ދިރާގު ޓެސްލާ ޕްރޮމޯޝަންގެ ގުރު ނެގުން ބޮޑު އީދުގައި

ހަސަން ހަލީމް

19 މާޗް 2024 - 14:23

0 comments

ދިރާގު ޕްރޮމޯޝަނުގައި ދޭ ޓެސްލާ ކާރު. -- ފޮޓޯ: ދިރާގު

ދިރާގުގެ "ވިން އަ ޓެސްލާ" ޕްރޮމޯޝަނުގެ ގުރުއަތު ނެގުން އޮންނާނީ އަލްހާ އީދު ދުވަސް ކަމަށްވާ ޖޫން މަހުގެ 17 ވަނަ ދުވަހު ކަމަށް ދިރާގުން އިއުލާނުކޮށްފި އެވެ.

ރާއްޖޭގެ އެންމެ ބޮޑު މުއާސަލާތީ ކުންފުނިން ހިންގި މި ޕްރޮމޯޝަނަކީ ދިރާގުގެ 35ވަނަ އަހަރީ ދުވަސް ފާހަގަކުރުމުގެ ގޮތުން ކަސްޓަމަރުންނަށް ޓެކްނޮލޮޖީގެ އެހީގައި ތަފާތު، އައު ތަޖުރިބާއެއް ފޯރުކޮށްދިނުމުގެ މަގުސަދުގައި އެ ކުނުފުނިން ތައާރަފުކުރި ހަރަކާތެކެވެ. އެގޮތުން މި ޕްރޮމޯޝަނަށް ކަސްޓަމަރުންގެ ހޫނު ތަރުހީބެއް ވަނީ ލިބިފައިވާ ކަމަށް ދިރާގުން ބުނެ އެވެ. އަދި މި އިނާމު ލިބޭ ފަރާތް އެނގުމުގެ ޝައުގުވެރިކަން ވަނީ އާންމުންގެ މެދުގައި އިތުރުވެފައި ކަމަށް ވެސް އެ ކުންފުނިން ބުނެ އެވެ.

މި ޕްރޮމޮޝަނުގައި ބައިވެރިވުމަށް މިދިޔަ ޖެނުއަރީ މަހުގެ 31 ވަނަ ދުވަހުގެ ކުރިން ކަސްޓަމަރުން ވަނީ ދިރާގު ޕޯސްޓް ޕެއިޑް 450 ނުވަތަ ފައިބާ ބްރޯޑްބޭންޑް 30M އިން މަތީގެ ޕްލޭން ތަކަށް ސަބްސްކްރައިބް ކޮށްފައެވެ.

އަދި މި ގޮތަށް އެންރޯލް ވީ ކަސްޓަމަރުންނަށް ގުރުވަތުގައި ބައިވެރިވެވޭނީ އޭރު ސަބްސްކްރައިބު ކުރި ޕްލޭނުގައި އަންނަ ޖޫން މަހުގެ 17 ގެ ނިޔަލަށް މަޑުކޮށްގެން ކަމަށްވެސް ދިރާގުން ބުނެއެވެ. އަދި މި މުއްދަތުގެ ތެރޭގައި މި ޕްލޭންތައް އަޕްގްރޭޑު ކުރެވޭނެ ކަން ވެސް ދިރާގުން ވަނީ ފާހަގަ ކޮށްފައެވެ.

ޕްރޮމޯޝަން ނިމުމުގެ ކުރިން ބޭއްވި ދެ އިވެންޓެއްގައި މި ޕްރޮމޯޝަނުގެ ދަށުން ދެވޭ ޓެސްލާ އާންމުންނަށް ވަނީ ދައްކައިލައިފައެވެ.

ދިރާގުން ބުނީ އެ ކުންފުނިން އަބަދުވެސް މަސައްކަތް ކުރަނީ އެ ކުންފުނީގެ ކަސްޓަމަރުންނަށް ގިނަ އޮފާތައް ހެޔޮ އަގުގައި ފޯރުކޮށްްދިނުމަށް ކަމަށެވެ.

ދިރާގުން ބުނީ މި ޕްރޮމޯޝަނަށް ކަސްޓަމަރުންގެ ހޫނު ތަރުހީބެއް ލިބިފައިވާ ކަމަށެވެ.