ފުލުހުންގެ ޓްރެފިކް ޑިޕާޓްމަންޓް އަލުން އުފައްދައިފި

އައިމިނަތު ޝިޔާޒާ

30 ޖޫން 2024 - 18:09

0 comments

ޓްރެފިކް ޕޮލިސް ޑިޕާޓްމަންޓް އުވާލާފައިވާތާ ގިނަ ދުވަސް ތަކެއް ފަހުން އެ ޑިޕާޓްމަންޓު އަލުން އުފައްދައިފި އެވެ.

ވެހިކަލްތަކުން ތޮއްޖެހިފައިވާ މާލޭގެ މަގުތަކުގެ ރައްކާތެރިކަން ބަލަހައްޓަމުން އައި އެ ޑިޕާޓްމަންޓް އުވައިލީ، ފުލުހުންގެ އިދާރީ އޮނިގަނޑަށް ގެނައި ބަދަލުތަކާ އެކު، ކުރީގެ ސަރުކާރުގެ ދުވަސްވަރު އެވެ.

ޓްރެފިކް ޑިޕާޓްމަންޓް އަލުން އުފައްދާފައިވާ ކަމަށް ހާމަކޮށްފައިވަނީ ފުލުހުން ކުރިއަށް އޮތް ހަތަރު އަހަރަށް އެކުލަވާލާފައިވާ ސްޓްރެޓެޖިކް ޕްލޭން ގައެވެ. މިހާރުގެ ސަރުކާރުން މިސްޓްރެޓެޖިކް ޕްލޭނުގެ ދަށުން މާދަމާ އިން ފެށިގެން ޓްރެފިކް ޕޮލިސް ޑިޕާޓްމަންޓް އަލުން ހިންގަން ފަށާނެ އެވެ

ފުލުހުންގެ ޓްރެފިކް ޑިޕާޓްމަންޓް އަލުން އުފައްދާފައި މިވަނީ މާލެ ސަރަހައްދުގައި ދުއްވާ އުޅަނދުތައް ވަރަށް ބޮޑަށް އިތުރުވެ އަދި ޓްރެފިކާ ގުޅޭ ތަފާތު މައްސަލަތައް ވަރަށް ބޮޑަށް އިތުރުވެފައި ވަނިކޮށެވެ.

އާ އޮނިގަނޑު ހަދާފައިވަނީ ލޯކަލް ޕޮލިސިން ރީޖަންތައް ހިމެނޭ ގޮތަށް ކޮމާންޑް/ ޑައިރެކްޓްރޭޓް ލެވެލްގެ 17 ކަމެއްގެ މައްޗަށް ބަހާލައިގެންނެވެ.

އަދި މީގެ އިތުރުން ހުޅުމާލޭގައި ޕޮލިސިން އިތުރަށް ހަރުދަނާކޮށް ތަނާ އެކަށީގެންވާ ހިދުމަތެއް ދިނުމަށްޓަކައި ހުޅުމާލެ ޕޮލިސްގެ ނަމުގައި ވަކި ޕޮލިސިން ކޮމާންޑެއް ވެސް ވަނީ ގާއިމްކޮށްފަ އެވެ. ހުޅުމާލެ ފޭސް 1 އަދި ހުޅުމާލެ ފޭސް 2ގެ ޕޮލިސް ސްޓޭޝަންވެސް ދެން ހިންގާނީ، ހުޅުމާލެ ޕޮލިސް ކޮމާންޑުގެ ދަށުންނެވެ.