މުލީ އެއާޕޯޓަށް މާޗް މަހު ޓެސްޓް ފްލައިޓް ޖައްސަނީ

އިސްމާއިލް ރިޒާ

23 ޑިސެމްބަރ 2024 - 13:21

0 comments

މ. މުލީގައި ހަދަމުން އަންނަ އެއާޕޯޓްގެ މަސައްކަތް މިހާރު ވަރަށް ބާރަށް ކުރިއަށްދާ ކަމަށާއި އެތަނަށް އަންނަ އަހަރުގެ މާޗް 1 ގައި ޓެސްޓް ފްލައިޓް ބާއްވާނެ ކަމަށް ރީޖަނަލް އެއާޕޯޓްސް ކޮމްޕެނީ (އާރްސީއެލް) އިން ބުނެފި އެވެ.

ދައުލަތުގެ މީޑިއާގައި ވާހަކަ ދައްކަވަމުން އާރްއޭސީއެލްގެ މެނޭޖިން ޑިރެކްޓަރު އަހުމަދު މުބީން ވިދާޅުވީ މުލީ އެއާޕޯޓްގެ މަސައްކަތް ނިންމައި މާޗް ފުރަތަމަ ދުވަހު ޓެސްޓް ފްލައިޓް ޖެއްސުމަށް މަސައްކަތް ކުރަމުންދާ ކަމަށެވެ.

މުބީން ވިދާޅުވި ގޮތުގައި މިހާރު ކުރިއަށްދަނީ އެއާޕޯޓް ހުޅުވުމަށް ވާންޖެހޭ ފަހުގެ ތައްޔާރީތަކެވެ.

އެ ގޮތުން އެއާޕޯޓަށް ބޭނުންވާ ވެހިކަލާއި މެޝިނަރީ ހޯދުމުގެ އިތުރުން އޮފީސް ބައިގެ މަސައްކަތް ނިންމުމާއި އަލިފާން ނިއްވުމަށް މީހުން ނަގައި ތަމްރީންކުރުމުގެ މަސައްކަތް ކުރަމުންދާ ކަމަށް މުބީން ވިދާޅުވި އެވެ.

އެ އެއާޕޯޓް މަޝްރޫއު އެ ކުންފުންޏާ ހަވާލުކުރީ ފެބްރުއަރީ 28، 2021 ގަ އެވެ. އެއާޕޯޓް ތަރައްގީ ކުރުމުގެ މަސައްކަތް އެމްޓީސީސީއާ ހަވާލުކުރީ 212 މިލިއަން ރުފިޔާއަށެވެ. މި އެއާޕޯޓްގެ އަމަލީ މަސައްކަތް ފެށީ 2021 ގެ އޮގަސްޓް މަހުގެ ތެރޭގަ އެވެ.

އޭރު އަމާޒު ހިފީ މިދިޔަ އަހަރުގެ މެދުތެރޭގައި އެއާޕޯޓް ހުޅުވުމަށެވެ. ނަމަވެސް މަސައްކަތް ނުނިމި ދިގުލައިގެން ދިޔައީ ފައިސާގެ ތާށިކަމާ ހުރެ އެމްޓީސީސީން ބުނެފައިވެ އެވެ.