ކަރަންޓު ކަނޑައިލީ ސްޓެލްކޯގެ އިހުމާލުން: އެފްއޭއެމް

އިސާއު އަހުމަދު

24 އޮކްޓޫބަރ 2022 - 11:11

0 comments

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަރަންޓު ކަނޑައިލީ ސްޓެލްކޯގެ އިހުމާލުން ކަމަށް އެ އެސޯސިއޭޝަނުން ބުނެފިއެވެ.

ކަރަންޓު ބިލަށް ނުދައްކާ އޮތް ޖުމްލަ 6.5 މިލިއަން ރުފިޔާއާއި ގުޅިގެން ސްޓެލްކޯ އިން ވަނީ އާދީއްތަ ދުވަހު އެ އިދާރާއިން ކަރަންޓު ކަނޑާލާފައެވެ. ސްޓެލްކޯއިން ބުނީ 2019 ވަނަ އަހަރުގެ ސެޕްޓެމްބަރު މަހުން ފެށިގެން މިދިޔަ ސެޕްޓެމްބަރު މަހާ ހަމައަށް އެފްއޭއެމުން ކަރަންޓް ބިލް ދައްކާފައި ނުވާ ކަމަށެވެ.

ސްޓެލްކޯ އިން ބުނީ އެ ކުންފުންޏަށް ނުދައްކާ ހުރި ފައިސާ ދެއްކުމަށް އެފްއޭއެމަށް އެކި ފަހަރު މަތިން އަންގާފައިވާ ކަމަށާއި މިގޮތަށް ނިންމީ އެފްއޭއެމުގެ ފަރާތުން މިކަމަށް ފުރިހަމަ އެއްބާރުލުން ނުލިބުމުން ކަމަށެވެ.

އެފްއޭއެމް އިން ރޭ ނެރުނު ބަޔާނެއްގައި ބުނެފައި ވަނީ އެ އިދާރާގެ ހައުސްއިން ކަރަންޓު ކަނޑާލާފައިވަނީ ޤަވާއިދާ ޚިލާފަށް ބިލް ކުރެވިފައިވާ އަދަދުތަކާއި ދިވެހި ދައުލަތުގެ އެކިއެކި ބޭނުމަށް އެފްއޭއެމް އިމާރާތް ބޭނުންކޮށްފައިވާ އަދަދުތަކާ އެކު ޖުމްލަ އަދަދެއް ކަނޑައަޅައިގެން ކަމަށާއި، އެ ޚަރަދުތަކަށް އެ އެސޯސިއޭޝަނުން ޒިންމާވާން ނުޖެހޭނެކަމަށެވެ.

"ދިވެހިރާއްޖޭގައި ކުޅިވަރު ކުޅުމަށް ބޭނުންކުރެވޭ ދަނޑުތަކާއި ކޯޓްތަކަކީ އެތަންތަނުގެ ކަރަންޓާއި ފެނުގެ ޚަރަދު ދައުލަތުގެ ފަރާތުން ބަލަހައްޓާ ތަންތަން ކަމުގައި ވީނަމަވެސް ފުޓުބޯޅަ ކުޅުމަށް ބޭނުންކުރެވޭ މާފަންނު ޓާފް ދަނޑަކީ އެތަނުގެ ހުރިހާ ޚަރަދެއް، އެފްއޭއެމް އިން ބަލަހައްޓަމުން އަންނަ ތަނެކެވެ. މިއީ އެފްއޭމް ފިޔަވައި ދިވެހިރާއްޖޭގެ އެހެން ގައުމީ އެސޯސިއޭޝަންތަކަށް ދައުލަތުގެ ފަރާތުން ފޯރުކޮށްދޭ އެހީތެރިކަމެކެވެ،" އެ ބަޔާނުގައިވެއެވެ.

