ތައިލެންޑުގެ އާ ބޮޑުވަޒީރަކީ އަނުތިން ޗާންވިރަކުލް

ހަސަން ހަލީމް

06 ސެޕްޓެމްބަރ 2025 - 00:07

0 comments

ތައިލެންޑްގެ ޕާލަމެންޓުން އެގައުމުގެ އާ ބޮޑުވަޒީރުކަމަށް އިދިކޮޅު ކޮންޒަވޭޓިވް ބޫމްޖައިތައި ޕާޓީގެ ލީޑަރު އަނޫތިން ޗާންވިރަކުލް އިންތިހާބުކޮށްފި އެވެ.

ގައުމުގެ ސިޔާސީ މަސްރަހު ހަލަބޮލިވެފައި ވަނިކޮށް އާ ބޮޑުވަޒީރެއް އައްޔަނު ކުުރުމަށް އެ ގައުމުގެ ގާނޫނުހަދާ މަޖިލީހުގައި މިއަދު ވަނީ ވޯޓު ލައިފަ އެވެ.

ބޮޑުވަޒީރަކަށް ބޭފުޅަކު އިންތިހާބުކުރަން ތައިލެންޑް ޕާލަމެންޓްގައި މިއަދު ވޯޓެއް ނެގީ އެންމެ ފަހުން އެ މަގާމުގައި ހުންނެވި ޕެޓޮންގްޓާން ޝިނަވަޓްރާ އެ މަގާމުން ވަކިކުރުމުންނެވެ. އޭނާ މަގާމުން ވަކިކުރީ ތައިލެންޑާއި ކެމްބޯޑިޔާ ގުޅޭ ބޯޑަރުގައި ދެގައުމުގެ ދެމެދު ހިނގި ހަމަނުޖެހުންތަކާ ގުޅިގެން ކެމްބޯޑިއާގެ ބޮޑުވަޒީރަށް އޭނާ ކުރެއްވި ފޯންކޯލެއްގައި ސުލޫކީ މިންގަނޑާ ހިލާފުވި މައްސަލަ ބެލުމަށް ފަހުގަ އެވެ.

ޕެޓޮންގްޓާން ޝިނާވަތްރާ އަކީ ތައިލެންޑްގެ ކުރީގެ ބޮޑުވަޒީރު ތަކްސިން ޝިނަވަތްރާގެ ދަރިކަނބަލުންނެވެ. އެކަމަނާއަކީ ވަރަށް ޒުވާން އަދި ވެރިކަމުގެ ތަޖުރިބާ ވަރަށް ކުޑަ ބޭފުޅެކެވެ. މި ގޯސް ހެއްދެވުނީ އެކަމުގެ ސަބަބުން ކަމަށް ވަނީ ބެލެވިފައެވެ.

ތައިލެންޑްގައި އެންމެ ބާރުގަދަ ފަރާތަކީ އެގައުމުގެ ރަސްގެފާނެވެ. ދެން އެގައުމުގެ އަސްކަރިއްޔާ އެވެ. ތައިލެންޑްގެ އަސްކަރިއްޔާ އެގައުމުގެ ސިޔާސީ މަސްރަހުގައި ބާރުގަދަވުމުގެ ސިއްރަކީ އެގައުމުގެ ރަސްކަމުގެ ނިޒާމަށް ލޯކަނު ތާއީދެއްކޮށް ރަސްކަމުގެ ނިޒާމު ދަމަހައްޓަން އެހީތެރިވާތީ ކަމަށް އެގައުމުގެ މަސްރަހު ދިރާސާ ކުރާ ފަރާތްތައް ބުނެއެވެ.

ޕެޓޮންގްޓާން ބޮޑުވަޒީރުކަމުގެ މަގާމުން ދުރުކުރީ ތައިލެންޑްގެ ދުސްތޫރީ ކޯޓުން ކަމަށްވިޔަސް މިކަމުގެ ފަހަތުގައި ތައި އަސްކަރިއްޔާ އޮތުމަކީ އެކަށީގެންވާ ކަމެއްކަމަށް ރިޕޯޓްތައް ބުނެއެވެ.

ޕެޓޮންގްޓާން އަކީ 2008 ގެ ފަހުން ތައިލެންޑުގައި މަގާމުން ދުރުކުރި ފަސް ވަނަ ބޮޑުވަޒީރެވެ. މަގާމުން ދުރުކުރި ބޮޑުވަޒީރުންގެ ތެރޭގައި ޕެޓޮންގްޓާން ގެ ބައްޕަ ތަކްސިން ޝިނަވަތްރާއާއި އާއި އެކަމަނާގެ ބޮޑުދައިތަ ޔަންގްލަކް ޝިނަވަތްރާ ހިމެނިވަޑައިގަންނަވައެވެ. ތައިލެންޑަށް މިހާތަނަށް އަސްކަރީ 17 އިންގިލާބު ގެނަސްފައިވެއެވެ.

ތައިލެންޑްގައި ބޮޑުވަޒީރުން މަގާމުން ދުރުކުރަނީ އަސްކަރިއްޔާއިން އިންގިލާބު ގެނަސްގެންނާއި ދަސްތޫރީ ކޯޓު މެދުވެރިކޮށް އެކަމަށް ގާނޫނީ އަމުރުތައް ނެރެގެންނެވެ.

ތައިލެންޑް ޕާލަމެންޓްގެ ތިރިގެ، ހައުސް އޮފް ރެޕްރެޒެންޓެޓިވްސް ގައި 492 މެންބަރުން ތިއްބަވާ އިރު އަނޫތިން އެ މަގާމު ކާމިޔާބު ކުރެއްވީ 311 ވޯޓު ހޯއްދަވައިގެންނެވެ. އެ މަގާމު ހޯދުމަށް ހޯދަން ޖެހޭ ވޯޓުގެ އަދަދަކީ 247 އެވެ.

އޭނާއާ ވާދަކުރެއްވި ޗައިކަސިމް އަށް 152 ވޯޓު ލިބިވަޑައިގެންނެވި އިރު 27 މެންބަރަކު ވަކިކޮޅަކަށް ވޯޓެއް ނުދެއްވަ އެވެ. އަދި ޗައިކަސިމް ޕާޓީގެ ނުވަ މެންބަރަކު ވެސް ޕާޓީ ވިޕާ ހިލާފަށް ވޯޓު ދެއްވީ އަނޫތިން އަށެވެ.

އަލްޖަޒީރާއިން ބުނީ މަދު ދުވަސްކޮޅެއްގެ ތެރޭގައި އަނޫތިން މަގާމުގެ ހުވާ ކުރައްވައި ސަރުކާރު އެކުލަވާލާނެ ކަމަށް ބެލެވޭ ކަމަށެވެ. އޭނާއަށް މަގާމުގެ ހުވާކުރެއްވޭނީ ތައިލެންޑްގެ ރަސްގެފާނު އޭނާ އެ މަގާމަށް ރަސްމީކޮށް އައްޔަން ކުރެއްވުމުންނެވެ.