އެއާޕޯޓު އެމަޖެންސީ އެކްސަސައިޒަށް ތައްޔާރުވަނީ

އަލީ ރާޒީ

21 ޖެނުއަރީ 2024 - 20:28

0 comments

ދުނިޔޭގެ ވައިގެ ދަތުރުފަތުރުގެ ކަންތައްތައް ބަލަހައްޓާ އިންޓަނޭޝަނަލް އޭޖެންސީ ކަމަށްވާ އައިކާއޯ އިން ހުރިހާ އެއާޕޯޓަކަށް އަހަރަކު އެއް ފަހަރު ހިންގުމަށް މަތިކޮށްފައިވާ އެއާޕޯޓް އިމަޖެންސީ އެކްސަސައިޒަށް ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް) އިން ތައްޔާރުވާން ފަށައިފި އެވެ.

މި އެކްސަސައިޒްގެ ބޭނުމަކީ އެމަޖެންސީ ހާލަތެއް ދިމާވެއްޖެނަމަ އެއާޕޯޓާއި އަދި އެއާޕޯޓް ހިމެނޭ ސަރަހައްދުގައިވާ ގުޅުންހުރި މުއައްސަސާތައް އަމަލުކުރަން ކަނޑައަޅާފައިވާ އުސޫލުތައް ބަލާ، މުރާޖައާކޮށް އަދި އެއަށް ފަރިތަވުމެވެ.

މި ތަމްރީންތަކުގައި އެއާޕޯޓާއި، ކައުންސިލްތަކާއި، ޕޮލިސް، އެމްއެންޑީއެފް، އަދި ހެލްތް ސެންޓަރުތައް ބައިވެރިވާނެ ކަމަށް އާރްއޭސީއެލް އިން ބުނެ އެވެ.

އާރުއޭސީއެލް އިން އަންނަނީ ރާއްޖޭގެ ހަ ޑޮމެސްޓިކް އެއާޕޯޓެއް ހިންގަމުންނެވެ. އެއީ ހއ. ހޯރަފުށި އެއާޕޯޓް، ހދ. ކުޅުދުއްފުށި އެއާޕޯޓް، ހދ. ހަނިމާދޫ އިންޓަނޭޝަނަލް އެއާޕޯޓު، ށ. ފުނަދޫ އެއާޕޯޓް، ގދ. މާވަރުލު އެއާޕޯޓް، ގދ ފަރެސްމާތޮޑާ އެއާޕޯޓް އަދި ފުވައްމުލަކު އެއާޕޯޓެވެ.