އެފްއޭއެމްއިން ބުނީ އެކިއެކި ކަންކަމުގައި އިދާރާ ބޭނުންކުރާ ފަރާތްތަކަށް ނުބަލައި، މިއަދު ސްޓެލްކޯއިން އެ އިދާރާއާ ދޭތެރޭ އެޅި ފިޔަވަޅަކީ ޒިންމާދާރުކަން ކުޑަ އަމަލެއް ކަމަށެވެ. އޭގެ އިތުރުން އެފްއޭއެމްއިން ބުނީ ސްޓެލްކޯގެ އިހުމާލުން 2019 ވަނަ އަހަރާ ހަމަޔަށް 1.9 މިލިއަން ރުފިޔާ ކަރަންޓުގެ ހަރަދަށް ބިލް ކޮށްފައިވަނީ ނުބައިކޮށް ކަމަށް އެއްބަސްވެފައިވީ ނަމަވެސް، މިއަދާ ހަމަޔަށްވެސް އެ މައްސަލަ ހައްލުކުރަން ސްޓެލްކޯއިން މަސައްކަތް ނުކުރާ ކަމަށެވެ.

އެފްއޭއެމްއިން ބުނީ ނުދައްކާ ހުރި ބިލްތަކުގެ މައްސަލައިގައި ގާނޫނީ ފިޔަވަޅު ނާޅައި އޮތީ ދެފަރާތް އެކުވެ މަޝްވަރާ ކޮށްފައިވާތީ ކަމަށެވެ.

"ސްޓެލްކޯގެ ފަރާތުން އެފްއޭއެމްގެ އިދާރާ އެފްއޭއެމް ހައުސްއިން ކަރަންޓް ކަނޑާލާފައިވަނީ އެފަރާތުގެ އިހުމާލުން ގަވައިދާ ހިލާފަށް ބިލުކުރެވިފައިވާ އަދަދުތަކާއި ދިވެހި ދައުލަތުގެ އެކިއެކި ބޭނުމަށް އިމާރާތް ބޭނުންކުރެވުނު މުއްދަތުގެ ތެރޭގައި ކަރަންޓަށް ހިނގާފައިވާ ހަރަދުތަކާ އެކު ޖުމްލަ އަދަދެއް ކަނޑައަޅައި، އެފްއޭއެމްއިން އެކަމުގައި ޒިންމާ އަދާކުރަން ނުޖެހޭ އެތައް ކަމަކަށް މަތިކޮށްކަން ހިތާމަޔާ އެކު ފާހަގަކުރަން،" އެފްއޭއެމްއިން ބުނެފައިވެއެވެ.

އެފްއޭއެމް އިން ބުނީ އެ މައްސަލަ ހައްލު ކުރުމަށް ސްޓެލްކޯއާ މަޝްވަރާކުރުމަށް އެސޯސިއޭޝަން އަދިވެސް އޮތީ ތައްޔާރަށް ކަމަށެވެ.

ސްޓެލްކޯ އިން ބުނެފައި ވަނީ، އެފްއޭއެމް އިން އެ ފައިސާ ނުދައްކާ ނަމަ، އެފްއޭއެމްގެ އެހެން އިމާރާތްތަކުން ވެސް ކަރަންޓުގެ ހިދުމަތް މެދުކަނޑާލުމަށް ވިސްނަމުންދާ ކަމަށެވެ.

އެފްއޭއެމްއަށް މާލީ ގޮތުން ވަރަށް ބޮޑެތި ދަތިތަކެއް ވަނީ ކުރިމަތިވެފަ އެވެ. ގައުމީ ޓީމުގެ އޮފިޝަލުންނަށް މުސާރަ ނުދޭތާ ވެސް އެތައް މަހެއް ވެއްޖެ އެވެ. އެފްއޭއެމްގެ މުވައްޒަފުންގެ މަހު މުސާރަ ދޭން ވެސް ދޭތެރެ ދޭތެރެއިން ހުރަސްތައް ދިމާވެ އެވެ.