ހޯރަފުށީ ކައުންސިލުން މަޖިލީހުގެ އިންތިހާބަށް ނުފޫޒު ފޯރުވާ:ޕީޕީއެމް/ޕީއެންސީ

އިސްމާއިލް ރިޒާ

14 އޭޕްރީލް 2024 - 17:46

0 comments

ހއ. ހޯރަފުށީ ކައުންސިލުން ރައްޔިތުންގެ މަޖިލީހުގެ އިންތިހާބަށް ނުފޫޒު ފޯރުވުމަށް މަސައްކަތް ކުރަމުންދާ ކަމަށް ތުހުމަތުކޮށް އެ މައްސަލަ ކަމާ ބެހޭ މުވައްސަސާތަކުން ބެލުމަށް ޕީޕީއެމް/ޕީއެންސީ ކޯލިޝަނުން ގޮވާލައިފި އެވެ.

ކޮންގްރެސް ކޯލިޝަނުން މިއަދު ނެރުނު ބަޔާނެއްގައި ބުނެފައިވަނީ އެމްޑީޕީގެ މެޖޯރިޓީ އޮންނަ ހޯރަފުށީ ކައުންސިލުން ސަރުކާރު ކެންޑިޑޭޓަށް އެންޓި ކެމްޕެއިން ކުރުމުގެ އިތުރުން، އެ ރަށުގައި ހުރި ކައުންސިލްގެ ހުރިހާ ވަސީލަތްތައް ބޭނުން ކުރަމުންދާ ކަމަށެވެ.

އެ ގޮތުން މަޖިލިސް އިންތިހާބާ ދިމާކޮށް ކައުންސިލުން ގޯތި ދިނުމާއި މިހާރު ކައުންސިލުން ބިން ދޫކޮށްފައިވާ ފަރާތްތަކުގެ ބިން ބޮޑުކޮށްދޭނެ ކަމަށް ވެސް އެ ކައުންސިލުން ބުނަމުންދާ ކަމަށް ކޮންގްރެސް ކޯލިޝަނުން ވަނީ ބުނެފަ އެވެ.

ހޯރަފުށީ ކައުންސިލްގެ މުވައްޒަފުން ކެމްޕެއިންގައި ބޭނުންކުރުމާއި، ތަނުގައި ހުރި ވެހިކަލްތަކާއި ޕްރިންޓަރާއި ކަރުދާހާއި އެހެނިހެން ވަސީލަތްތައްވެސް ބޭނުންކުރަމުންދާ ކަމަށާއި، އެ ކައުންސިލްގެ އަމާޒު ހުރީ ގާނޫނުން އެ ކައުންސިލާ މަތިކޮށްފައިވާ ޒިންމާ އަދާކުރުމަށްވުރެ ބޮޑަށް، ރަސްމީ ގަޑީގައާއި ނުރަސްމީ ގަޑީގައި ވެސް އިދިކޮޅު ކެންޑިޑޭޓްގެ ކެޕްމެއިން ކުރުމަށް ކަމަށް އެ ބަޔާނުގައި ބުނެފައިވެ އެވެ.

"އެގޮތުން ކައުންސިލްގެ މުވައްޒަފުން ކެމްޕެއިންގައި ބޭނުންކުރުމާ، ތަނުގައި ހުރި ވެހިކަލްތަކާއި ޕްރިންޓަރާ ކަރުދާހާއި އެހެނިހެން ވަސީލަތްތައްވެސް ބޭނުންކުރަމުން އެބަދެއެވެ. މިވަގުތު ހޯރަފުށީ ކައުންސިލްގެ އަމާޒު ހުރީ ޤާނޫނުން އެކައުންސިލާއި މަތިކޮށްފައިވާ ޒިންމާ އަދާކުރުމަށްވުރެ ބޮޑަށް، ރަސްމީގަޑީގައާއި ނުރަސްމީ ގަޑީގައިވެސް އިދިކޮޅު ކެންޑިޑޭޓްގެ ކެޕްމެއިން ކުރުމަށެވެ." ޕީއެންސީގެ ބަޔާނުގައި ބުނެފައިވެ އެވެ.

ޕީއެންސީން ބުނެފައިވަނީ މި އިންތިހާބާ ދިމާކޮށް ހޯރަފުށީ ކައުންސިލުން ގޯތި ދިނުމާއި މިހާރު ކައުންސިލުން ބިން ދޫކޮށްފައިވާ ފަރާތްތަކުގެ ބިން ބޮޑުކޮށްދޭނެ ކަމަށްވެސް ބުނަމުންދާ ކަމަށެވެ.

ގާނޫނުތަކުގައި ކަނޑައެޅިފައިވާ ހުދޫދުގެ ތެރޭގައި ކެމްޕެއިން ކުރުމަށް ޕީއެންސީ ޕީޕީއެމް ކޯލިޝަނުން ހޯރަފުށީ ކައުންސިލް މެމްބަރުންނަށް ވަނީ ގޮވާލާފަ އެވެ. އަދި ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރަމުންދާ މައްސަލަ ކަމާބެހޭ މުއައްސަސާތަކުން ބަލާ ތަހުގީގުކުރުމަށްވެސް ގޮވާލާފައިވެ އެވެ.

ހޯރަފުށީ ކައުންސިލަށް ތުހުމަތުކޮށް ޕީޕީއެމް ޕީއެންސީން ބަޔާނެއް ނެރެފައި މިވަނީ އިންތިހާބަށް ނުފޫޒުފޯރުވުމާއި، ގާނޫނީ އިމުން ބޭރުން ކެމްޕޭން ކުރާ ފަރާތްތަކާމެދު ފިޔަވަޅު އެޅުމަށް ހިއުމަން ރައިޓްސް ކޮމިޝަން (އެޗްއާރްސީއެމް)އިން މިއަދު ގޮވާލާފައިވަނިކޮށެވެ.