ހިނިތުންވުން ރީތިކުރުމަށް އޮޕަރޭޝަން ކުރި ޒުވާނަކު މަރުވެއްޖެ

އަބޫ ފުރުޤާން ޢޖ

22 ފެބުރުއަރީ 2024 - 13:19

0 comments

އިންޑިއާގެ ހައިދަރުއާބާދުގައި ހިނިތުންވުން ރީތި ކުރުވުމަށް "ސްމައިލް އެންހަންސްމަންޓް" ސާޖަރީއެއްގެ ތެރޭގައި މީހަކު މަރުވެއްޖެ އެވެ.

އިންޑިއާގެ ޓީވީ ޗެނަލް އެންޑީޓީވީން ބުނި ގޮތުގައި ފުލުހުން ބުނީ އުމުރުން 28 އަހަރުގެ ލަކްޝްމީ ނަރަޔަނާ ވިންޖަން މަރުވީ ހުކުރު ދުވަހު ހައިދަރުއާބާދުގެ އެފްއެޗްއެސް އިންޓަނޭޝަނަލް ޑެންޓަލް ކްލިނިކްގެ ފޭސް މޭކްއޮވް އެންޑް ސްމައިލް ކްލިނިކްގައި ސާޖަރީއެއް ހަދަމުން ދަނިކޮށެވެ.

ރިޕޯޓްތައް ބުނާ ގޮތުގައި ލަކްޝްމީ ނަރަޔަނާ ވިންޖަންގެ ބައްޕަ ވަނީ އޭނާގެ ދަރިފުޅު މަރުވީ އެނެސްތެޓިކް އޯވަޑޯޒް އެއްގެ ސަބަބުން ކަމަށް ބުނެފަ އެވެ.

ފުލުހުންގެ އެސްއެޗްއޯ ވެންކަޓެޝްވަރެޑީ އެންޑީޓީވީއަށް ވިދާޅުވީ ފެބްރުއަރީ 16 ވަނަ ދުވަހުގެ ހެނދުނު 2:30 ހާއިރު ލަކްޝްމީ ނަރަޔަނާ ހޮސްޕިޓަލަށް އައިސްފައިވާ ކަމަށާ ގާތްގަނޑަކަށް ދެ ގަޑިއިރު ވަންދެން ކުރިއަށް ގެންދިޔަ އޮޕަރޭޝަންގައި ޒުވާނާ މަރުވުމުން މިހާރު ވަނީ އެ ހަށިގަނޑު ޕޯސްޓްމޯޓަމް ހެދުމަށް ފޮނުވާފައެވެ. މަރުވި ލަކްޝްމީ ނަރަޔަނާ ކައިވެނި ކުރަން ހަމަޖެހިފައި އޮތީ އަންނަ މަހު އެވެ.

ލަކްޝްމީ ނަރަޔާނާ މަރުވުމަށްފަހު އޭނާގެ އާއިލާއިން ވަނީ ކްލިނިކް މެނޭޖްމަންޓްގެ އިހުމާލުގެ މައްސަލަ ހުށަހަޅާފައެވެ.

އެފްއެޗްއެސް އިންޓަނޭޝަނަލްގެ ވެބްސައިޓުން ބުނާ ގޮތުގައި އެއީ އިންޑިއާގައި އެންމެ ގިނަ އެވޯޑް ލިބޭ ޑެންޓަލް ކްލިނިކެވެ. އިންޓަނޭޝަނަލް ޑެންޓަލް ކްލިނިކަށް 2017 ވަނަ އަހަރުން ފެށިގެން 55 އަށް ވުރެ ގިނަ އެވޯޑް ލިބިފައިވެ އެވެ.