ދިރާގު ފައިބަ އިންޓަނެޓް މޮޅަދޫ އަށް

މަރިޔަމް އަނާ

31 އޯގަސްޓް 2022 - 16:04

0 comments

ދިރާގުގެ ހައިސްޕީޑް ފައިބަ އިންޓަނެޓްގެ ހިދުމަތް ހއ. މޮޅަދޫގައި މިއަދު ރަސްމީކޮށް އިފްތިތާހްކޮށްފި އެވެ.

އެ ހިދުމަތް ދިރާގުން ފަށާފައި ވަނީ އެ ރަށުގެ ކަސްޓަމަރުންނަށް ހާއްސަ އޮފާތަކާ އެކު އެވެ. އެ އޮފާގެ ދަށުން، ދިރާގު ފައިބަ ބްރޯޑްބޭންޑް ޕެކޭޖަށް އެޕްލައިކުރާ ކަސްޓަމަރުންނަށް ހިލޭ ގުޅައިދިނުމުގެ އިތުރުން ރައުޓަރު ހިލޭ ދޭނެ އެވެ.

ދިރާގުން ބުނީ މޮޅަދޫގެ ކަސްޓަމަރުންނަށް ހަލުވި ސްޕީޑާ އެކު ޑޭޓާ އެލަވަންސްގެ ހާއްސަ ޕެކޭޖުތަކެއް ވެސް އޮފާގެ ތެރޭގައި ހިމެނޭ ކަމަށެވެ.

ދިރާގުން ބުނީ މީހުން ދިރިއުޅޭ އެކި ރަށްރަށުގައި ދިރާގު ފައިބަ އިންޓަނެޓުގެ ހިދުމަތް ތައާރަފު ކުރަމުން އަންނަނީ ދިރާގުގެ ހިދުމަތްތައް އެންމެ ފުރިހަމައަށް ހުރިހާ ކަސްޓަމަރުންނަށް ވެސް ފޯރުކޮށްދިނުމަށް ކަމަށެވެ. އެގޮތުން ރާއްޖޭގެ ގޭބިސީގެ 85 އިންސައްތައަށް އެ ހިދުމަތް ތައާރަފުކޮށްފައިވާ ކަމަށް ދިރާގުން ބުންޏެވެ. އެ ކުންފުނިން ބުނީ 94 ރަށަކަށް އެ ހިދުމަތް މިހާރު ދޭން ފަށާފައިވާ ކަމަށެވެ.

ދިރާގުން ބުނީ އެ ކުންފުނިން އަބަދު ވެސް ބަލަނީ ކަސްޓަމަރުންނަށް ލުއި ފަސޭހަ ގޮތްތައް ހޯދައިދިނުމަށް ކަމަށެވެ. އެގޮތުން، އިނޮވޭޝަނާއި އެންމެ ފަހުގެ ޓެކްނޮލޮޖީ ބޭނުންކޮށްގެން ކަސްޓަމަރުންގެ ތަޖްރިބާ ރަނގަޅުކުރުމަށް އަބަދު ވެސް މަސައްކަތް ކުރަމުން ގެންދާނެ ކަމަށް އެ ކުންފުނިން ބުންޏެވެ.