ސިއްހީ ދާއިރާ ހަރުދަނާކުރަން ތައިލެންޑާއެކު އެއްބަސްވުމެއް

އިސްމާއިލް ރިޒާ

20 މެއި 2025 - 21:35

0 comments

ސިއްހީ ވަސީލަތްތައް ހަރުދަނާކުރުމަށް ރާއްޖެއާއި ތައިލެންޑާ ދެމެދު އެއްބަސްވުމެއްގައި ސޮއިކޮށްފި އެވެ.

ތައިލެންޑްގެ ޕަބްލިކް ހެލްތު މިނިސްޓްރީއާ އެކު ރާއްޖެއިން މި ފަހުމުނާމާގައި ސޮއިކޮށްފައި ވަނީ ސްވިޓްޒަލޭންޑްގެ ޖެނީވާގައި މިހާރު ކުރިއަށްދާ ދުނިޔޭގެ ސިއްހަތު ޖަމިއްޔާގެ 78 ވަނަ ވޯލްޑް ހެލްތު އެސެމްބްލީގެ ހަވާސާގަ އެވެ.

ރާއްޖޭގެ ހެލްތު މިނިސްޓްރީން ނެރުނު ނޫސް ބަޔާނެއްގައި ބުނިގޮތުގައި މި އެމްއޯޔޫގެ ދަށުން އެހީތެރިކަން ފޯރުކޮށްދިނުމަށް ހަމަޖެހިފައިވާ މައިގަނޑު ފަސް ކަމަކީ:

ރާއްޖޭގައި ޕްރައިމަރީ ހެލްތުކެއާގެ ހިދުމަތްތައް ހަރުދަނާކުރުން
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ރެގިއުލޭޓަރީ ހިދުމަތް ހަރުދަނާ ކުރުން
ސިއްހީ ދާއިރާގެ އިންސާނީ ވަސީލަތްތައް ހަރުދަނާކުރުން
ހެލްތު ޕޮލިސީ، ހެލްތު ސިސްޓަމް ރިސާޗް އަދި ހެލްތު އިންފޮމޭޝަން އެންޑް ޓެކްނޮލޮޖީ ހަރުދަނާކުރުން
ސިއްހީ ދާއިރާގެ ކުރިއެރުމަށް ބޭނުންވާ އިނޮވޭޓިވް ސަސްޓެއިނަބަލް ފައިނޭންސިންއަށް އެހީތެރިކަން ހޯދުން

އެއްބަސްވުމުގައި ސޮއި ކުރުމަށްފަހު ވާހަކަ ދައްކަވަމުން ހެލްތު މިނިސްޓަރު، އަބްދުالله ނާޒިމް ވަނީ ރާއްޖެ އާއި ތައިލޭންޑާ ދެމެދު ސިއްހީ ދާއިރާއިން ގުޅުން ބަދަހިކުރުމުގެ ޝައުގުވެރިކަން ހުރިކަން ފާހަގަކުރައްވައި އެ ގުޅުން އިތުރަށް ވަރުގަދަ ކުރުމަށް ރާއްޖެއިން އަބަދުވެސް މަސައްކަތް ކުރައްވާނެ ކަމުގެ ޔަގީންކަން ދެއްވައިފަ އެވެ.

މިއަދު ސޮއި ކުރި އެއްބަސްވުމައކީ ދެ ގައުމގެ ދެމެދުގައި އޮންނަ ގުޅުން ބަދަހި ކުރުމަށްޓަކައި ކުރާ މަސައްކަތަށް ލިބުނު ކާމިޔާބެއް ކަމަށް ނާޒިމް ސިފަ ކުރެއްވި އެވެ.

ދިވެހިރާއްޖޭގެ ސިއްހީ ދާއިރާ ކުރިއެރުވުމަށް ތައިލޭންޑުން ޒަމާނުއްސުރެ ވެދެމުންދާ އެހީތެރިކަމާއި ފޯރުކޮށްދޭ ތަޖުރިބާއަށް ނާޒިމް ޝުކުރު އަދާ ކުރެއްވި އެވެ.