދު ނިޔާޒު, ޓެޑްރީގެ ކުރިއަށް އޮތް ފިލްމް, "ލަސްވިޔަސް"ގައި ވެސް އޭނާ ވަނީ މުހިންމު ރޯލެއް ކުޅަފަ އެވެ. އަދި ރިލީޒް ނުކުރާ އެ ފިލްމަކީ ފައުޒިއްޔާގެ އެންމެ ފަހުގެ ފިލްމީ މަސައްކަތަށްވާނެ އެވެ.