ޑާކްރެއިން އެންޓަޓެއިންމަންޓުން މިއަހަރު ގެނެސްދޭ ދެވަނަ ފިލްމު "މާމުއި" އޮލިންޕަހުގައި ސްކުރީންކޮށްފައިވާއިރު މި ފިލްމަކީ ވަރުގަދަ ކޮމެޑީއެއްކަން ބެލުންތެރިން ފާހަގަކޮށްފިއެވެ. ޑާކްރެއިން އެންޓަޓެއިންމަންޓްގެ އެންމެ އަގުބޮޑު ފިލްމު "މާމުއި" ޕްރިމިއާކޮށްފައިވަނީ މިމަހު އެއްވަނަ ދުވަހުގެ ރޭ އޮލިންޕަހުގައި އެވެ. މި ފިލްމުގެ ބައެއް މަންޒަރުތައް ޔޮޓެއްގަ އާއި ޖެޓެއްގައި ވެސް ވަނީ ނަގާފަަ އެވެ. އޮލިމްޕަހުން މީހުންތައް ނުކުތީ ހިތްހަމަޖެހިގެންނެވެ. "މާމުއި" ޕްރިމިއާ ހަފްލާގައި ބައިވެރިވި މީހަކު ބުނީ މިވަރުކަމެއް އަދި ދިމާނުވާކަމަށާއި ދިވެހިން ހެއްވާލި މިވަރު އުފެއްދުމެއް ދިވެހި ފިލްމް އިންޑަސްޓްރީން އުފަން ވެދާނެކަމަށް ކުރިން އުންމީދު ވެސް ނުކުރާކަމަށެވެ. ނަމަވެސް މި އުފެއްދުމުން ދިވެހި ފަންނާނުންގެ ފަންނުވެރިކަން ފެނި ހިއްހަމަޖެހުމެއް ލިބިއްޖެ ކަމަށް އޭނާ ބުންޏެވެ. ފިލްމުގެ ޑައިރެކްޓަރު އަލީ ޝިފާއު (ޗިއްޕެ) ބުނީ "މާމުއި" އަކީ މަސައްކަތްކުރެވުނު އެންމެ ތަފާތު އަދި އެންމެ ހިތްހަމަޖެހޭ އެންމެ މަޖާ މަސައްކަތް ކަމަށެވެ. އަދި ފިލްމަށް ބޮޑެތި މަސައްކަތްތަކެއް ކުރެވިފައިވާ ކަމަށާއި ބެލުންތެރިންނަށް ކަމުދާނެ ކަމަށް އުންމީދުކުރާ ކަމަށެވެ. މާމުއިގައި ހަރަކާތްތެރިވާ ތަރިންނަކީ އިސްމާއީލް ޖުމައިހް (ޖުމާ)، ސަމާހަތު ރާޒީ، ޝާޔާ، އަބްދުﷲ ޝާފިއު އިބްރާހިމް (ފުބޫ)، މަރިޔަމް މަޖުދާ (މަޖޫ)، އަހްމަދު ސުނީ، ހަމްދާން ފާރޫގް، އާދަމް ރިޒްވީ، މަރިއްޔާ، އައިމިނަތު ނޫރާ، އަހްމަދް އަމާން، ނުޒުހަތު ޝުއައިބު (ނުޒޫ) އަދި އަހްމަދު ޝާކިރުއެވެ. ދިވެހި ފިލްމު އިންޑަސްޓްރީގައި މިހާރު އެންމެ ޑިމާންޑް ބޮޑު ބަތަލާ މަރިޔަމް އައްޒަ، ކުޅަދާނަ ބަތަލާ ޝީލާ ނަޖީބު، އިބްރާހިމް އަމާން، މާރިއާ ތްރޭސާ އަދި އަލީ ޝަޒްލީމް ވެސް މި ފިލްމުން ފެނިގެންދާނެ އެވެ. މި ފިލްމު ޑައިރެކްޓް ކުރަނީ އަލީ ޝިފާއު (ޗިއްޕެ) އެވެ. ޕްރޮޑިއުސަރުންނަކީ މުހައްމަދު އަލީ (މޮގާ) އާއި އައިޝަތު ފުއާދު އެވެ. ގިނަ ބެލުންތެރިންގެ ތައުރީފު ފިލްމަށް ލިބެމުން އަންނަ އިރު އޮލިމްޕަސް ކައުންޓަރުން މިހާރުވެސް ފިލްމުގެ ޓިކެޓް ލިބެން އެބަހުއްޓެވެ. ބިޒީ ދިރިއުޅުން ކުޑަ ވަގުތުކޮޅަކަށް ތަފާތުކޮށްލުމަށް "މާމުއި" ތަޖުރިބާކޮށް ލުމުގެގޮތުން ބަލާލަން ދާން ރަނގަޅެވެ.