ގޮތް ނޭނގޭ ޖަނަވާރެއް ފެނިގެން ސިފައިން ހަރަކާތްތެރިވަނީ

މަރިޔަމް އަނާ

26 ޖޫން 2023 - 21:43

0 comments

ނ. މާފަރު އިންޓަނޭޝަނަލް އެއާޕޯޓުން މިނިކާވަގެއްކަމަށް ބެލެވޭ އެއްޗެއް ފެނިގެން އެމްއެންޑީއެފުން އެ ތަން ބަލާ ފާސްކުރަން ފަށައިފިއެވެ.

މާފަރު އެއާޕޯޓު ރަންވޭ ކައިރިން އިމާރާތްތައް ނުހުންނަ ސަރަހައްދެއްގައި ހަތަރުފައި ހުރި ޖަނަވާރެއް ހިނގާފައިދާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. ބަޔަކު ދުރުގައި ތިބެގެން ނަގާފައިވާ އެ ވީޑިއޯއިން ފެންނަ ފެނުމުގައި އެ ޖަނަވާރު ބުޅަލަކަށް ވުރެ ބޮޑެވެ.

ކައުންސިލުން ވިދާޅުވީ މިހާތަނަށް ބެލިބެލުމުން މިނިކާވަގުގެ އެއްވެސް ނިޝާނެއް މިހާތަނަށް ފެނިފައިނުވާކަމަށެވެ. އަދި އޭތި ރަށުތެރެއަށް އެރިކަމެއް އަދި ނޫންކަމެއްވެސް ޔަގީންނުވާކަމަށް އެމްއެންޑީއެފްއާ ހަވާލާދެއްވައި މާފަރު ކައުންސިލް އިދާރާއިން ވިދާޅުވެއެވެ.

މިއަދު އިރުއޮއްސެނިކޮށް ލިބުނު މި ރިޕޯޓާއި ގުޅިގެން ރަށުގެ ރައްޔިތުން ސަމާލުވުމަށް ކައުންސިލުން ވަނީ އިލްތިމާސްކޮށްފައެވެ.