ހުޅުމާލޭގެ ސަރުކާރު އޮފީސް އިމާރާތަށް އުމަރު ޒާހިރުގެ ނަންފުޅު

މަރިޔަމް އަނާ

23 ޖެނުއަރީ 2023 - 13:56

0 comments

ހުޅުމާލޭގައި ހަދާފައިވާ ސަރުކާރުގެ އޮފީސް އިމާރާތަށް އަލްމަރްހޫމް އުމަރު ޒާހިރުގެ ނަންފުޅުން ނަން ދީފި އެވެ.

ރާއްޖޭގެ މި ޒަމާނުގެ އުމްރާނީ ތަރައްގީގެ އެއް ތަނބުގެ ގޮތުގައި ފާހަގަކުރެވޭ އަލްމަރްހޫމް އުމަރު ޒާހިރަކީ ގައުމީ އަދި އިޖުތިމާއީ ގޮތުން ކުރެވުނު ބޮޑެތި މަސައްކަތްތަކުގައި ހަރަކާތްތެރިވެ ވަޑައިގަތުމުގެ އެފަދަ ދެވަނަ އެއް ނުވާ ނަމޫނާ ޝަހްސިއްޔަތެއްގެ ވެރި ބޭފުޅެކެވެ. މާލެ ސަރަހައްދަށް ޒަމާނީ ތަރައްގީ އާއި ކުރިއެރުން ހޯދައިދިނުމުގައި އިސް ދައުރެއް އަދާ ކުރެއްވި އެއް ބޭފުޅަކީ ވެސް އުމަރު ޒާހިރެެވެ.

އުމަރު ޒާހިރު ވަނީ 1953 ވަނަ އަހަރުން ފެށިގެން 2008 ވަނަ އަހަރާއި ހަމައަށް ސަރުކާރުގެ އެކި ފަންތީގެ 26 މަގާމެއް ފުރުއްވާފަ އެވެ. އެމނަިކުފާނު އަވަހާރަވީ ޑިސެމްބަރު 21، 2021 ގައެވެ.

ހުޅުމާލޭ ފުރަތަމަ ފިޔަވަހީގެ ޓްރީޓޮޕް ހޮސްޕިޓަލް ކައިރީގައި ހެދި މި އޮފީސް އިމާރާތުގެ ގްރައުންޑް ފްލޯ އަދި ފުރަތަމަ ފަންގިފިލާ ޚާއްސަކޮށްފައި ވަނީ ޕާކިންއަށް ބޭނުން ކުރުމަށެވެ. އަދި އިމާރާތައް ބަދަލުކުރާ އޮފީސްތައް ހިންގާނީ ދެވަނަ ފަންގިފިލާއިން ފެށިގެން 5 ވަނަ ފަންގިފިލާއާއި ހަމައަށެވެ. އަދި އިމާރާތުގެ އެންމެ މަތި 6 ވަނަ ފަންގިފިލާ ޚާއްސަކޮށްފައި ވަނީ މީޓިން ރޫމްތަކާއި، ސެމިނާ ރޫމެއްގެ އިތުރުން ޓެރަހަށެވެ.

ޕްލޭނިން މިނިސްޓްރީން އަންނަނީ އަންނަ މަހުގެ 15 ވަނަ ދުވަހު މި އޮފީސް އިމާރާތް ހުޅުވުމަށްޓަކައި މަސައްކަތް ކުރަމުންނެވެ.

ހުޅުމާލޭގައި ސަރުކާރުގެ އޮފީސް އިމާރާތެއް އެޅުމަށް ނިންމީ ސަރުކާރުގެ ވަރަށް ގިނަ އޮފީސްތަކެއް ބޮޑު ހޭދައެއްކޮށް އަމިއްލަ ތަންތަން ވަކި މުއްދަތެއްނެތި ކުއްޔަށް ހިފައިގެން އުޅެންޖެހިފައި ވުމާއެކު، އެކަމަށް ހައްލެއް ގެނައުމަށްޓަކައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް 2019 ވަނަ އަހަރު ނިންމެވުމާ ގުޅިގެންނެވެ.